نويت إن شاء الله أشد اللانوس
السلام عليكم ورحمة الله وبركاته
تحياتى وتقديرى للجميع،،،
إن شاء الرحمن قررت إنى أشد اللانوس كدا شدة حلوة اليومين الجايين، سمكرة ودوكو ورش كامل، رحت لسمكرى إمبارح فرجته على الشغل اللى فى العربية وهو كالتالى: تظبيط عتب ودا شغل بسيط، شغل فى الرفرفين اللى قدام خبطات فيهم، البابين اللى ورا عاوزين يتظبطوا اى حد بيسند عليهم بيطبقوا (ماشى بسلاكة البلاعة على طول)، السقف فيه شغل بسبب الكلاب طبعاً معروفة، السقف من الطرف بالعرض فوق الباب الخلفى عاوز يترد ويتظبط، الكبوت فى شوية نقر تترد برضوا، الشنطة فيها نقرة من فوق برضوا عاوزة تتظبط، المهم هعمل العربية كاملة سمكرة التكلفة بالعافية وصلت لـ (600ج).... وبالمناسبة هيحرق البوية كلها اللى فى العربية
ولسه الدوكو والرش واحد حبيبى هيعمل الدوكو قدام البيت عندى والرش هنشترى البوية ونروح نرشها فى فرن يعرفه... فعاوز اعرف التكلفة بتاعة الكلام دا ممكن تخش فى كام، وهل ياترى سعر السمكرة مبالغ ولا كويس..
ياريت نصايحكم... وياريت كمان شوية شغل ترويش فى العربية بعد الرش ياعنى مثلاً أجلد الإكصدامات بس، ونواكل والشغل دا... ياريت تفيدونى وشكراً جزيلاً....