الموضوع: بعد لف ودوران وجنون الاسعار قررت أظبط عربيتى ولا ابيعها

قررت أن لا ابيع عربيتي النترا 2005 اتوماتك حساسات تكييف تتش جراب نظاره مفتاح بالريموت لانها بجد الحمد لله عربيه مش متهانه ودواخلها وطابلوها بلمعة الفبريكه وراشه اجزاء نظافه من الخارج للخبطات المعروفه في بلدنا الحلوه وسواقين التوكتوك والميكروباص والموتوسيكلات ( الله يعلن اللي دخلها مصر بالطريقه دي الواحد بدل ما يشتري موبايل يشترى موتوسكل لابنه اللي هو في 1 او 2 اعدادي بالكتير )
فقررت اعمل بعض التعديلات والاكسسوارات واظبطها :
اولا:- بالنسبه للصوت
1- عاوز نوع وسعر كاسيت سي دي لا يزيد عن 1000 جنيه وفيه مدخل USB ويكون خرج صوته واضح ونضيف
2- عدد 2 سماعه مدور للرف ويكون البيز بتاعهم عالى والسعر حتــى 500 جنيه
3- عدد 2 سماعه للابواب ويكون صوتهم واضح ونضيف والسعر حتى 500 جنيه
وبكده يكون خلصنا الصوت وبلاش قصة الصب والبزوكا والجي ام يكفي سماعات حلوين
ثانيا:- بالنسبه للكاوتش والجنوط
1- عندي مقاس الجنط 15 عاوز نوع وسعر جنوط سبور نوع نضيف وبلاش الصيني مقاس 16 وده هايعلي العربيه عن الارض بمقدار 1.25 سم مع العلم ان العربيه اعلى من الفئه اللاحقه لها hd السعر حتي 3000 جنيه
2- نوع كاوتش يكون طري وصوته هادي ( سايلنت ) وياريت يكون بريدجستون او ميشلان الاسعار حتى 3500 جنيه
3- بشوف في السيارات اللي مركب جنوط سبور شكل الطنابير حمرا ودي تقريبا سبور فين بتتباع وسعرها كام وهل هيا افضل من العاديه وصناعتها ايه وذلك لتحسين آداء الفرامل (نقطه مهمه)
ثالثا :- بالنسبه للسياره من الداخل
1- تفصيل كسوه للكراسي ايه رايكم الافضل كلها جلد ولا جوانب جلد والوسط قماش نظرا للحر الشديد عندنا في الصيف
2- عمل ارضيه جلد و كنت عاوز اعمل عازل حراري اسفل الارضيه او عازل صوت مش عارف هما الاتنين واحد ولا بيختلفوا عن بعض وايه افضل الانواع
3- شفت في سياره النترا 2005 قبل كده مركب اكر داخليه نيكل وكمان وش هوايات التكييف نيكل ده الاقيه فين وسعره كام لان واحد بتاع اكسسوار قالى اجبهملك من القاهره وخايف يلعب معايا في السعر .
رابعا:- السياره من الخارج
1- فين الاقي اسبولر خلفى بتاعها وسعره كام جديد او استيراد
2- عندي الشنطه والسقف والكبوت فابريكه بس الالوان بهتت وفيه خرابيش واثار نقط بويه من واحد كان بيرش بالكونة بيته على خفيف ايه رايكم ان اعملهم مط ( اللزق اللي بيتحط على العربيه ) ولا ارش رشة نظافه وارش في التوكيل ولا بره وايه افضل انواع البويه
خامسا :-الموتور والاجزاء الكهربائيه
1- سمعت عن شمعات البوجيه البلاتيني هل هيا فعلا تحتاج للتجربه وسعرها كام وبتتباع فين وكمان سمعت عن اسلاك بوجيه سبور اسعارها ايه وفين بتتباع وافضل الانواع والصناعه ايه ( بلاش الصيني )
2- عاوز اغير فوانيس الشبوره الاماميه بنوع يكون زينون او لمبات بيضاء ايه اخبار الاسعار والانواع
3- مركب زينون في النور الواطي وكنت عاوز نوع لمبات لونها ابيض تركب على العالي بدون زينون تقريبا هي H7 OR H1 مش فاكر بصراحه ايه افضل الانواع والاسعار وياريت بلاش الصيني .
3- عندي وش الكبوت مش متقفل من الداخل كنت عاوز اركبله لباد حراري عازل للصوت اين يباع وايه اخبار الاسعار والانواع .

آسف للاطاله ياريت التعاون وإبداء الرأي والنصيحه ولكم جزيل الشكر .
لو افتكرت حاجه تانيه ان شاء الله اقلكم عليها لاني عارف مش هاتبخلوا عليا في الرد

المشاركة الأصلية كتبت بواسطة algazar2

الكاسيت البايونير بالمبلغ ده هيكون كاسيت عالى و فيه بلوتوث كمان
كويس انك فكرتي بموضوع البلوتوث لاني كنت ناسي الموضوع ده
بالنسبه للفرامل بقى

فى تعديلات كتيره ليها اسهلهم ان انت تجيب تيل و طنابير ادائهم رياضى يعنى مع السخونيه الزياده و التحميل عليهم يوقفوا العربيه برضوا مش التيل يسخن ميقفش فى الطنابير
الحاجات دى طبعا بتتجاب من بره من الشركات المصنعه للعربيه بتاعتك فقط هيكلفوك حوالى 1500 عشان الشحن و الجمارك و ممكن اكتر - فى توكيل هايفتح لمنتجات ebc البريطانية فى مصر هتبقى الحاجات فيه ارخص من كده شويه - ممكن تسأل غزالى عليه هو عنده معلومات
ياريت الاستاذ / غزالى يفيدنا في الموضوع ده لاني معرفهوش شخصيا نداء عاجل

فى حاجات تانية منها مثلا ان انت تشوف عربيتك بره مثلا لو بتنزل 2000 سى سى او 2500 هتلاقى الفرامل مختلفه فهاتجيبلها جناب فرامل استيراد ( الحركة دى بتتعمل فى الدايو بسهوله جدا ورا و قدام و تكلفتها مش عاليه ) مش عارف ايه ظروف الهيونداى فى الموضوع ده
هو في منها 1800 و 2000 سي سي بينزل بره وممكن اسأل عليهم استيراد بس هنا بحتاج اخد الطنابير والتيل بس ولا معاهم الماستر و وصلاته كمان
ممكن تجيب بقى كاليبرات بريمبو بس تكلفتهم هاتتبقى معديه ال 4 او 5 الاف طبعا تكلفه كبيره جدا عشان تعدل اداء فرامل لعربيه مدينه مبتدخلش سباقات
فعلا دي هاتبقى مكلفه جدا وعلى رأيك سياره مدنيه

الاسلاك اسبليت فاير تكلفتها كانت ب 450 مش عارف دلوقتى ايه نظامها الموبينه مش عارف بالظبط
بس انت هاتزود شرارة احتراق المفروض معاها تغير رشاشات و طرمبه بنزين و فلتر هوا عشان تزود كميه الهوا و الوقود الى بتتحرق و تغير الشكمان بواحد اكبر كهيدر و مفيهوش علب كتير فى النص عشان تزود كفاءه اخراج العادم طبعا تكلفه عاليه برضه و هتزود استهلاك البنزين بطريقة عاليه و الاسهل منها ان انت تسقط ماتور 2000 سى سى استيراد الى بتنزل بيه العربيه بره على نفس القواعد لمعلومات اكتر ممكن تسأل محمد ممدوح استشارى قسم الدايو
كده على رأيك هادخل في حوار جامد
طيب هو مش ممكن ان اجيب شمعات بلاتنيوم او اورديوم بس على اساس بيحسنوا استجابة الاحتراق من غير الحوار بتاع الاسلاك والموبينه .

شاكر لتعاونك جدا استاذ/ الجزار ومنتظر منك المزيد