مشكلة عويصة لانسر 1600 اتوماتيك 2008

أهلاً بيكم يا شباب،،،

عندي سيارة لانسر 1600 اتوماتيك موديل 2008، دايما مش كان بيعجبني سحب المحرك، وبالأخص بعد تشغيل المكيف والأغرب إنك لما تزيد من سرعة السيارة فجأة تشعر بصوت المحرك وكأنه داخل مقصورة القيادة، استغربت شوية وقلت لعل كده الطبيعي،،،

لكن لما قمت بقيادة سيارة صني موديل 2005 وبرضه 1600 اكتشفت اختلاف قوي في المكيف وفي قوة المحرك على الرغم إن الاثنين 1600، والأغرب برضه إن المكيف في الصني ما شاء الله لا يقارن بالانسر إطلاقًا رقم واحد في صني يوازي 3 في اللانسر موديل 2008 يعني وكالة ولسه جديدة،،،

والسؤال هنا تحديدًا هل هذه المشاكل توجد في جميع سيارات اللانسر أم أنه يوجد عيب في سيارتي تحديدًا،،،

لا مش مشكله خالص عادى

دانتا باين عليك شايل قوي من اللانسر،،،

كأنك بتقول دا جزات اللي يشتري لانسر،،،

هههههههههههههههههههههههه

لا والله انا مش عندى لانسر خالص بس ركبت بتاعه واحد صحبى 2007 فول اوبشن اوتوماتيك ر كبتها شهريين علشان كان مسافر و ركنها عندى و لاحظت اللى حضرتك بتقول عليه ده مع العلم انى معايا فير نا 2008 مانيوال بصراحه حسيت ان الفيرنا تطلع منه على طول فى معظم الغيارات بس على الطريق الانسر تكسب بالثلث من حيث الثبات و التجميع بعد ذللك

حضرتك ذكرت مشكلتين

الأولى خاصة بضعف التكييف والثانية بسحب العربية

بخصوص ضعف التكييف فده حله بسيط جدا وهو ان فلتر التكييف عاوز تنظيف وممكن حضرتك تعمله بنفسك زي اخونا العزيز الاستاذ اسلام شاهين ما شرح في الموضوع ده

http://www.nilemotors.net/Nile/showthread.php?t=3274

أما بخصوص سحب العربية فالمفروض ان العربية بمحرك 1600 يكون سحبها كويس جدا وبالتالي ربما العربية محتاجة صيانة - حضرتك موضحتش العربية عاملة كام كيلو وهل عملت الصيانات الدورية لها قبل كده ولا لأ (صيانة الألف والعشرة والعشرين)

كلام استاذ طارق زى الفل و اسف على التدخل بدون معرفه عدد الكيلو متر

اقتباس:

---

المشاركة الأصلية كتبت بواسطة مصراوي جدا

حضرتك ذكرت مشكلتين

الأولى خاصة بضعف التكييف والثانية بسحب العربية

بخصوص ضعف التكييف فده حله بسيط جدا وهو ان فلتر التكييف عاوز تنظيف وممكن حضرتك تعمله بنفسك زي اخونا العزيز الاستاذ اسلام شاهين ما شرح في الموضوع ده

http://www.nilemotors.net/Nile/showthread.php?t=3274

أما بخصوص سحب العربية فالمفروض ان العربية بمحرك 1600 يكون سحبها كويس جدا وبالتالي ربما العربية محتاجة صيانة - حضرتك موضحتش العربية عاملة كام كيلو وهل عملت الصيانات الدورية لها قبل كده ولا لأ (صيانة الألف والعشرة والعشرين)

---

أهلاً بيك مهندس طارق،،،

الصراحة أنت رجل المهمات الصعبة،،،

بالنسبة للمكيف فالسيارة جديدة وكالة أنا اشتريتها من شهر 11 اللي فات ومن ساعة ما أخدتها وهي كده وكأن الهواء ضعيف ومش بقوة باقي السيارات وبالأخص الصني،،،

بالنسبة لعدد الكيلومترات فالسيارة موديل 2008 وماشي بالضبط 24 ألف وعملت لها صيانة الألف والخمسة والعشرة والخمسة عشرة والعشرين في الوكالة،،،

ومع ذلك تبقى نفس المشكلة،،،

أقولك على حاجة تضحك أنا في مرة قرصت عليها عشان أشوفها هتعمل إيه الصراحة وقفت بسرعة بعد ما صعب عليه المحرك وصوته اتنبح والله لولا الملامة كنت طبطبت عليه الصراحة يا باشمهندس طارق صوت المحرك غير طبيعي - كأنه على قاعد على المقعد اللي جانبي،،،

ارجو أن تقبل مزاحي، وليس سخرية من السيارة أو أحد والله،،،

لو قصدك على الفتحات الوسطانية إللي هواها ضعيف فدا طبيعي في اللانسر (راجع هذا الموضوع)
وبالنسبة لصوت المتور برضه طبيعي ولاحظته في كل اللانسرات إللي ركبتها ولذلك لضعف العوازل

بس على فكرة تسارع العربية حلو

على فكرة حضرتك أول واحد أشوفه يشتكي من تسارع اللانسر

يعني ناس تشتكي من الفرامل ماشي

الدريكسيون تقيل تمشي

الثبات مش أوي نعديها

لكن انها مش سريعة ده اللي مستحيل

أكيد حضرتك عندك مشكلة

ده فيديو من 0-100 في 11 ثانية بالضبط لانسر 1.6 أوتو

http://www.2shared.com/file/3177904/f617ed20/A004.html





المانيوال في 10 ثواني

أهلا بحضرتك يا أبو عبد الرحمن


أولا كون ان التكييف كان ضعيف من اول لما شريتها فده لا يمنع برضه ان السبب هو الفلتر وباذن الله أول لما يتنضف هتحس بفرق كبير


بس عندي سؤال - هو ازاي العربية وكالة يعني من الوكيل وحضرتك عملت صيانات 1000 - 5000 - 10000 - 15000 - 20000


أحنا في التوكيل (شركة مصرية) بنعمل فقط 1000 ثم العشرات أما الخمسات دي فمراكز صيانة الخليجي هي اللي بتعملها - فحضرتك بتعمل الصيانة فين ؟


أخيرا لو تحب حضرتك تشرفنا في مركز الخدمة الرئيسي في قليوب ويطلع معاك مهندس الاستقبال يجرب العربية وساعتها يقول هل سحبها وصوتها طبيعي زي باقي العربيات ولا عربيتك بالذات فيها مشكلة معينة - فيا ريت تشرفنا في أي وقت وبدون حجز بس يا ريت الصبح بدري شوية

بالنسبه لموضوع التكيف
احتمال كبير يكون الفلتر عايز يتنظف لانك بتقول الهواء ضعيف
بالنسبه لموضوع السحب
فممكن يكون حاجه من الحاجات ده
1-شواقتك هاديه والrbm مبعديش ال 2 واو بيعدى بحاجه بسيطه فالفتيس اتعود على كده بتالى بيديك تسارع قليل
حاول مره كده تعلى بالrbm سنه سنه لحد ما توصل ل 4 rbm قول ثلاث مرات وراء بعض
لحد ما الفتيس بتعود على سواقتك
اما
2-واحد صاحبى معاه لانسر 1600 اوتوماتيك بيقولى ان العربيات الانسر كلها بتحتاج منظف دوره وقود كل 20 الف كم
اما
3-ممكن تكون انت سوقت عربيه سحبها احسن من الانسر فعلشان كده حاسس ان الانسر سحبها ضعيف

بالنسبه لمشكله التكييف انا معايا 2005 1600 تكييفها ممتاز ومقارنتا بالصنى 2003وحتى قريب جدا بتكييف المازدا ايرو 2007 بحس انه نفس التكييف اللى هنا هو اللى هنا ماعدا مشكله اندفاع الهواء من الفتحات الوسطانيه ولما ركبت عربيه صحبى لانسر سبورت 2008 خليجى لقيت التكييف ضعيف جدا ولا تكييف صينى ولسه لم يحل هذه المشكله .بحس ان تكييف 2005 و 2006 افضل من حيث قله عدد المشتكيين منه عن 2007 و 2008 ومن حيث القوة والكفاءه .يعنى انا لما ركبت الالنترا الشكل القديم والكورسا 2005 حسيت ان التكييف فى هذه العربيات على اعلى سرعه (4) نفس قوه التكييف عندى على سرعه 2

على فكره موتور الانسر موتور رياضى (بس فيه ناس كتير مش فاهمه يعنى ايه موتور رياضى) و اى حد سواقته هاديه هيحس ان الموتور ضعيف.....
ممكن بقه اشرحلكم الفرق بين موتور رياضى و موتور عادى.؟؟؟؟!
اللعبه كلها فى الRPM فلازم نفهم الاول الموتور شغال ازاى؟؟؟؟؟!
انا هبتدى من الاول خالص عشان اللى معندوش فكره يفهم.............

انا هحاول ابسط الموضوع قوى.......

فيه بستم بيطلع و ينزل مربوط فى عمود الكرنك بحيث البساتم و هى طالعه و نازله بتبقى شبه واحد بيبدل برجليه على بدال بسكلته..............

البستم ده ليه اربع اشواط مختلفه (يعنى فى كل طالعه أو نازله من الاربع حركات دول بيعمل مهمه مختلفه عن التانيه و بعد الاربع مهمات دول ما يخلصو يرجع يكررهم تانى) و فى الموتور ال4 سلندر فيه اربع بساتم بيطلعوا و ينزلوا و كل واحد بيعمل حاجه من الاربع مهمات دول غير التانى بحيث الاربع مهمات دول بيكونوا بيتنفذوا فى نفس الوقت بس كل مهمه فى بستم من الاربعه و دايما فيه شوط من الاربع اشواط دول بنسميه الشوط الفعال و ده الشوط اللى بيتم فيه الحريق و البستم اللى بيكون عليه الدور فى الحريق بيعتبر هو ده البستم اللى ممشى العربيه فى اللحظه ده و الثلاثه التانيين فى الثلاث انواع من المهمات التانيه المختلفه اللى بنعتبرها مهمات تحضيريه لمهمه الحريق.........

باختصار عشان منتوهش من بعض هنمسك بستم و احد و نشوفه بيعمل ايه....

الشوط الاول: البستم بيكون فوق فى اعلى نقطه و صمام سحب الوقود و صمام خروج العادم مقفولين ويبدأ البستم فى النزول و فى نفس الوقت صمام السحب بيفتح و لما بيكون البستم وصل لأدنى نقطه ليه تحت بيكون شفط غليط الهواء و الوقود المطلوب.

الشوط التانى: بيقفل صمام السحب اللى كان مفتوح و يطلع البستم لفوق يضغط خليط الهواء و الوقود اللى سحبه قبل كده فى حته صغيره قوى اللى بتفضل فوق البستم و هو فى أعلى نقطه فيه و طبعا حجم الوقود اللى كان مالى الاسطوانه كلها اتزنق فى حته صغيره فوق البستم و ضغطه على اوى و بيتلكك على اقل شراره عشان يولع.

الشوط الثالث(الشوط الفعال): البوجيه يدى الشراره فالوقود المزنوق فوق البستم يحدث له شبه انفجار صغير فيتمدد و يدفع البستم لاسفل بقوه.

الشوط الرابع: البستم الصبح تحت فى ادنى نقطه و الاسطوانه مليانه عادم محتاج يخرج فيفتح صمام العادم و يطلع البستم لفوق و يزق كل العادم اللى قدامه يرميه بره و بعدين يقفل صمام العادم و يفتح صمام سحب الوقود و ينزل البستم و هو نازل يشفط كميه و قود جديده و هكذا تكرر العمليه نفسها و فى نفس اللحظه كل بستم من الاربعه بيبقى فى نوعيه شوط غير التانى بحيث باستمرار يكون فيه بستم واحد على الاقل فى الشوط الفعال(بيحرق و هو اللى بيحرك العربيه فى اللحظه ده)

معلش وجعت دماغكو فى اساسيات ناس كتير عارفينها بس فى ناس كتير بردو مش عارفينها و الكلام اللى هقولو عن الفرق بين المحرق الرياضى و العادى مش هيتفهم لحد مش عارف الاساسيات و انا عاوز الكل يفهم و حاولت ابسط على قد ما قدرت......

دلوقتى الشرح اللى انا شرحته قبل كده عن توقيت فتح و قفل الصبابات مثالى قوى ان صباب السحب يفتح فى نفس اللحظه اللى البستم بييتدى ينزل فيها عشان يشفط و ان صمام العادم يفتح فى نفس اللحظه اللى البستم محتاج يطلع فيها عشان يطرد العادم اللى فوقيه و كذلك توقيت غلق الصمامات...... توقيتات الفتح و الغلق للصمامات اللى انا شرحتها ده تكون صحيحه لو الموتو ده هيشتغل بالتصوير البطيىء لكن البستم من سرعه طلوعه و نزوله عينك ممكن تشوفه واقف مكانه ما بيتحركش فمع السرعه الرهيبه ده ممكن مثلا يحصل شوط السحب و صمام السحب يفتح و يقفل و خليط الهواء و الوقود ميلحقش يدخل؟!!!!!!!!! طبعا لان خليط الهواء و الوقود عباره عن كتله و لها قصور ذاتى و انت بتطلب منها تلحق تدخل و تملأ الاسطوانه فى جزء صغير جدا جدا جدا جدا من الثانيه!!!!!!!!!!!!!!!!!

و نفس الحكايه بالنسبه للعادم ممكن البستم يكمل مشواره لفوق و صمام العادم يقفل و لسه فيه جزء من العادم ما اطردش بره!!!!!!!!!!!!!!!

نيجى بقه لمربط الفرس:

معنى كده انى كل ما ازود سرعه الموتور محتاج افتح صمام السحب بدرى شويه عن ميعاده عشان خليط الهواء و الوقود يلحق يدخل بكميه كافيه و نفس الكلام بالنسبه لصمام العادم................

يعنى انا دلوقتى لو مصمم مواتير المفروض كل ال RPM يزيد اخلى كل من صمام السحب و صمام العادم يفتحوا بدرى عن ميعاهم و ويتأخرو شويه كمان عن ميعاد قفلهم عشان يفضلو مفتوحين اطول فتره ممكنه تسمح بخروج و دخول الكميات الكافيه من عادم و سحب وقود فى السرعات العاليه جدا ده......

طيب هو انا ممكن ازود الوقت اللى بيقى الصباب فيه مفتوح كده زى منا عاوز؟!!!!

فى الحقيقه الموضوع فيه مكسب من ناحيه و خساره من ناحيه تانيه المكسب فى انى ازود و قت فتح الصمام انى هقدر احرق كميات و قود اكبر خصوصا فى ال RPM العالى بس هخسر من ناحيه تانيه ان الوقت الزياده اللى هيبقه الصباب فاتح فيه هيبقى البستم بدأ فى شوط تانى يتطلب ان الصباب يكون مقفول زى مثلا لما افتح صمام خروج العادم بدرى و البستم لسه نازل فى السكه مخلصش شوط الحريق للأخر فطبعا كأنى رميت قوه ضاغطه كانت ممكن تستنى شويه لحد ما تجيب البستم للأخر و رميت طاقه كنت ممكن استفيد بيها......!!!!!!!!

طبعا فيه حسابات معقده تخلى المصمم يقدر يحسب هيضحى بايه وبقد ايه عشان يكسب ايه؟ و فى المجمل هيكون المكسب اكبر من الخساره و لا العكس؟

طبعا موضوع الوقت اللى بيبقى الصباب فاتح فيه بنعبر عنه بزاويه فتح الصباب لان الكامه اللى بتحرك الصباب بالفتح و القفل عباره عن عمود بيدور عشان كده لما بنتكلم عن توقيت فتح و قفل الصباب بنتكلم بلغه الزوايا يعنى مثلا(زاويه الكامه اللى بيكون الصباب فيها مفتوح بالنسبه لزاويه الكرنك.....و هكذا.. و طبعا مش محتاج اقولكم ان زاويه الكرنك ده بتعبر برده عن مكان البستم)

نيجى بقه لخلاصه الحسابات ان كل RPM ليه زاويه فتح صبابات معينه بيكون حسابات المكسب و الخساره فيها لصالح المكسب باقصى ما يكون و كل ما الRPM بيعلى بنحتاج الزاويه تكون اكبر!!!!!!!!!!!!!!!!!

طيب احنا مش هنقدر نغير الزاويه ده لكل RPM فالمصمم بيختار RPM معين و يصمم الزاويه ده عليه و طبعا الRPM ده هو اللى بيكون عنده الموتور فى احسن حالاته و احسن كفاءه و اقصى عزم و دايما لو نلاحظ لما بنقرأ فى مواصفات المواتير دايما يربط العزم بالRPM زى مثلا لما يقولك الموتور الفلانى اقصى عزم ليه 140 N.m @ 4500 RPM ..............طبعا العزم بيبقى اقل من قده فى الRPM الاقل و كمان فى الRPM الاعلى

طبعا كل مصمم ليه متطلباته و مواصفاته اللى عاوز يحققها فى موتوره فلما يصمم زاويه الكامه بحيث تديله اقصى عزم عند RPM واطى بيبقى اداء الموتور حلو فى الطلعات و السرعات الواطيه جوه المدينه انما لما تحتاج تقرص عليه و ترفع ال RPM و تجيب سرعات عاليه هتلاقيه مخسع لانه زى ما قلنا زاويه صباباته ضيقه فمش قادر يسحب خليط وقود كبير يتناسب مع الحرق و الجرى ده كله!!!!!!

وفيه مصمم بيفضل يصمم زاويه الكامه بحيش تديله اقصى عزم عند RPM عالى زى الانسر اقصى عزم عند 4500 و ده رقم كبير جدا نادر لما عربيات بتوصله و دايما بيبقى فى حدود ال3000RPM و طبعا كل ما اقصى عزم بيكون عند RPM عالى نقدر نقول على الموتور (رياضى) لانه بيدى اقصى كفائته و اقصى حرق ممكن على الRPM العالى فلو حد سواقته هاديه و الRPM ما بيعلاش معاه يبقى عمره ما هيستغل قوه الموتور الحقيقيه و عشان كده الفتيس الاتوماتك بتاع الانسر بيتعمد يرفع الRPM جامد عن عربيات تانيه كتير لانه مبرمج على ان الموتور اللى راكب معاه بيطلع كامل كفائته عند RPM عالى فبيحاول يوصله عشان كده صوتها بيعلى لما يتقرص عليه.

انا عن نفسى بفضل المواتير الرياضيه لسبب مهم جدا اهم من الشد و الجرى و هو ان عمرها الافتراضى اطول و هضربلكم مثال من كلامنا اللى فات.........

مثلا فى السرعات العاليه صمام العادم هيفتح بدرى شويه و البستم لسه نازل بيحرق و لو الصمام ده متأخر فى الفتح شويه زى فى موتور مش رياضى ممكن البستم يخلص حريق لتحت و يبدأ يطلع و لسه صمام العادم مفتحش على الاخر كويس و العادم ميخرجش بحريه و طبعا مقاومه العادم للبستم و هو طالع بسرعه رهيبه تعتبر احمال و اجهادات على البستم(زى شاكوش بيدق على البستم بالظبط) و طبعا عمره الافتراضى هيبقى اقل مع الشد و السفر كتير و خامات الموتور هتتهربد بسرعه (طبعا بالنسبه للموتور الرياضى مش فى العموم)

ده غير طبعا ان تسارعها احسن فىى السرعات العاليه زى مثلا لما تكون عاوز تزود من سرعه 120 لسرعه 160 كم/س وهكذا و طبعا الشاب اللى عايز يسابق و يشد بعربيته و يحرق بيها جامد و يجيب اخرها مش هيكيفه غير الموتور الرياضى و كمان عشان يستحمله كعمر افتراضى.

اخر حاجه بقولها تانى فى الاخر موتور الانسر رياضى و اقصى عزم ليه بيتحقق عند RPM يعتبر من اعلى الحاجات اللى شوفت مواصفاتها و طبيعى فى الاتوماتك بالذات ان الRPM يعلى اوى و فى المانوال كمان لو حد عاوز يجرى بيها لازم يجيب اخر الغيارات اكتر من اى عربيه تانيه بس الجميل ان الموتور هيستحمل الحرق ده كله لانه مصمم على كده بس محتاج حد يفهمه و على فكره انا معايا لانسر 1600 مانوال و صاحبى معاه صنى 1600 مانوال و مش بيقدر يطلع منى. بس عشان انا باعرف اطلع كل طاقه موتورى ازاى...


فى حاجه تانيه عاوز اقولها بمناسبه انى فتحت موضوع زاويه الكامه و ان اقصى عزم بيكون عند RPM معين........

فيه مواتير بتعدل زاويه كامتها بحيث العزم يكون احسن ما يكون فى مجال كبير من RPM و مش عند RPM معين زى المواتير التقليديه بس برضو بيفضل اقصى عزم ليه عند RPM معين بس لو عليت او قليت عنه العزم بيقل بنسبه اقل من المواتير التقليديه (يعنى مش بيضيع)

وامثله المواتير ده فى معظم الموديلات الجديده دلوقتى زى:

-الهوندا V-TEC و معناه Variable valve timing
-تويوتا VVT-i و معناه Variable valve timing intelligence
-ميتسوبيشى MIVEC و معناه Mitsubishi intelligent valves elect. control
-هيونداى CVVT ومعناه Continuously variable valve timing

أعتقد أن مشكلة السحب دى مرتبطة بالطريقة اللى اتعاملت بيها العربية فى اول 5000 كم ،يعنى لو كانت العربية اتفتحت و اخدت على السواقة السريعة مكانتش بقت كده
بس عندى سؤال : هو فى حد تانى بيسوق العربية دى مع حضرتك ؟

اقتباس:

---

المشاركة الأصلية كتبت بواسطة مصراوي جدا

أهلا بحضرتك يا أبو عبد الرحمن


أولا كون ان التكييف كان ضعيف من اول لما شريتها فده لا يمنع برضه ان السبب هو الفلتر وباذن الله أول لما يتنضف هتحس بفرق كبير


بس عندي سؤال - هو ازاي العربية وكالة يعني من الوكيل وحضرتك عملت صيانات 1000 - 5000 - 10000 - 15000 - 20000


أحنا في التوكيل (شركة مصرية) بنعمل فقط 1000 ثم العشرات أما الخمسات دي فمراكز صيانة الخليجي هي اللي بتعملها - فحضرتك بتعمل الصيانة فين ؟


أخيرا لو تحب حضرتك تشرفنا في مركز الخدمة الرئيسي في قليوب ويطلع معاك مهندس الاستقبال يجرب العربية وساعتها يقول هل سحبها وصوتها طبيعي زي باقي العربيات ولا عربيتك بالذات فيها مشكلة معينة - فيا ريت تشرفنا في أي وقت وبدون حجز بس يا ريت الصبح بدري شوية

---

صحيح السيارة من الوكالة أو التوكيل يعني ع الزيرو،،،

أنا أساسًا مقيم في الإمارات واشترتها من الحبتور وكلامي كله على الأساس دا،،،

يا ريت يا مهندس طارق كنت موجود في مصر حتى الأقل كنا جينا لك زيارة أخويا مش مهم السيارة،،،

أما بالنسبة لموضوع السيارة فأنا الآن عندي قناعة تامة بأن المكيف المشكلة اللي فيه أكيد مشكلة فيلتر وإن شاء الله المر ة الجاية في الصيانة بكلمهم عليه،،،

بس أنا نزلت الملف اللي تسارع السيارة لانسر وإنها جابت الـ 100 كيلو في 11 ثانية كلام ممتاز بس المشكلة إني مش قادر أعمل كده لصوت السيارة الصراحة صوتها بيرتفع بشكل جبار جدًا لدرجة إنك تعجز عن تحمله وتخشى أن يصيب السيارة أي ضرر من جرائه،،،

بس ملاحظة مهمة طبيعًا زي ما هو معروف طبيعة الخليج وبالأخص وإحنا في فصل الصيف وبالتالي احتمالية عدم تشغيل المكيف بتكون قليلة جدًا أو نقدر نقول لا تحدث مطلاقًا،،، وبيكون الود ويه افتح المكيف قبل ما يشغل السيارة،،، لذلك أنا بقول لعل تشغيل المكيف هو اللي محسسني بالإحساس دا لأني الصراحة بشوفها مربوطة طالما المكيف شغال لأني أتذكر في فصل الشتاء ربنا يمسيه بالخير كانت حركة المحرك أفضل ولكن برضه أشعر أنها ليست بكفاءة السيارات الأخرى،،،

طيب بمناسبة وجود معنا المهندس طارق أحب أوجه له الشكر الأول وثانيًا سؤال: هل في رأيك السيارة الصني والكرولا أقوى من اللانسر إذا وضعنا في الاعتبار فارق السعر بين الثلاث أنواع فالسيارة الكرولا 1600 واللانسر أيضًا 1600 ولكن فارق السعر كبير بين الاثنين هل من توضيح لهذه النقطة هل محرك الكرولا أفضل وأحسن من اللانسر،،،

انا عندى مشكله ف الانسر 2008 اتوماتيك 1600 مفيش سحب خالص والتسارع والتجميع ضعيف جدا لدرجه انى وصلت الى 6 rpm وكانت السرعه 130 بالعافيه وكمان بتاكل بنزين كتير قوى ارجو الافاده

متابع