مساعدة من بشمهندس طارق زويل.......

انا كنت عايز استفسار مهم جدا
انا عربيتى عاملة دلوقتى 1003 كيلو متر ورايح الصيانة بتاعة ال 1000 كيلو ان شاء الله بكرة
ان شاء الله المشوار حوالى 40 كيلو يعنى العربية هتبقى عاملة 1050 كيلو دا كحد اقصى هل دا غلط وكان المفروض اروح الصيانة قبل ال 1000 كيلو ما يكتملو ولا عادى؟
وبعدين انا كنت عاوز اعرف الصيانة هتتكلف كام بالظبط؟ علما بان عربيتى خليجى مش مصرى يعنى فيه مصنعية
يعنى سعر الزيت ال10000 كيلو والفلتر والمصنعية كام؟
انا اتصلت بالرواس وقالولى مفيش حجز تعالى الصبح بدرى انا عارف الطريق للرواس بس كنت عاوز اروح المركز الرئيسى انا من (بنها) بس وانا ببقى مسافر رايح القاهرة باخد بالى من الرواس واليافطة بتبقى واضحة لكن مش باخد بالى خالص من المركز الرئيسى فيا ريت حد يقولى شكلو من الخارج ازاى؟

أهلا يا استاذ محمود

بخصوص الكيلو متر فالموضوع أبسط من كده بكتير ومفيش أي مشكلة ده فيه ناس بتيجي تعمل صيانة الألف عند 1500 وأكتر - هو طبعا كل ما كان في حدود الألف يبقى أفضل

تكلفة الصيانة 1300 خليجي 330 ج شامل ض.م (220 زيت + 50 ج فلتر + 60 ج مصنعية)

الوكيل (مصرية) غير الرواس

الوكيل (مصرية) مركز الخدمة الرئيسي في الكيلو 16 الطريق الزراعي يعني لو جاي من بنها تلاحظ باقي كام كيلو على القاهرة وعند الكيلو 16 قبل كوبري قليوب على اليمين هتلاقي يافطتين طوال وراهم شارع صغير فيه مركز الخدمة

الرواس موزع معتمد ومركز خدمة معتمد وعنده عربيات خليجي ضمانها عنده وهو في الكيلو 12 يعني بعد كوبري قليوب ولكن قبل غبور وقبل ما توصل للدائري

والاتين ظاهرين في الصور في الموضوع ده

http://www.nilemotors.net/Nile/showthread.php?t=9838

الف شكر يا بشمهندس طارق
انا رحت فعلا الصيانة بس عند الرواس لانى كنت عديت كوبرى قليوب وسالت قالولى دا عدى هلف تانى وهرجع قلت خلاص اروح الرواس
انا سلمتهم العربية بس المهندس اللى هناك قالى لو من غير ضمان انا مش عاوز الكتيب بتاع الصيانة مستخدموش ولا كتب فيه حاجة دا عادى ولا لأ؟
وبعدين اقعدت فى استراحة والعربية راحة الورشة ومحدش رضى انى ادخل الورشة اشوف بيعملو ايه (انا خايف ليكونو مغيروش حاجة)
بعد حوالى ساعة رحت الحسابات ادفع والفاتورة بالتفصيل اهى
زيت موبيل 1 ب 205 ج
فلتر زيت ب 45 ج
سيرفيس ب70 ج
ضريبة مبيعات ب 32 ج
اخد منى 355 ج
اعتقد لو كانت مصرى كانت هتبقى ارخص شوية مش عارف عموما الحمد لله خلصت
بس الراجل قالى تعالى صيانة ال10000 على طول متجيش فى ال5000 دى برضو مش متاكد منها
هوا صيانة ال5000 بيحصل فيها ايه؟
والف شكر يا بشمهندس

اللي حصل ده طبيعي


- مكتبش في الكتيب لأن العربية مش في الضمان وبالتالي مش مهم يسجل مواعيد الصيانة الدورية الا لو انت عايز تسجلها لنفسك


- حتى عندنا وأعتقد في جميع التوكيلات ومراكز الخدمة الكبيرة ممنوع العميل يدخل الورشة انما في مراكز بتكون فيها استراحة العملاء بتطل على الورشة يعني شايف عربيتك


- موضوع غير حاجه ولا لأ دي بترجع للثقة في المكان وفي حالة تغيير قطع غيار المفروض بيتم وضع قطع الغيار القديمة في العربية


- هو الزيت عندنا 200 ج وعندهم 205ج و الصيانة 55 ج عندهم 70 ج - ده الفرق


- مواعيد الصيانات المحددة من ميتسوبيشي هي صيانة الألف الأولى ثم كل 10 آلاف كيلو بعد كده


انما صيانات الخمسة الاف دي مسمعتش عنها الا من المنتدى هنا من خلال الناس اللي عملوا صيانة للعربيات في مراكز صيانة الخليجي

طب معلش يا استاذ طارق انا لسه جايب لانسر 1500 خليجي.. اعمل صيانة الالف عندكو برده؟وهتبقي بكام ؟و احجز قبلها ولا لأ؟انا عامل دلوقتي 300 كيلو..
والف شكر مقدما... معلش تعبينك معانا دايما

أهلا بيك يا دكتور باسم وألف مبروك العربية

حضرتك شرفنا في أي وقت لما العربية تعمل الألف الأولى

التكلفة هتزيد شوية علشان العربية بتاخد كيلو زيت اكتر من اللانسر العادية

( فلتر 55 ج + زيت 260 ج + مصنعية 55 ج )+ 10 % = 407 ج

وصيانة الألف مش محتاجة حجز انما ما بعدها محتاج باذن الله

الف الف شكر يا بشمهندس واتمني اني اتعرف علي حضرتك لما اروح