في مصر خامات طبيعية كتيرة جدا و طول الفترة اللي فاتت كانت الخامات المصرية يتم تصديرها بملاليم و استيرادها مصنعه بملايين ...
و احب افيد اخواتي من اعضاء المنتدى اللي عندهم امل في بكرة افضل بمجموعه افكار و لو حد مهتم بفكرة منهم اقدر اساعده في تنفيذها و ادارتها
1- الرمل الزجاجي :
او رمل السيليكون و موجود في سينا و البحر الاحمر و بيكون رملة لونها فاتح جدا و بيتم استخراجها و تكسيرها و غسلها و تصنيفها على حسب نسبة الحديد و الاكاسيد ...
و يتم استخدامها في صناعة الزجاج ( كريستال عصفور تاني افضل مصنع زجاج في العالم بسبب نقاء الخام)
و تستخدم كمان في صناعة الدوائر الاكترونية و البوردات و صناعات تانية كتيرة جدا ممكن نبقى نناقشها في وقت تاني
2- الفوسفات :
موجود في اسوان و الفيوم و اماكن تانية و ده حجر يتم تكسيره و طحنه و بيدخل في صناعات الاسمدة و المنظفات و المواد الكيماوية
3- الرخام :
موجود في اماكن كتير في البحر الاحمر و المنيا و الصعيد و يتم تصديره حجر خام للصين و هناك يتم تقطيعه و تجليته و اعادة تصديره على انه منتج صيني
4- كربونات الكالسيوم :
الحجر الجيري موجود في المنيا و شمال سينا و السويس و يدخل في صناعات البويات و الاسمدة و البلاستيك والورق و فيه موضوع كنت عامله عن دراسة جدوى ليه في المنتدى
5- الطفلة :
موجودة في اماكن كتيرة جدا و اجودها في اسوان و بني سويف و دهشور و تدخل في صناعة الاسمنت و الورق و الاسمدة و الطوب الطفلي و حاجات تانية كتيرة
6- الرمل :
موجود في اماكن كتيرة جدا و منه انواع تستخدم في فلاتر المياه في محطات المياه و الصرف الصحي و منه انواع تستخدم في المحارة و في البناء
7- الزلط :
الزلط يستخدم في فلاتر المياه في محططات المياه و الصرف الصحي و البناء و رصف الطرق و الكباري
8- الدولوميت :
موجود في السويس و يستخدم في صناعات كتير اهمها المنظفات و الكيماويات
9- اكسيد الحديد :
الاحمر و الاصفر و يوجد في غرب قنا و سوهاج و يستخدم في صناعات كيماوية كتيرة جدا
10- الدهب :
في الصحرا الغربية و اسوان
11- الامونيوم :
في سوهاج و انقى درجات في العالم و يستخدم في صناعات الادوات المنزلية و الصناعات الهندسية
دول مجموعه من الخامات الطبيعية الموجودة في الجبال و الصحارى المصرية .
نيجي بقى لمشاكل الصناعات دي :
1- تكلفة المعدات العالية
2- مشاكل وضع اليد مع العرب في المناطق الصحراوية
3- تكلفة نقل المنتج من المحاجر الى الموانيء
4- لا يوجد دعم حكومي للمصدرين
5- التراخيص و الاوراق الحكومية الخاصة بالتصدير
مميزات الصناعات التعدينية :
1- ربحية عالية جدا
2- سهولة التطوير و القدرة على انتاج منتجات متعددة من نفس الخامات و بنفس خط الانتاج مع تعديلات بسيطة
3- الطلب العالمي العالي جدا على الخامات المصرية لجودتها العالية جدا
4- التسويق ممكن باستخدام مواقع التجارة بين الشركات