استفسار علي زجاج الفيليشيا الأصلي

السلام عليكم ورحمة الله وبركاتة
دي اول مشاركة ليه بصراحة في المنتدي ده
بس كان عندي اكتر من استفسار
انا عندي فليشيا موديل 97 بس من كام يوم صحيت الصبح لقيت الزجاج في شرخ فدلوقتي الازجاج كان فبريكا وعليه شعار الشركة انا عايز اجيب زيه فياتري اجيبة منين وبكام وهل يبقي موجود في التوكيل
وبرده عايز اغير سير الكتينه فهل تغييرة صعب خصوصا ان انا سمعت اراء للمكانيكية متضاربة واحد يقولي نحل متور وواحد يقولي هنفك وش التقسيمة والكاربيراتيرة فمين الي صح
وبرده عندي مشاكل دراع الباب من جوة مقصور يا تري قلاقي الحجات دي فين ومعلش محدش يقولي الوكالة عشان انا متخانق معاهم.

اخر مشكله لما باجي اشغل التكييف بشغل المروحة لما باجي اعملها علي اول او تاني درجة بحس انو مشتغلش الا لما بجيبة علي اعلي درجه بتشتغل و صوتها بيبان ياتري دي حاجه عادية ولا في مشكلة في التدريج بتاع المروحة
برده اخر حاجه معلش انا عارف اني طولت انا عندي مؤشر تحت الدركسيون من الناحية الشمال ومتقسم لثلاث درجات ومرسوم علية حاجه زي لمبة بس انا مش عارف ده بيعمل ايه ياتري الي يعرف ميبخلش برده ومعلش علي الاطالة

بالنسبة للزجاج:
الزجاج مش مشكلة انك تجيبة اى ماركة (جريش مثلا) وهتلاقى علية شعار الاسكودا بردة وممكن تجيبة بشماسة (لون اخضر خفيف فى اعلى البربريز) وهوا هوا نفس الزجاج ومش هتحس بقرق وجيبة نوع الدبل وهتلاقية فى حدود 280 جنية بتركيبة (من سنة تقريبا)

بالنسبة لسير الكاتينة

سير الكاتينة الاصلى بترسين بتوعة فى حدود 120 جنية والاتحاد الاوربى ب 90 جنية تقريبا واقل من كدا متجيبش لانك هتلاقى انواع ب 60 واقل
المهم موضوع تغيير سير الكاتينة دا شغلانة تاخد من 3 الى 4 ساعات ولازم تكون جاهز بالاتى
1- سير الكاتينة والترسين
2- جوان التقسيمة واويل سيل بتاع سير الكاتينة (حوالى 15 الى 20 جنية) (قول لبتاع قطع الغيار انك عاو تغيير السير وهوا هيقولك على الجوان والاويل سيل دا)
3- جالون زيت عشان تغيير او ممكن لو زيتك لسا جديد الميكانيكى يحتفظ بية
4- جوان كارتيرة عشان هتتفك.

الميكانيكى بيفك العجلة اليمين وبيفك الدينامو وبيفك العمة والاسبراتيير وبيحل فى الموتور من الناحية اليمين وهوا راكب فى العربية وبيغيرة وبيركب تانى من الناحية االيمين و مصنعيتة فى حدود 100 جنية مش اكثر

بالنسبة لاوكرة الباب

- من الحرفيين
- من عزبة شلبى
- من محل قطع الغيار فى وسك البلد بجوار التوفيقية
ليها اكثر من مكان يعنى

بالنسبة لمروحة التكييف
هيا بردة عندى كدا
هيا فى السرعة 1 و2 بتكون شغالى خفيف وصوتها مش طالع
على 3 تعلى سنة وكمي الهواء تكون اكثر
على 4 بيكون صوتها عالى وهوا جامد
الصوت دا عادى لانى لاحظته فى اكثر من سيارة اخرى مثل النوبيرا نفس الموضوع
ويمكن تكون عاوزة تتنظف
لو انت فاضى وعندك وقت ممكن تروح لبنتاع التكييف يفكها وينظفها ويزيتها بالمرة يمكن صوتها يوطى وبلغغنا بالنتيجة


بالنسبى للزرار
دا حسب على وسؤالى عليه من قبل زيك كدا
دا زرار خاص بتوجية الكشافات الاماية بس الميكانيزم بتاعها متشال من اللى استور العربية لمصر عشان يخف تكاليف (بيشيل اوبشنز يعنى) ودا كان عبارة عن موثور هيدروليكى تقدر من خلال الزرار دا توجه الكشافات الامامية (بس عمرى ما لقيتة الميكانيزم موجود فى اى عربية هنا فى مصر)
(منه لله اللى كان السبب هاهاهاها )
فيه ناس ممكن تستخدمة فى حاجة تانية مفيدة (لو معاك كهربائى شاطر )
ممكن يشتغل زى ديمر لتغيير شدة اضائة التابلوه او لتشغيل اى شئ اخر

انا مش عارف اقولك ايه نورتني الله ينور عليك ربنا يخليك شكرا الف شكر ومليون انت انقذتني وربنا يخليك ليه وللمنتدي وشكراوهفضل اقولك شكرا للمرة المليون

السلام عليكم ورحمة الله وبركاته
الله ينور عليك يا استاذmohamed Abd El Shafy نورتني وانقذتني وشكرا علي ردك الواضح النموذجي وفعلن انت افدتني ربنا يخليك ويخليك للمنتدي وفعلن انت تستحق مليون شكرا ربنا يخليك خلتني فعلن استفد وانت قلتلي فعلن المفيد شكرا شكرا شكر ومليون شكرا

لا شكر على واجب احنا هنا عشان نساعد بعضنا وانا فى اول شرائى للسيارة كنت اتمنى حد يجاوبنى او يدلنى على تساؤلاتى..المهم لما تعمل حاجة وشايفها مفيدة اكتبها عشان كل الناس تستفيد

السلام عليكم ورحمة الله وبركاتة
انا للاسف صحيت الصبح من يومين لقيت البرفيز بتاعع العربية الشرخ الصغير كبر بطريقة ملحوظة جدا وزي ما يكون سرطان بيكبر كل يوم

فهل ممكن الحقة وأعملة حقن ليزر ولو ينفع الشرخ هيرجع ولا ايه النظام انا ساكن في الهرم فعايز حد كويس يكون قريب من عندي يعني موضوع العبسية والحرفين هيبقي صعب لاني كمان معرفش الحرفين دي فين يعني يبقي تمام لو في حد في الدقي او وسط البلد اوالمهندسين وهكذا

ولو منفعش موضوع الحقن اغيرة منين واجيب منين ماركة جريش وبرده من نفس الاماكن تقريبا
انا عايز مكان قريب عشان انا لسه تاتا تاتا في السواقة وغير كده مشغوليات اصحابي كتير واحنا دخليين رمضان مقدرش اقول لحد تعالي نروح العباسية

وياريت الي يعرف ما يبخلش عليه بأي حد بيثق فيه بس ياريت يقولي مكانه وعنوانه عشان انا الصراحة بتوه عند بيتنا هههههههههههههه

شوف يا هندسة
اولا موضوع اللحام هيبان ولا لا دا يتوقف على من يقوم به وشطارتة اولا
وثانيا يتوقف على الفترة الزمنية + انت غسلت الزجاج ام لا

عدى على اى واحد بتاع ازاز واركن العربية بعيد عنه شوية وروحلة على رجلك من غير ما يشوف انك معاك عربية واسالة انت عاوز محل بيلحم الزجاج بالليزر عشان تكبر دماغك من الحوارات ويقولك مش هينفع خد من عندى والقصص دى

روح لبتاع اللحام واعرض عليه السيارة وهوا هيحدد (مبدئيا لو فات عليه اقل من اسبوع بدون غسلة بالماء وكان شرخ طولى غير متفرع يبقى إن شاء الله ينفع واشترط انه لوبان مش هتدفع فلوس عشان يقولك الصح (الموضوع مش مكلف عليهم خالص هيا عبارة عن سلفان شفاف كدا بيغسل مكان الشرخ وبيحطة عليه وبعدين بيجيب لمبة لونها ازرق يمشية عليه فيلحم لوجدة)
انا عملته مرة وطلع كويس والمرة التانية كان شرخ فى مكان تانى خالص والراجل قالى مش هينفع
رحت اشتريت بربريز جديد بحوالى 280 جنية بالتركيب وهتلاقى فى كل شارع ناس بتبيع الزجاج ويركبوة