أبيع عربيتي بالسعر دا ولا لأ

**p r i n c e** · 19-04-2013 03:39 AM

السلام عليكم يا رجالة
صديق ليا عايز يشتري عربيتي فيرنا 2010 مانيوال full option
العربية راشة برا كلها و كان في خبطة من قدام غيرت اكصدام و رادياتير و سربنتينة تكييف بس غيرتهم ف التوكيل و العربية الحمدلله رجعت زيرو زي ما كانت و مفيش أي حاجة ف العربية إتأثرت
العربية ماشية 17 ألف كيلو و نص
صاحبي عارف الخبطة و كان معايا و انا بصلحها و عارف انها خبطة بسيطة و مأثرتش على العربية
انا كنت عارضها للبيع ب 62 لقيت صاحبي جي يقولي عاوز يشتريها
لو انتو مكاني يا رجالة تبيعوها ولا لأ
انا شايف ان السعر كويس بس العربية دي مريحاني جدا و بحالة الزيرو ومش بصرف عليها اكتر من بنزين و زيت، خايف ابيعها ملاقيش حاجة مستعملة نضيفة و الجديد أسعاره بقت مولعة
تنصحوني ب إيه يا رجالة

**hussein** · 19-04-2013 11:54 AM

مادام مريحاك متبعش
و17.5 الف يعنى مامشيتش لسه
مش قبل سنتين تلاتة و بعد كده تفكر تبيع
وفى الاخر برضه استخير

**Land_Cruiser** · 19-04-2013 12:05 PM

انا بصراحه لا افضل موضوع البيع للاقارب او الاصدقاء ده خالص لان الموضوع بيبقي فيه نوع من الأحراج ليك بالنسبه للسعر و كمان لو حصل فيها اي حاجه ملهاش علاقه بالحادثه اللي في العربيه هيقولك العربيه البايظه اللي بعتهالي او عايز ارجعهالك تاني . و عليه ايه وجع الدماغ عربيه حضرتك سهله في البيع لو حبيت تبيعها و حط السعر اللي يعجبك و شوف هتجيبه و لا لأ و مفيش داعي للاستعجال طالما العربيه مش مضايقاك في حاجه علشان تعرف تبيعها بسعر كويس و لو مجبتش سعر حلو يبقي ما تبيعش و استخدمها دي لسه بحالتها خساره

**MaZaGAngeE** · 19-04-2013 02:35 PM

الوقت مش مناسب حاليا للتغيير
استنى لما الدولار ينزل شوية كمان

**aboomar22** · 19-04-2013 02:47 PM

المشاركة الأصلية كتبت بواسطة land_cruiser

انا بصراحه لا افضل موضوع البيع للاقارب او الاصدقاء ده خالص لان الموضوع بيبقي فيه نوع من الأحراج ليك بالنسبه للسعر و كمان لو حصل فيها اي حاجه ملهاش علاقه بالحادثه اللي في العربيه هيقولك العربيه البايظه اللي بعتهالي او عايز ارجعهالك تاني . و عليه ايه وجع الدماغ عربيه حضرتك سهله في البيع لو حبيت تبيعها و حط السعر اللي يعجبك و شوف هتجيبه و لا لأ و مفيش داعي للاستعجال طالما العربيه مش مضايقاك في حاجه علشان تعرف تبيعها بسعر كويس و لو مجبتش سعر حلو يبقي ما تبيعش و استخدمها دي لسه بحالتها خساره

كلامك 100 % واحد صاحبى فى الشغل اشترى من سيارة زميل تانى وبصراحة البائع عمل معاه الواجب وزيادة وكان رافض يبيع لحد يعرفة لولا انه وسطنى اكلمة واضغط علية والسيارة كانت عاملة 42 الف كليو وكل صيانتها بالتوكيل وللاسف وللحظ العربية حصل مشكلة فى الفتيس بقى كل كلامة العربية البايظة اللى ادهالى دى عربية مشنشة مع انها فابريكة بالكااااامل .صحيح بلاش تبيع لحد تعرفه

**kar!m** · 19-04-2013 02:47 PM

لو مش تعباك في حاجه اوعى تبيعها .. العربيات غالية و الفيرنا عربية سحبها كويس و تكييفها كويس و عملية و في أي وقت هتفكر تبيعها هتتباع بسهوله ان شاء الله.