السلام عليكم ورحمة الله وبركاته

أنا كنت بدور على عربية في حدود 130 ألف مثلًا، لو حاجة مستعملة يفضل إنها تكون جديدة نسبيًا (بعد 2008)، بفضل الأوروبي (وممكن الياباني) بشكل عام، خاصًة الhatchback، لكن باب الإقتراحات مفتوح.

الاستخدام حيكون شخصي بشكل عام، بالتالي مش محتاج حاجة كبيرة بالضرورة، بس محتاج حاجة تكون شبابية نوعًا ما، ويكون ثباتها كويس (بمعنى إن سواقتها تكون ممتعة).
عوامل الأمان زي الABS والEBD أساسية بالنسبة لي، وده سبب استبعاد حاجات كتير من الكوري.

بعض الحاجات اللي فكرت فيها:

  • Volkswagen Golf 6 1.6 (مستعملة): مش متأكد لو حقدر ألاقيها في حدود الميزانية دي.

  • Ford Fiesta 2011~2012 (مستعملة): نادرة شوية، معنديش فكرة إيه نظام التوكيل بتاعها.

  • Toyota Yaris 2013 (جديدة): كمالياتها كويسة جدًا، وأعتقد إنها حتكون اعتمادية، لكن في أحسن الأحوال معتقدش إنها حتكون أحسن من الأوروبي بشكل عام.

  • Audi A3 2008 (مستعملة): نادرة شويتين، معنديش فكرة إيه نظام التوكيل بتاعها، حتكون عاملة كيلومترات كتير شوية، لكن في النهاية Audi.


بعض الحاجات المستبعدة بالنسبة لي:

  • Fiat Punto 2013 (جديدة): أعتقد موتورها ضعيف نسبيًا، حتى بالمقارنة بحاجات تانية في نفس فئتها.

  • Nissan Tiida 2013 (جديدة): شكلها مش بيعجبني، حتى الfacelift اللي لسه حينزل السنة الجاية مش داخل دماغي أوي، وثباتها معنديش فكرة إيه نظامه.


مستني إقتراحاتكم، وآسف على الإطالة.