الموضوع: استشارة هندسية

الواقع بيقول ان هندسه مدني افضل من الاتصالات , وده لعده اسباب
الاتصالات طبيعه شغلها متقلبه لحد ما ومحدوده الي حد ما وكل يوم في جديد , عندك مجالها بيكون اما في الشركات المشغله مثل شركات المحمول و الشركه المصريه للاتصالات و شركه اورانج .. يعتبر دول احسن شركات واحسن مرتبات واستقرار ومش هتتبهدل , ثانيا يليهم في القوه شركات الصناعه المالتي ناشونال مثل هواوي واريكسون و الكاتيل ..الخ ودول مرتبات حلوه وبرستيج بس احيانا مش مستقر و هياخدوا حقهم منك بس هتتعلم صح .. ثالثا بعد ذلك العمل في اي مؤسسه سواء حكوميه او خاصه خدميه او صناعيه , ودي بتكون مرتباتها اقل او مساوي لما سبق علي حسب المؤسسه وبتبقي وظيفتك الوحيده انك تكون مسؤول عن تشغيل و صيانه شبكات الكومبيوتر بهذه المؤسسه .. زي البنوك والمستشفيات والمصانع و الشركات والمولات ....الخ , ودي بيعيبها انك ليك منافس قوي جدا وهو خريج هندسه الحاسبات ونظم المعلومات بيفضلوه عن الاتصالات ,و اخيرا الشركات التي تقوم بالتخديم علي الشركات السابقه ودي بنقول عليها ( شركات المقاولات ) . ودول بتبقي عباره عن شركات بتقوم بتنفيذ المشروعات التي تريدها 3 فئات السابقه وممكن تقول عليها اوت سورس كمان ودي بتبقي مرتباتها علي حسب الشغل يعني في شغل جاي للشركه , المرتبات معقوله طبعا مش زي الفئات الثلاثه بتكون اقل ... مفيش شغل عند الشركه تبتدي تقلل المرتبات ونظام الشهر في شهرين و تمشي الناس يعني استقرار ضعيف ...... فرص العمل في اول فئتين تعتبر صعبه وبتعتمد علي وجود الفرصه اولا ثم اجتهاد من الشخص و تحتاج غالبا لمعارف داخل الشركه لتسهيل الأمور ... الفئه الثالثه اقل صعوبه .. اسهلهم الفئه الرابعه ودي بتحتاج انك لازم تكون صاحب مهارات عاليه عشان الشركات هي اللي تطلبك و محتاجه تكون ( ابن سوق )عشان تعرف تتعامل وما ينضحكش عليك ,, طبعا الاذاعه والتليفزيون ما ذكرتهاش عشان هي تعتبر قطاع حكومي بحت بيسري عليه النظام الحكومي من حيث المسابقات او تعيين اوئل الخريجين كذلك رئاسه الجمهوريه و رئاسه مجلس الوزراء و الوزارات .والهيئات ... كل دول بيطلبوا عن طريق المسابقه او اوائل خريجين او طبعا الواسطه......

نصيحتي ليك , لو اخوك غاوي الموضوع قوي , حاول تفهم منه ايه سبب انجذابه له , وانت اكيد عارف شخصيه اخوك , لو لقيته غاوي علم وابحاث وابتكارات خليه يتفوق في دراسته ويطلع من الأوائل , هتفرق معاه جامد و لو في فلوس متوفره انصحك تخليه يكمل دراسات عليا في الخارج...لو لقيت طبيعته انه اجتماعي وابن سوق وبيحب الحركه والسفر والتنطيط يبقي خليه يعافر وان شاء الله هيوصل ..... المهم خليه يدخل المجال اللي بيحبه ويا ريت يا ريت تجبروه انه يدخل مجال تاني هو لا يريده..... والله الموفق .

المشاركة الأصلية كتبت بواسطة DOCTOReng

مش فاهم....... هل ياترى تقصد لا تجبروه ؟

لا تجبروه