الموضوع: تقيم اداء قسم كيا من اعضائه .... محتاجين نسمعكم فى بيت العيلة

ألسلام عليكم
انا شايف ان الموضيع فى المنتدى كويسة و مفيدة و إلى عنده مشكله بيلاقى ردود مفيدة
لكن المشكلة من اﻷقسام اﻷخرى إلى بتدخل المنتدى لتشوية أى عربية تابعة لشركة كيا بس ده الطبيعى بالنسبة ﻷى عربية ناجحة
بقترح إن يكون فى يوم كل شهر نتقابل فيه نتعرف على بعض و نشوف العربيات الجديدة إلى اﻷعضاء إشتروها و نكتب عليها تقارير مشتركة

المشاركة الأصلية كتبت بواسطة ابو ليلى

السلام عليكم ورحمة الله وبركاته

اعضاء قسم كيا الكرام ونموره اهلا وسهلا بيكم فى موضوع مهم من فترة وانا محتاج اعمله لانه بقى
مهم لينا كلنا ويارب نطلع منه بنتيجة تكون مفيدة لاعضاء القسم .

حاليا فى تقيم شامل للقسم بيتم فيها قياس اداء القسم وموضوعاته والموضوعات
المثبتة وطريقة ارشفة الموضوعات لتغطية جميع الموديلات
فى كمان تقيم لاداء اعضاء فريق كيا تيم ومدى نشاطهم طوال الفترة اللى فاتت ( ثلاثة شهور )عندنا كمان موضوع المنسق اللى بيمثل القسم اللى بيمثله العبد لله ومحمد مصطفى محتاجين رائيكم فى طريقة عملنا بمنتهى الشفافية
كمان محتاجين نضيف لينا منسق مساعد لان القسم اصبح كبير بسم الله ماشاء الله ومحتاج فعلا منسق معانا .
محتاج اسمع ارئكم فى كل ما يمثل القسم واللى عنده اى اقتراح ياريت بلاش يبخل علينا بيه ...
طبعا الموضوع مخصص لاعضاء القسم فقط علشان هما ادرى بيه ....
هنتناقش مع بعض ونسمع بعض ده بيتكم ومحتاج منكم اهتمام واى حاجه هتفيد الاعضاء وفى المتناول هتتعمل باذن الله .

وعليكم السلام ورحمة الله وبركاته

بداية ممتازة للتحاور وتطوير القسم وديماً بحاول اشارك بما استطيع وانقل التجارب.

هقول تقييم من وجهة نظرى:

القسم محتاج تشجيع للمواهب والأهتمام بالأعضاء الجداد ومساعدتهم بشكل اكبر للمشاركة فى المنتدى
نفسي يكون فى مجلة شهرية للقسم يتحط فيها افضل المواضيع لكل شهر علشان اذا فى حد مشغول فى فترة معينة خصوصا العوجيز الى زينا يقدر يراجع الأعداد القديمة ويستفيد بمواهب الأعضاء، بحس ان فى موضيع كتير مش سهل الواحد يوصلها تانى وبياخد وقت كبير علشان يلقيها حتى اذا اتعمل موضوع مجمع و مثبت بيكون فى صعوبة انه يكون شامل. اكيد الواحد بعد فترة بيقول كان نفسي اضيف جزء جديد على الموضوع.

ممكن بعد فترة ومتابعة دقيقة للمواضيع، مثلاً كل سنة نعمل زى مرجع للمشاكل الى تخص كل عربية PDF بعد اثبات حلها بنسبة كبيرة + افضل الأختيارات المجربة بالإجماع وتتقسم تحت:
- تعديلات
- الزيوت
- الكهرباء والتكييف عوامل الأمان
- المحرك والبنزين
- الفرامل
- الصالون والفرش الداخلى
- انظمة التعليق والثبات (العفشة) + الجنوط + الكوتش
كل ده يكون محفوظ بحقوق الملكية وكمان الوجو بتاع المنتدى والقسم ويتحط اسم العضو مع كل الحل
مش شرط يكون المرجع ده كله مليان المهم يغطى معظم الأجزاء الى الناس اجتهدت فيها

- من اهم النقاط الصراحة نفسي تتحقق يكون فى ممثل للقسم مرتبط بالتوكيل بشكل مباشر مش بس علشان خصومات، لأ علشان ينقل ملاحظات الأعضاء البناءة والمشاكل وعيوب الصناعة كل فترة معينة فى صورت تقرير عن تجارب عملية متكررة ويسلام اذا فى ايجابية فى عرض حلول كمان عليهم اذا مش موجودة عندهم الموضوع يمكن خيالى شوية بس ممكن ينجح وتعم الفائدة على الجميع وده يكون مفتاح يساعدهم لتقديم حل قاطع ونهائى لمشاكل ومعانة ناس كتير وبرضه التوكيل يكون دوره ايجابى اكتر ويعرض المشاكل دى على شركة كيا.
ليه بقول كده علشان سعات بيكون صعب ربط المشاكل ببعض والى بيروح للتوكيل او ميكانيكى بيكون كل واحد وصفه مختلف للمشكلة عن التانى، هنا فى المنتدى الناس علشان متعاونة جدا بيحصل ربط قوى للمشاكل المعروضة بصورة مختلفة وللأسف مجهود مش مستغل بنسبة كبيرة مع انه مقدم بدون اى مقابل
كده حاسس انى بحلم جامد ....

- توجيه نصائح عشان الى عايز يشترى عربية كيا يعنى الزوبد من الأخر ، الموضوع باين صعب بس فى الحقيقة هما 3 او4 موديلات كيا منتشرين هنقدم نصيحة للناس بكل الفئات الموجودة و مقارنة بينهم علشان اعرف كويس هل هتتوافق مع طبيعة احتيجاتى يعنى هتشترى الفئة العالية يبقه خلى بالك جنط 17 و نوشفية ، خامات داخلية افضل وفرش جودة ممتازة و ABS , EBD الخ

فهرس يعرف الناس معانى و كمان وظائف المكونات الحديثة وطريقة عملهم وازاى اعرف بنفسي العربية فيها الكلام ده او لأ قبل مدفع مبلغ كبير ويطلاع كلام وخلاص
ABS
EBD
ESP
EPS
ASR
Parking Sensors
Air Bags
Immobilizer
Flex Steering
Cruise Control
Key-less Smart Key
Dual Zone Air Conditioner
Paddle Shifter
LED Lights
يسلام اذا كمان صورة للعلامة بتاعة كل وظيفة او نظام فى العربية


- اخر حاجة سعيد جدا انى معاكو، وعيزين إبداع ومعلش طولت عليكم وكلام كتير


-------------------

السلام عليكم
منور الدونيا يا ابو ليلى وواحشانى مواضيعك انا كنت عملت موشوضوع من فترة ولقيت ما فيش استجابة من حد ولا ردودو جديدة وفضلت متابع الموضوع فترة طويلة الموضوع اهو http://www.nilemotors.net/Nile/330677-2013.html
حضرتك عارف المشكلة فى ايه ان الكل بيكسل يدور على الموضوع اللى هوا عايزه او بالمعنى الصحيح بيتوه فى وسط كمية المواضيع الكتيرة وممكن بقى يتكعبل فى موضوع حب يقرا عنه وفى الاخر ينسى هوا كان بيدور على ايه هههههههههههههههههه ده بالنسبة لمقترحى اللى اولا واخيرا كنت عامله زى ما حضرتك رديت عليا فيه ان الهدف هوا تعارف الناس على بعضها وده شىء جميل.
تقييمى لاداء كيا تيم :
- احنا عارفين كوييس ان كل واحد عنده مشغوليات فى حياته ساعات كتير بتمنعه انه يبقى متواجد بصفة مستمرة ولكن انا بشكر حضرتك والاستاذ محمد مصطفى كمنسقين للقسم ولكن زى ما قولت المواضيع محتاجة شوية هندلة
- كيا تيم انا اكتر واحد بشوفه بيشارك هواا/ محمد ابراهيم 2CODE - ورده بيبقى سريع اول ما بيفتح تعليقى الشخصى انه اول ما بيدخل بيشوف قسمه الاول وبعد كده بيشارك فى المنتدى بشكل عام يليه بصراحة ما فى موضوع بشوفه فى القسم الا بيرود فيه هوا م/ مهاب Mohab555 وانا عارف انه موش من كيا تيم يليهم بردو عشان الحق يقال ياسر السيد yasserelsayad.
انا قيمت بناءا على المواضيع اللى انا اشتركت او قريت عنها وزى ما قولت فى الاول انا عارف ان ممكن يكون الناس عندهم ظروف منعاهم.
بالتوفيق يا ابو ليلى ان شاء الله وانا اسف جدا على الاطالة ومعاكو فى اى حاجة.

باشكرك علي اهتمامك، بدأت احس ان المنتدي مابقاش متعاون زي زمان.. بالذات في المشكلات التقنية اللي بتواجه المستخدمين في عربياتهم.. ممكن واحد او اتنين يكتفوا بالرد و للاسف ردودهم مش بتغطي كل جوانب التساؤلات.. بقي العادي ان الواحد يشوف في اي موضوع الردود مابتزدش عن 3-4.. مش عارف ايه علاقته بالمشرفين بس انا شايفها مشكلة.. يا ريت برضه لو يتعمل تصنيف للمنتدي بيكانتو و سيراتو و كارينز عشان بقي فعلا كبير اوي

موضوع زي ده كنت عامله من فترة للاسف تم تثبيته لفترة محدودة جدا و بصراحة ماتشجعتش اني اخش علي المنتدي تاني وغبت عنكو كتير بسببه

http://www.nilemotors.net/Nile/281938-2012.html

المشاركة الأصلية كتبت بواسطة ahmedhossam86

باشكرك علي اهتمامك، بدأت احس ان المنتدي مابقاش متعاون زي زمان.. بالذات في المشكلات التقنية اللي بتواجه المستخدمين في عربياتهم.. ممكن واحد او اتنين يكتفوا بالرد و للاسف ردودهم مش بتغطي كل جوانب التساؤلات.. بقي العادي ان الواحد يشوف في اي موضوع الردود مابتزدش عن 3-4.. مش عارف ايه علاقته بالمشرفين بس انا شايفها مشكلة.. يا ريت برضه لو يتعمل تصنيف للمنتدي بيكانتو و سيراتو و كارينز عشان بقي فعلا كبير اوي

موضوع زي ده كنت عامله من فترة للاسف تم تثبيته لفترة محدودة جدا و بصراحة ماتشجعتش اني اخش علي المنتدي تاني وغبت عنكو كتير بسببه

http://www.nilemotors.net/Nile/281938-2012.html

شوف يا احمد انا هقولك على حاجة - لو الموضوع فيه 3 ردود وانا او المشرفين او اي عضو كيا تيم شايف ان معندهوش معلومات زيادة عن الـ3 ردود دي هيرد يقول ايه تاني ؟ ايه لزوم الرد تاني ؟ مش كتر مشاركات هو

يعني انا لو لقيت رد واحد في الموضوع رد على السؤال من اوله لاخره هتلاقي رد واحد بس في الموضوع وده لانه بيكون كافي للموضوع وغطاه بالكامل

المشاركة الأصلية كتبت بواسطة 2CODE

شوف يا احمد انا هقولك على حاجة - لو الموضوع فيه 3 ردود وانا او المشرفين او اي عضو كيا تيم شايف ان معندهوش معلومات زيادة عن الـ3 ردود دي هيرد يقول ايه تاني ؟ ايه لزوم الرد تاني ؟ مش كتر مشاركات هو

يعني انا لو لقيت رد واحد في الموضوع رد على السؤال من اوله لاخره هتلاقي رد واحد بس في الموضوع وده لانه بيكون كافي للموضوع وغطاه بالكامل

معاك.. هو الردود الكتير عزوة برضه .. :) بس بيبقي قصدي ان احنا ما شاء الله عددنا كبير فا اي حد عدت عليه المشكلة دي يقدر يساعد و ينقل تجربته فاهمني.. ده اللي كنت باشوفه في 2010 و 2011 اذا ماكنتش غلطان

نفسي نفهرس المواضيع
خصوصا اللي اخدت حقها في النقاش
لان ممكن يكون في رد في موضوع يلمس مشكلة عندك تكون بدور لها علي حل
وده طبعا هيساعد الاعضاء الجدد وقليل الخبرة بالسيارات عموما , اللي انا واحد منهم
اخيرا ان بحب النقد حتي لو مش بناء لانه بيفتح مجال نقاش واسع بستفيد منه
اخيرا المجهود المبذول واضح واكتر من ممتاز

انا بصراحة جديد فى القسم , لكن الموضوعين الى عملتهم لاقيت تجاوب كبير من الادارة والاعضاء واستفدت ووصلت للى انا محتاجه , والى الامام دائما وفقكم الله