جايلكم ف تاكسي من قسم تويوتا لحد عندكم

السلام عليكم ورحمة الله وبركاته

السادة الأسبان أعضاء قسم سيات ومنسقيه ومشرفيه الكرام

العواف

أخوكم واخد تاكسي من أول قسم تويوتا في الياباني لحد قسم سيات في الأوروبي
لأجل ما يشأر عليكم ويطمن على أخباركوا وصحتكوا ويطلب منكوا طلب صغنطوووت

أنا كنت محتاج تقرير عن سيات ألتيا إكس إل
مع العلم
شفت البروشر بتاعها من الموقع الرسمي لوكيلها المصري
وقرأت تقرير مبسط أخونا كريم عامله
وقرأت تقرير تاني ليها على موقع نايل موتورز


بس أنا معايا كورولا 2006 1600
كنت عايز أعرف الفرق بين الإتنين
المطبات
الوسع
الثبات
الوكيل
قطع الغيار ... توافر ... أسعارها
عيوب ناس قابلتها فيها
مميزاتها عن الكورولا مثلاً
نازلة بالفتيس دي إس جي الجديد ... هل ليه مشاكل ؟؟؟
مواصفات الفئات لأن فيه تباين بين البروشر واللي انكتب هنا سواء من قبل كريم إبيزا أو كريم منير


كان ممكن الموضوع يتعمل في قسم المقارنات
بس أنا فضلت أسألكم الأول وبعدين أبقى أروح أسأل هناك برضه


شكراً جزيلاً وأتمنى المساعدة


يللا: فوتكوا بعافية

اهلا بيك في قسم سيات
ويشرفنا جدا تواجدك معنا في القسم
الألتيا اكس ال اعتقد من اكبر العربيات في فئتها - وعلي فكرة هي في الحقيقة تبدو اصغر من الصور
والعربية مبنية علي شاسيه A5 يعني هتلاقيها تشترك في قطع الغيار سواء العفشة او الفرامل مع الأسكودا والجيتا والجولف 5 والنيو ليون كمان
اما عن المحرك فهي نازلة بمحرك 1.6 ومحرك tsi وفي الحالتين مش هتغلب في قطع الغيار
توكيلها الشركة الهندسية واعتقد بيبقي عندهم كل حاجتها وبردو تقدر تشوف الموضوع المثبت وتتصل بيهم تسألهم
وفي موضوع مثبت اخر عن الأسعار والكماليات بشكل مختصر
واعتقد جميع موديلات سيات الجديدة بناقل حركة DSG - واخر ما ورد لعلمنا بشأن الفتيس
طوروا السوفت ويير ووحدة الميكاترونيك
ويجب الالتزام بالزيت بمعايير فولكس
وان شاء ما يحصلش منه مشاكل

تحياتي

ثانكيوز آسيد آخويا
أنا لسة بشرب الشاي ومستني آراء البقية

شكل تويوتا هتهرب علي اسبانيا كتير

والله أميدو باشا تفكير راودني كدا

بس للأسف مش كل أسئلتي اترد عليها
سيد باشا عمل اللي عليه بس كان نفسي بجد ألاقي مساعدات أكتر من كدا أو بالأقل رد على الأسئلة الموضحة بس

السلام عليكم
منور القسم يا أفندم و تحت امرك قدر المستطاع
شوف للأمانه لابد عند مقارنة سيارة بأخري انك تكون جربت فعليا الاتنين و لفترات معقولة تعطيك القدرة علي المقارنة صح و ده صعب جدا لأنك محتاج حد امتلك السيارتين
انا تويوتا 2006 معرفش عنها كتير غير اني شوفتها كام مره و اسمع عنها قليلا

بخصوص الألتيا فهي عربية اكثر من ممتازة نتكلم عنها شوية لأني اتفرجت عليها كتير و كانت احدي اختياراتي لأخي عند الشراء و لكن تراجعت بسبب الفتيس dsg فقط و لكن اسمع انه اتحلت معظم مشاكله حاليا
1- بخصوص الثبات بمعتقدش حضرتك او غيرك عندك اي نقاش او حوار عن ثبات الجولف و الاوكتافيا و الجيتا و الليون فهي علي نفس الشاسيه و لا نقاش حول الثبات خاصة اني اعتقد انها نازلة بعوامل امان كافية ك abs + abd +esbو لكن مش متأكد قوي موديل 2013 هيكونوا نزلو esb اساسي لكنه حسب اخر معلوماتي انه اساسي في معظم عائلة فولكس من فترة
2- المطبات :-
لعربيات دي رغم ثباتها العالي إلا انها عالية عن الأرض و مبتحكش ابدا مهما حملت إلا مع المطبات العالية قوي و حضرتك ممكن تروح تشوفها و تقارن علوها مع عربيات كتير في اي معرض يعني مثلا اول امس كنت راجع من اكتوبر و ورايا واحد بعربية كيا كارينز انا باخد المطبات جري و من غير اهتمام و هو لما رجعنا بيقلي انا حكيت في معظم المطبات رديت عليه اني مبهتمش ابدا بمطبات غير قليلا لما بكون محمل و العربية نايمة علي الارض تماما
3- الوسع
العربية واسعه جدا و شنطتها كبيرة جدا و تعتبر من فئة ال MPV كار يعني حضررتك ممكن تنيم و تلم الكنبة الخلفية و تحمل فيها ثلاجة مرتاح جدا اتمني تنزل تتفرج عليها هتنبهر فعلا و علي ضمنتي
4- الوكيل و قطع الغيار فأعتقد هتلاقي عندهم كل حاجه و خلال فترة الضمان و ما بعدها هتلاقي عندهم قطع الغيار لكني جربتهم في مشكلة بسيطة في عربيتي الكوردوبا 2002 و معجبنيش شغلهم من اساسه و لكن محتمل عشان عربيتي مش في ضمان او قديمة .... الله اعلم لكن في الجديد اعتقد محدش اشتكي في الصيانات الدورية و الطبيعية

توافر قطع الغيار فأعتقد ان اشتراكها كمحرك و فتيس و شاسيه و عفشة مع فولكس و اسكودا فانسي كل شيء موجود
اللي تخاف منه فقط هو الصاح و الاكسسوارات و وقت الحوادث لا قدر الله و دي معظم العربيات بتشترك فيها و لكن هنا هتتعب شوية مع الوكيل و الاستيراد و لكن هتلاقيها و ده بسبب قلة الانتشار

من رأيي الشخصي اني مينفعش اقارنها بالكورولا لأن الفرق كبير و واضح و لكن كورولا تفرق في الانتشار و توافرها كبودي و اكسسوارات عنها

ده رأيي الشخصي و تقيمي لها و لولا قصص الفتيس في العام الماضي كان زمانها عندنا في العائلة غير كده لا نقاش عنها في كل شيء و لما تتفرج هتصدقني لأنك هتنبهر بحاجات كتير و بتقفيل روعة و بجودة خامات و .....

و في النهاية اتمني انك تستخير ربك قبل اي شيء لأنه الموفق لما فيه الخير
و ربنا يوفقك لما يحبه و يرضاه

شكراً يا هندسة على المعلومات القيمة دي
ربنا يجعلها في ميزان حسناتك يارب

أنا مالك لكورولا 2006 وأعرفها جيداً

وبانتظار مشاركات أكثر إن أمكن

حضرتك ممكن ترجع للموضوع دة في التعرف علي الألتيا أكثر
http://www.nilemotors.net/Nile/34934...-2013-a.htmlط

وللتعرف علي باقي سيارات سيات يمكنك زيارة الرابط التالي
http://www.nilemotors.net/Nile/350212-2012-2013-a.html

تحياتي