الموضوع: عايزين نشوف حل لسرقه الالنترا يا جدعان

بعد الهجوم الشديد من الساده الحراميه تجاه الالنترا اصبح كل مالك للالنترا خايف ومرعوب يطلع بيها وخايف يركنها في الشارع وخايف يروح بيها الشغل فياريت يا جماعه نناقش مع بعض كل واحد عمل ايه او حيعمل ايه عشان يأمن الالنترا من السرقه ونفيد بعض ونحمي عربياتنا
ودي دعوه لكل مالكي الالنترا للدخول والمشاركه

المشاركة الأصلية كتبت بواسطة samir elshahawy

هأقولك أنا بأعمل أيه و مش بس مع الالنترا و لكن الاجراء ده مع اي عربية كانت عندي

أولا.. عند البيت :
تحت البيت فيه باركينج كبير (داخل مدينة الرحاب) و الباركينج مؤمن ب 2 من الامن الخاص بالرحاب
يعني الي حد كبير بأكون مطمئن و مع ذلك كل شوية بألقي نظرة و أتابع العربية

ثانيا .. في الشغل :
بأركن العربية قدام مبني الشركة و طبيعي أن أمن الشركة و الشركات اللي حوالينا بتكون العربيات تحت نظرهم طوال ال 24 ساعة ده غير أن عامل النظافة اللي بيغسل العربيات بيتابعها كل شوية

ثالثا.. في أي مكان أخر :
لايمكن أركن العربية في الشارع كده و خلاص و لكن بأركنها في جراج أو باركينج مؤمن و مش مهم أدفع زيادة شوية
و لو حكمت أني اركن في الشارع بأركنها بحيث تكون قريبة مني و أقدر أطل عليها أو تكون قدام حد أعرفه بحيث يتابع العربية و ساعات أركنها بالقرب من كشك سجاير أو محل و أطلب من صاحب الكشك أو المحل أنه يأخد باله و أسيب له ورقة عليها رقمي للاتصال بي عند الضرورة

طبعا ربنا هو الحامي و هو الحافظ بس نعمل اللي علينا و نتحري المكان اللي نركن فيه مش نرمي العربية في أي حتة و خلاص

و علي فكرة أي مكان في وسط البلد دلوقتي بيكون فيه سايس مسئول عن الركنة في الشارع فياريت لو تركن العربية قدامه و تديله قرشين زيادة هاتلاقيه لازق قدام العربية و مش بيتركها الا للضرورة أو هو بنفسه هايقول لك تعالي يابيه أركن هنا (بيكون عندهم اماكن شايلينها للحبايب)

تمام ما ممكن كلنا نعمل كده بس ده مش حل عملى و كده كده هنضطر نسيبها فى الشارع لازم نشوف حل عملى عن كده مش حتت عيل ملوش لازمة يفتح العربية فى اقل من دقيقة و نص