الموضوع: الفيرنا وصيانه ال1000 في مركز الاقصى

بسم الله الرحمن الرحيم ازيكو يا نجوم هيونداي
في الاول باركولي على الفيرنا وادعولي ربنا يكفيني شرها
روحت مركز الاقصى النهارده وصلت عند البوابه قابلني واحد من الامن اتفضل يا فندم سيب العربيه و المفتاح وادخل وخد الكارت ده (عليه رقم) وادخل لمهندس الاستقبال
دخلت اهلا وسهلا
انا: كنت عايز اعمل صيانه الالف للفيرنا
المهندس: طيب الرخصه .........و نقل البيانات منها
الكلام ده كان الساعه 9.30
وبدأت اقول للمهندس على العيوب اللي في العربيه وهي:
الدريكسيون فيه لوحه شمال لما بكون ماشي على الطوالي والازاز اللي ورا شمال بيطلع وبينزل بصعوبه
وفي عضه في المرشدير والتكيف بيعمل رعشه في الموتور لما بيشتغل ......لغايه كده تمام
كل اللي فات حماده واللي جاي حماده تاني خالص
قعدت استنيت لعايه الساعه 2 الضهر وكل شويه العربيه تدخل وتخرج ويحطو عليها قمع اصفر عشان تتجرب
واخيرا جت الساعه الموعوده استلمت العربيه
الازاز اللي ورا بايظ وتقيل برضو وزيتولي الازاز اللي قدام (اللي انا مطلبتش ان يتعمل فيه حاجه اصلا) طبعا هما ادرى بمصلحه العربيه ده غير بقه الزيت اللي طرطش على الطبلوه مطرح ما كانو بيزيتو .......في حاجه بس عايز اقولها ..قزاز بايظ وبيعلق ده على فرض مثلا نقوم نصلحه ازاي المفروض نفك الفرش ونرجلش الازاز لغايه ما يتظبط مش اروح مزيت المجرا
تاني حاجه بوظو ظبط الزوايا خالص خرجت من المركز وطلعت على الدائري العربيه كانت بترمي يمين على الاخر طبعا ساعتها كنت هطق عربيه لسه زيرو وبترمي يمين بسبب الزوايا والله ماكنت مصدق
وطبعا عضه الفتيس زي ما هيه والتكيف زي ما هو
يمكن الحسنه الوحيده اللي عملوها من غير ما اقولوهم عليها هي شد فرامل اليد
المهم خرجت من عندهم وطلعت على بريدجستون ظبط وايا ورا وقدام وخرجت عدلت الركسيون
وروحت
طبعا في صيانه الاف مفيش مصنعيه دفعت 346.5 بالضريبه تمن الزيت والفلتر وشكرا
بس نصيحه يا جماعه سيبكم من قصه الضمان وعمل الصيانه في التوكيل او المراكز المعتمده كل ده كلام فاضي ورمي فلوس في الارض واخرهم يغيرو زيت وفلتر
انا قررت اشوف اي حد فاهم واعمل الصيانه عنده بعد كده
الحمد لله على كل حال

الف مبروك يا زميلي الفيرناوي ومبروك برضو ليك على العربيه الجديده
بص روح اعمل صيانه الالف بس .. وجرب المصنعيه فيها ببلاش ومش هتدفع غير تمن الزيت والفلتر بس اوعى تقولوهم على اي ملحوظات في العربيه علشان ميخربوهاش وفي نفس الوقت تدي لنفسك وقت تجرب فيه العربيه لغايه صيانه ال5000 لقيت العربيه تمام ومفيهاش مشكله كبيره خلاص كبر دماغك من الضمان وروح اعمل الصيانه بره
بس عايزين الفيرناويه القدام يساعدونا بقى ويقولولنا على الناس المحترمه اللي بيعملو الصيانه بتاعتهم عندهم