الموضوع: شاهد فيديو سرقه هيونداي في دقيقتين اتصورت بكاميرا كوك دور

الفيديو ده شوفته على الفيس من كام يوم
وشرح الفيديو علشان اللى مش باين عنده

العربية هيونداى النترا راكنة أمام محل كوك دور فى شارع شعراوى فى اسكندرية و كان فى كاميرا داخل المحل بتصور الباب و أدامه العربية و الساعة 6.30 الصبح و الشارع شارع حى فى اسكندرية و كان فى عربيات ماشية و ناس

المهم قرب 2 شباب على العربية منهم واحد لابس جاكت بزنط مخبى وشه وطوح ايده كسر زجاج السائق و دخل من الشباك وكان بيعمل حاجة جوه مش باين ايه بس أكيد كان بيفور طبلة الكونتاكت المهم زميله التانى خد من واحد تالت مش باين فى الفيديو حاجة زى أجنة و اداها للشاب اللى قاعد جوا العربية وسابه و مشى
شوية و الشاب دور العربية و طلع بيها
المصيبة ان الواد من ساعة كسر الزجاج لغاية ما طلع بالعربية ما خدش دقيقتين وده باين من تايمر الكاميرا
والعربية مفيش أى انذار أو فلاشر اشتغل بيها مع ان صاحبتها كتبت انها من اسبوع لسه مركبة فى التوكيل انذار بيفصل طرمبة البنزين بس واضح انه فطشة
وصاحبتها دفعت مبلغ و رجعت العربية بعد ما اتصلوا على نمرة جوزها حسب ما أتذكر كان المبلغ 27 ألف

وربنا يسترها علينا و يعوض صاحبتها خير

وعلى فكرة ده عادى عندنا فى اسكندرية العربيات بتتسرق و بتطلع على الكيلو 26 وهما بيتصلوا بيك لو سايب كارت ولو ما سبتش بيستنوا لما تعمل محضر و تحط نمرتك فيه وبيعرفوا من الداخلية فبيتصلوا بيك
والداخلية عارفة مكانهم بس على كلامهم ما يقدروش يخشوا علشان لما حاولوا قبل كده ضربوا آر بى جيه على مدرعة الشرطة طيروها 3 متر فى الهوا
طبعا الكلام ده من مامور قسم لما اتسرقت تالت عربية من تحت البرج عندنا و رحنا نبلغ عشنا القصة دى
وكان فيها انذار و الانذار اشتغل الساعة 3.30 الفجر بس الأمن كان نايم و التانى اجازة والواد سرقها بسرعة كانت شيفروليه اوبترا و خلصت على 20 الف و خدوا طبعا معاهم ناس تعرف البلطجية علشان يعرفوا يخشوا بدل ما تتاخد فلوسهم و يدبحوا

والداخلية طبعا ملهاش لازمة

المفروض غبور يتعاقب علي ده ويتطالب بتعويض
اي عربية استرقت وكمان الانزار الوهمي الي بيقول عليه