تجربتي مع كونتاكت كارز - تجربة مثالية :)
بسم الله الرحمن الرحيم
السلام عليكم ورحمة الله وبركاته
انا مامن مع كونتاكت كارز من حوالي سنتيين ونص ..
حصل في تلك السنتيين مطالبتيين ..
المطالبة الاولي كانت من سنة وكنت دخلت في توك توك ,, الخساير كانت بسيطة اكصدام وفانوس ..
وتم التغيير وودتيها التوكيل واستلمتها بدون ما ادفع جنية .. روحت التوكيل قولت لهم عايز العربية واخدتها ومشيت و السلام عليكم وعلكيم السلام ..
المطالبة التانية كانت من ايام قليلة ..
ودي دفعت فيها 300 جنية علي حسب شروطهم في المطالبة التانية ..
البداية لما عملت حادثة ودخلت بوش العربية في عربية نص نقل
والخساير كانت كبوت و2 رفرف وفوانيس قدام وفانوس شبورة وردياتير وسربنتينة تكيف وشوية مفصلات ..
اول ما عملت الحادثة .. دورت طبعا علي عربية تقطرني وافتكرت موضوع ونش الفرسان الانقاذ الي كان علية اعلان من فترة هنا وحوار الـ 100 جنية لاي حتة بالكارت ..
كلمتهم .. وبيقولوا لي 300 جنية رغم اني في اكتوبر وهروح اكتوبر .. قولتلهم نايل موتورز والكارت قالوا لي لاء لما تشتري الكارت بنشغلوا بعدها باسبوع ؟؟
عرضهم ماكنش واضح هنا وطبعا قولت له لاء شكرا .. 300 جنية في مشوار اقل من 20 دقيقة وطريق فاضي !!
المهم كلمت التامين علشان اقولهم علي الحادثة لقيتهم بيعرضوا علي بيقولوا انتا قطرت العربية ولا تحب نبعتلك عربية مجاناً !! قولت لهم ياريت ..
التامين جابلي عربية وفضلوا متابعيين معايا لحد ما وصلت التوكيل وسبت العربية ..
تاني يوم جم عملوا مقايسة وادوا امر ان العربية تشتغل ...
العربية اتاخرت شوية في التوكيل والتامين كان بيبعت حد كل شوية يعاين ودي نقطة تحسب للتامين المتابعة والاهتمام كل اسبوع ..
الميزة بقي اول ما العربية خلصت ولما الفواتير وصلت للتامين لقيت التامين بيكلمني تاني يوم بيقولوا تقدر تستلم العربية ( ماشوفتش سرعة كدا )
المميزات الي شايفها :
خدمة عملاء هايلة واهتمام بالعميل ..
سرعة فائقة في الاجراءات ومش معقدة ..
هما الي بيدفعوا مش انا الي هدفع واعد اجري ورا الشركة علشان الشيكات وصرف الفلوس ..
غير كدا المبلغ الي اتحملوة في المطالبة التانية كان كبير جدا وانا اعتبر دفعت حوالي 2 % بس ..
دي كانت تجاربي باختصار :) والي بيقول انها شركة غالية .. اقولة الغالي تمنة فية :)