تقرير شراء اكسنت rb 2013 من معرض الطارق و تقسيط بنك ناصر
بسم الله الرحمن الرحيم
الحمد لله، بعد مساعدة الناس هنا
http://www.nilemotors.net/Nile/344722-a.html -ربنا يكرمكم- اشتريت الاكسنت RB من معرض الطارق و تقسيط بنك ناصر، و حبيت انى اشارك بكل المعلومات اللى عندى و يا رب تفيد الناس
اولا العربية: اكسنت RB موديل 2013 اوتوماتيك و مزودة ب 1 Air Bag و ABS
نصيحتى: اللى يلاقى اللى فيها 2 Air Bag يجيبها احسن، الفرق الفين جنيه بس امان للى معاك بالذات لو هيبقى جمبك زوجتك مثلا كتير لو معهاش عربية بتاعتها، بس انا للأسف ملقتهاش خالص كانت خلصانة
معروف عن العربية مشكلة المساعدين الخلفية و دى بتتغير رسمى ببلاش من التوكيل، مثلا فى صيانة ال 1000 و شوفوا الموضوع ده برضه http://www.nilemotors.net/Nile/347721-rb.html
عربيات منافسة: نيسان تيدا - كيا ريو
ثانيا المعرض:
انا سألت على العربية باللون اللى عاوزه و الAir Bag و الABS ملاقتهاش غير عند معرض الطارق و حتى كانت شحنة لسه داخله مش كانت عنده و مركونه
السعر من غير تخفيض غبور هو 127، بعد تخفيض 3 الاف يبقى 124، الطارق بيبعها ب 123.5
و للعلم الفئة الاولى اوتوماتيك بالخصم عاملة 119، الفئة الاولى + 2 Air Bag و ABS ب 126 بعد الخصم
المعرض ليه فى القاهرة فرعين، 6 اكتوبر و العجوزة، انا اتعاملت مع فرع العجوزة
الناس كويسة جدا و بيعاملوا الواحد كويس مع العلم انى هرييييييته مكالمات كل ساعتين لمدة اسبوع ! :D
المعرض الوحش فيه شوية انه مش بيدى اى هدايا، بس لو حسبتها هتلاقى الهدايا باقل من 500 جنيه اللى هو نزلهم رسمى من غير فصال فى سعر العربية
المعرض طبعا بيبعت مندوب و ممكن يخلصلك الترخيص فى المرور و انت قاعد باشا
العربية كان فيها كل حاجة الحمدلله من عدة و استبن و كتالوج و ضمان العربية و الكاسيت الاصلى و الكاوتش، و كانت عاملة 70 كيلو بس عشان اتنقلت من معرض لمعرض، اه دى مسافة كبيرة شوية بس اهو على الاقل انا ضامن انه مكنش فاصل كابل العداد
البنك:
بنك ناصر الاجتماعى، فرع اول مكرم عند تقاطعه مع الاوتوستراد
فائدة 6.5%
لا يشترط تأمين على العربية
يمكن ربط وديعة بنسبة 40% من المديونية و بكده تبقى مش محتاج لا ضامن ولا نقل مرتب، العائد على الوديعة -بيقولوا- اسلامى لأنه مش ثابت بس فى 2012 كان -ما شاء الله- 10.1%
وديعة ب 75% من المديونية تغنيك عن التأمين الاجبارى على الحياة و يتبقى بس حظر البيع
وديعة 100% تشيل كمان حظر البيع
و ده لينك بيحسب كل حاجة و فيه كل المعلومات و الورق المطلوب
http://www.nsb.gov.eg/nsb/togaria/malaki.aspx
لو هتروح الفرع ده ممكن تسأل على استاذ احمد سامى، خدوم خدوم خدوم و برضه هريته مكالمات :D
كماليات:
النهاردة رحت "أولاد عشم نوار" 46 شارع دمشق و صرفت ال500 جنيه اللى المعرض وفرهملى فى الأتى
- دراع دريكسون
- غطاء للعربية
- كابل توصيل بطارية
- كابل جر
- دواسات تايوانى
دول على بعض عملوا 500 جنيه لأنى شبه جبت اغلى حاجة من كل حاجة -يا ريت لو كده مضحوك عليا حد يقول :ma:- الخطوة الجاية ان شاء الله: تسليح الزجاج و تركيب وسيلة تأمين لمنع دوران العربية لو انا مش فيها اقتراحاتكم بقى للتسليح فين؟ و وسيلة التأمين ايه؟
