مشكله عدم دواره فى السوبر صالون و الحل السحرى الغريب

السلام عليكم و رحمه الله و بركاته
اهلا بأحلى شباب و يا رب تكونوا بخير دايما
حصل موقف غريب جدا مع عربيه والدى نيسان سوبر صالون 2008
والدى كان فى مشوار عادى جدا و بعد ما رجع البيت مفيش نصف ساعه و نازل تانى بالعربيه بيدورها ما بتلقطش خالص كلمنى فى التليفون علشان انا كنت فى الشغل المهم قلتله يجرب وصله من بطاريه عربيه تانيه و فعلا جرب وصله من عربيه اخويا و مفيش اى نتيجه
فراح جاب كهربائى عند البيت بص و مكنش لاقى حاجه راح مدور العربيه بسلكه خارجيه تقريبا علشان يروحوا بيها الورشه بتاعته و يشوفوا المارش علشان هو كان الاحتمال الاقوى
لما وصلوا الورشه جرب المارش لقاه شغال و عطل الكهربائى ما كنش عارف يتصرف مش لاقى حاجه بس كان شاكك ان الانذار ليه علاقه بالموضوع فسأل والدى عن هل الانذار متوصل بالمارش و يكون علق او حاجه
راح والدى متصل بيا و بيقولى على سؤال الكهربائى و انه مش لاقى حاجه و شاكك فى الانذار
انا الانذار كنت مركبه عند واحد كهربائى شاطر اوى فى الزقازيق فكلمته عن الموضوع لسه بقوله العربيه مش راضيه تدور فجأه بدون مقدمات راح من نفسه قايل الآتى :
اقفل السنتر بتاع العربيه بالمفتاح و بعدين افتح بالمفتاح العربيه هتدور معاك على طول
الصراحه اندهشت جدا و ما كنتش متوقع الرد بس انا متأكد انه كهربائى شاطر جدا فرحت قافل معاه و كلمت والدى علشان يقفل و يفتح السنتر بالمفتاح و قد كان
العربيه دارت الحمد لله ربنا ستر الكهربائى اللى والدى راحله كان لسه هيفتكس فى العربيه و اسلاك و حوارات بس جت بسيطه الحمد لله
الحل العلمى للموضوع مش فاهمه اوى و انا ما حكيتش مع الكهربائى بتاعى علشان فى التليفون بس اللى فهمته منه انه بيعمل زى ريسيت لكارته فى العربيه بالموضوع ده
انا قلت انقل الموضوع للافاده و يا ريت ما كنش طولت عليكم

لو كان والد حضرتك قفل العربيه بالريموت مثلا و بعد كده فتحها بمفتاح و مكنش معاه الريموت ساعه لما فتحها يحصل كده فعلا و ده من انذار العربيه اللي جي معاها اللي مرسوم علامته علي الزجاج و ده نوع من الامان للعربيه يغطي حاله لو حد طلع علي مفتاح العربيه و فتحها بيه - و خاصه ان مفتاحها عادي مش مشفر - و صاحب العربيه كان قافلها بالريموت العربيه ما تدورش معاه و الفكره دي تطورت بعد كده و بقوا يعملوها بأسلوب تاني عن طريق المفتاح المشفر اللي فيها بقي تأمين العربيه بأنها ما تدورش إلا بمفتاحها الاصلي فقط . بالمناسبه في اكتر من طريقه تانيه تقدر تشغل بيها العربيه غير القفل و الفتح عن طريق الريموت لكن لا مجال لذكرها هنا علشان ده يتعلق بأمان العربيه و ربنا يكفينا شر الحراميه فباختصار يعني اللي قفلت به العربيه هو اللي تفتح به بعد كده سواء كان المفتاح او الريموت علشان العربيه ما تحسش ان في حاجه مريبه بتحصل زي محاوله سرقه بمفتاح مصطنع فتفصل الكهربا زي ما حصل

شكل ال nats طلع جد ولا ايييييييه يا جدعان هههههههههه

عموما هو موقف رخم بس الحمد لله اتحل ..