في حلقة من حلقات الإسبوع اللي فات للعاشرة مساء .. كانوا جايبين أحداث خناقة أو مجزرة في شارع سكني بالعمرانية بين ناس سكان عاديين جداَ مدنيين ..

واد صغير إشتري بإتنين جنيه جبنة رجع للراجل قاله دي بايظة غيرها .. الراجل قاله مش هغيرها طالما فتحتها .. الواد راح جاب أبوه .. أبوه و البقال مسكوا في بعض .. قام أبو الواد راح جايب جيش كامل محمل بإزايز البيبسي و المطاوي و السنج و كسروا المحل .. قام البقال متصل بقرايبه .. و أثناء الخناقة أتي بعض المتعاركين برشاشات ألية (!!!!!!!!!!!!!!!!!!!!!!!!!!!!) و قتلوا إتنين و أصابوا 6 !!!!!

رحت أزور واحد صاحبي ساكن في منطقة مطار إمبابة .. لقيت فيه قلق في المكان .. سألته هوا فيه إيه .. قاللي أصل واحد إتقتل و لقوه مرمي عالسكة الحديد!!

راجع مع والدي من مشوار .. ببص من شباك العربية علي زحمة في الشارع .. لقيت سنج و مطاوي و دم !! و ناس سايحة في دمها بس لسة بتتخانق !!

ماشي بالعربية إنهاردة و ببص جنبي لقيت إتنين راكبين تك تك و مكتفين واحد !! مكتفينه رابطينه من ايديه و رجليه ! و مش متداريين حتي .. في تك تك !!

إحنا فين يا جدعان !!! ب 2 جنيه جبنة تقلب خناقة بالرشاشات الألية !؟ و في شارع مدني عادي ؟! طب الناس بتجيب السلاح منين ؟! ده مش طبنجة حتي ده رشـــــــــاش !! و الأسلحة البيضاء !؟ انا مفيش خناقة إلا و الاقي من مكان ما طلع سنجة ولا سيف !!! و إزاي واحد يموت عشان حبة جبنة .. انا بشوف خناقات دموية بمعني الكلمة علي أسباب لو قلنا عليها تافهة نبقي بنظلمها !

فاصل كوميدي : قامت كاميرا العاشرة مساءَ بحوار مع سكان الشارع الذي جرت به المجزرة .. فكان معظم تعليقات الناس علي "جودة" الجبنة التي يبيعها صاحب البقالة و إنهم زباين عنده من 18 سنة و ده راجل بيصلي و يعرف ربنا و أكيد التانيين هما اللي كدابين و بوظوا الجبنة .