بركات القانون الجديد (نصيحة مهمة جدااااا لكل الأعضاء)
الحمد لله رجعت لأرض الوطن بعد غياب 5 أيام غربة في دولة شرم الشيخ الشقيقة (فعلا دولة داخل الدولة) في رحلة عمل على أجازة.
المهم بدون الدخول في تفاصيل اليوم اللي قررت أخرج فيه أروح البحر الصبح بدري كان الساعة 9 الصبح وكان بيبقى فيه دائما لجنة للمرور في الإتجاهين عند مدخل خليج نعمة بس لجنة من اللجان السوبر رخمة:) لأنهم بيدققوا على كل حاجة (رخص وأمن ومتانة وطفاية وجزام وأنوار وكل ماتتخيله).المهم كنت بعدي عليهم كل يوم ومكنش بيحصل حاجة لحد اليوم المشؤم ده الضابط وقفني شخصيا وشاف الرخص وبعدين العسكري لف حوالين العربية ورجع قاله النمر ياباشا فالضابط قالي إركن وفعلا ركنت وتزلت قالي النمر عندك مش واضحة وهنسحب الرخص المهم كان معايا إبن خالي ضابط نزل عرفه بنفسه فالضابط قاله معلش أنا مش هقدر أعمل حاجة علشان مدير الأمن شخصيا هو اللي واقف في اللجنة وشاور عليه.المهم من هنا لهنا الضابط قالنا ليكم 3 أيام ممكن تعمل فيهم تصالح وتدفع الغرامة وتاخد الرخص يا إما بعد كده هتترحل الرخص لإدارة المرور التابع ليها وتدفع الغرامة مضاعفة.وطبعا علشان يجامل إبن خالتي قاله مدير الأمن ماشي الساعة واحدة تعلالي الإدارة ونعمل مصالحة وتمشوا.وفعلا العسكري كتب الوصل وخدناه ومشينا.
المهم وده أهم نقطة في الموضوع لما أخد الوصل ببص فيه ومكتوب إسم الضابط (نقيب ...........) وسبب سحب الرخصة طمس لوحات.
المهم رحنا الساعة واحدة المرور ودخلت أنا الأول بسأل على إسم النقيب لقيت كل العساكر بصولي بإستغراب وقالولي مفيش حد بالإسم ده هنا.قولتلهم إزاي طيب الوصل ده بتاع مين؟؟المهم قالولي النقيب ده كان هنا فعلا من 3 سنين وإتنقل نويبع!!!!!!!!!!!تخيلوا الصدمة اللي كنت فيها.طبعا أول حاجة جت في بالي إن الرخص كده ضاعت خلاص:) المهم كلمت إبن خالي جه دخل للضابط الموجود وحكاله الموضوع فالضابط قاله فعلا مفيش حد بالإسم ده هنا.والمفاجئة التانية كمان إن العسكري كتب سبب المخالفة طمس لوحات وديه ملهاش تصالح أبدا ولازم تفخص العربية من أول وجديد وكان المقروض إنه يكتب عدم وضوح لوحات مش طمس.
المهم من هنا لهنا الضابط عدل الوصل وكتب عدم وضوح لوحات وكمان عرفنا إسم الضابط اللي سحب الرخصة والحمد لله خدنا الرخص ومشينا وطبعا الكلام ده كان على الساعة 3 ولا حاجة.
شوفتوا المسخرة اللي إحنا فيها.بيخلوا عسكري يكتب المخالفات وهو أصلا ميعرفش حتى إسم الضابط اللي شغال معاه وكمان كاتب مخالفة تخليني ألف كعب داير علشان أرجع الرخص.
أنا مش لاقي أي حاجة أقولها غير حسبي الله ونعم الوكيل.
نصيحة لو حد لا قدر الله إتسحبت رخصته يبقى بتأكد من إسم الظابط والمخالفة حتى لو الظابط هو اللي كاتب الوصل.