الموضوع: I Wonder Why Would Some People Still Get To Buy Hyundais

المشاركة الأصلية كتبت بواسطة mhkorayem

حضرتك بتقول ان هيونداي فقدت ميزه انخفاض السعر وده مش صحيح
وهنقارن بالهوندا بحكم ان حضرتك من مالكي الهوندا

الالنترا الاوتوماتيك اول فئة 145000
السيفيك الاوتوماتيك اول فئه 187000
يعني 42000 جنيه فرق

الالنترا الاوتوماتيك اعلى فئه 163000
السيفيك الاوتوماتيك اعلى فئه 206000
يعني 43000 جنيه فرق

اعتقد ان الفرق ده كبير اوي بين عربيتين من نفس الفئه
ف ((حتى)) لو كانت الهوندا افضل في بعض النواحي فكله بتمنه زي ما بيقولوا ومش كل الناس عندها المقدره تزود الفرق ده عشان تجيب الهوندا
عشان كده مازالت السيارات الكورية هي الاكتر مبيعاً في مصر

حضرتك اكيد بتهزر

ياباشا دلوقتى اول فئة النترا اتوماتيك فاضية ب152 الف جنية

واعلى فئة اللى هية ال fully loaded ب180 الف جنية , حضرتك ممكن تسأل فى اى معرض

المشاركة الأصلية كتبت بواسطة Samir Elshahawy

فيه خصم ياسامح حاليا 5,000 جنيه و أحتمال الخصم ده يستمر أو يزيد كمان لأن زي ما أنت عارف مبيعات السيارات تأثرت بعد زيادة الاسعار بحجة زيادة الدولار

و عموما فرصة برضه أني أقول لك حاجة مهمة أوي لواحد زي حالاتي لو بيفكر يشتري عربية زيرو و الفلوس مش مساعداه و ده معظم اللي راكبين عربيات علي فكرة :
- أول حاجة هأفكر فعلا في الهوندا (لأنها فعلا عربية جديرة بالاحترام) لكن أول فئة في السيفيك بكام : 187,000 جنيه
- طيب الالنترا الفولي لودد (صحيح ممكن ماتكونش زي السيفيك) و لكن هاتتفوق في الشكل و الكماليات بكام : (من 175,000 الي 180,000)

يعني فرق من 7,000 جنيه الي 12,000 جنيه و ده برضه فرق مش هين

عارف هاتقولي الثبات و الموتور و السرعة و التسارع و الادرينالين
هأقول لك أنا مش بتاع الكلام ده وواحد سواقته عادية و السرعة بالنسبة له لاتمثل شئ , و لو فرضنا عايز سرعة و شد يبقي ممكن أجيب الألنترا gdi بس طبعا بره التوكيل لو أنا مصمم علي ماركة هيونداي يعني

ده اللي المفروض نفكر فيه كمنتدي أننا ندرس سيكولوجية الشعب المصري في المفاضلة مابين السيارات



أحنا هنا ناس فاهمة يعني ايه مواتير و ثبات و سرعات و دريفتات و ادرينالين
و بنقارن علي الاساس ده و بنصنف العربيات تبعا للقواعد دي
لكن المستهلك العادي مايعرفش الكلام ده ياعم سامح كل اللي يهمه :
- هايدفع كام
- ها يأخد ايه - قطع الغيار و أنتشار مراكز الخدمة
- الشكل و الكماليات
- و لو حب يبيع هايخسر و لا لأ

و لا أنت ايه رأيك ؟
عموما أنا باوجه لك و لكل المشاركين بالموضوع دعوة خاصة لحضور مقابلة هيونداي أول الشهر و ممكن نتكلم و نتناقش بهدوء و نسمع بعض و نسمع وجهات نظر كل طرف

http://www.nilemotors.net/Nile/350842-a.html

ياباشا انا معاك فى كل اللى بتقولة

طيب بس انت بتقول ان الالنترا الفولى لودد ب180 الف جنية وعليها عرض ب175 الف جنية ماشى

والسيفيك اول فئة ب187 الف جنية , تمام

نيجى بقى للفرق الاهم ( السيفيك فيها الاتى زيادة فى مواصفات الامان ( ebd - vsa - bas )
طيب دول موجودين فى الفئة الاولى للسيفيك كأنظمة امان اساسية , وانت بتتكلم عن الالنترا الاعلى فئة ومافيش فيها الحاجات دية طيب ماطبيعى السيفيك لازم تبقى اغلى منها

لان الشركة بتوفرلك كل انظمة الحماية وحتى نظام الفرامل والثبات كمواصفات اساسية وبتلعب على الاوبشن الترفيهيى فى انها تحدد الفئات ( والشركة اللى تعمل كدة يبقى انا احترمها جدااااااا) , ولو عايز اوبشن اعلى هات الفئة الاعلى بس بدون مساس بأنظمة الامان .

بعكس الكورى اللى بيحط كل حاجة تحت بند ( optional ) تلاقية بيخيرك مابين فتحة السقف وال abs , ازاى يعنى مش فاهم , وانت عايز الاتنين تعمل اية هتروح مضطر انك تجيب فئة اعلى وتوصل لمبلغ 166 الف جنية والعربية مافيش immoblaizer يخليك حتى نايم مطمن على العربية اللى جيبتها مبلغ كبير زى دة والاوبشن دة اختيارى فى اعلى فئة بس ( طيب ازاى )

انا عن نفسى لو هدفع فى عربية مبلغ فوق ال120 الف جنية يبقى من اهم متطلباتى فى العربية

( abs-ebd- 2 airbag - immoblaizer ) دول شىء اساسى فى العربية ان شاء الله حتى اجيبها مستعملة

لكن معلش الشعب المصرى قبل مابيفكر فى العربية بيشوف سوقها عامل اية لو حب يبيع هيخسر كااااااااام , هو انت جايب عربية عشان تبيعها ولا عشان تركبها وتستمتع بيها ؟؟؟؟

والسياسة دية هية اللى مودية الشعب فى داهية ومخليا ثقافتة بالطريقة دية , لانة فعلا مموت عربيات كتيييييييير تستحق ماكنة ممتازة داخل السوق المصرى زى ماهية واخدة افضل سيارات فى الخارج

بجد بشوف عربيات تستاهل اكتر من كدة بكتيييييييير وفى الاخر بتتباع بتمن زهيد جداا يمكن اقل من نصف تمنها فى خلال مدة قصيرة جدااا وكمان بتتباع بالعافية

ده اللي المفروض نفكر فيه كمنتدي أننا ندرس سيكولوجية الشعب المصري في المفاضلة مابين السيارات

ماهو ياباشا احنا الجيل اللى طالع , المفروض نغير المفهوم اللى اتعودنا علية خلاص

يعنى هقولك مثال : والدى مثلا لو جية وركب معايا فى يوم بيقولى يابنى العربية واطية اوى , يركب عربية تانية حتى لو عادية اول حاجة يقولهالى انها عالية عن الارض , لكن هو بقى يشوف بقى المميزات التانية اللى فى العربية لأ هو بص لكدة خلاص , لية لانة اتعود على كدة

لكن احنا اللى هنعلم اولادنا اللى اتربينا علية فلازم نعلمهم صح مش اعلمة انك تجيب عربية لما تكبر تشوف هتبيعها بكام وتخسر فيها كام , لأ اعلمة يدور علية اية يختبر السيارة ازاى اية اللى يهمة فيها , لو كل واحد فينا عمل كدة وجهة النظر دية هتختلف تماما , والشعب دة هيرتقى بجد ويسيبة بقى من المعتقدات اللى ولا بتودى ولا بتجيب وتلاقى واحد لسة جايب العربية وفرحان عشان فضل الشكل عن الامان , ولا قدر الله يخبط فى عربية بسبب ضعف الفرامل او زحلقة الفرامل والعربية وشها يروح وساعتها لو باع ( هيخسر فيها ) مش دة اللى بيحصل

وللحديث بقية عشان ماطولش عليك

وياريت ياباشا تشوفوا منطقة غير الرحاب , انتوا مش كنتوا بتعملوا مقابلات هيونداى عند الحديقة الدولية تقريبا