الموضوع: موقف حصل معايا فعلا وبحكيه للفائدة

أبويا دايما ً يقولي لو لقيت حد ممكن توصله في طريقك خده ... الناس غلابة

بس من هنا ورايح خلاص ... على البيت عدل

بس ما شاء الله عليك رد فعلك رائع ... وأحسن حاجة إن متخضتش زي ما كان هيحصل مع معظمنا

يانهار ابيض ياجماعة هي الدنيا مبقاش فيها اي امان خالص كده بجد ربنا يستر.

انا من كذا اسبوع كده كنت مروحة من الشغل وبعدين بعد ماتحركت بالعربية بربع ساعة لاقيت نفسي مشدودة شوية ومش مركزة فقلت اركن اريح شوية وبعدين اتحرك عشان مسوقش وانا متوترة كده وبعدين لاقيت 3 بنات واقفين مستنيين اي مواصلة وكل مايشاوروا لتاكسي ميرضاش انا عديت من جنبيهم وهاركن اريح شوية لاقيتهم بيقولولي لو طريقك وسط البلد تاخدينا معاكي وبيهزروا فانا اساسا وقفت عشان اريح افتكروني وقفتلهم لاقيت بنت منهم جتلي وقالتلي لو احنا في طريقك توصلينا؟ في الاول خفت كده عشان الكلام اللي الواحد بيسمعه بس قلتلهم انا مش رايحة وسط البلد بس انا هاعدي قرب حطة مترو الحلمية ممكن انزلكوا وتاخدوا المترو قالولي اوكي وركبتهم معايا ودردشنا شوية ووصلتهم لمحطة المترو وشكروني جدا والموضوع عدي عادي جدا وخلاص على قد مانا كنت خايفة في البداية الا انهم يومها بجد صعبوا عليا اوي لاني عارفة مدي المعاناه من المواصلات والتاكسيات اللي مبترضاش توصلك اي حتة ويمشوا فاضيين ويسيبوك عشان كده قلت اكسب ثواب واساعدهم وهما كانوا فعلا يستحقوا المساعدة.
بس بعد الكلام اللي الواحد بيسمعه ده هانخاف حتى نعمل الثواب بس رمضان داخل علينا ياجماعة والناس بجد بتببهدل من المواصلات في رمضان وانا رمضان اللي فات شوفت الويل وكان صعب جدا الاقي مواصلة حتى التاكسيات بقت لعنة والمشوار ابو 4 او 5 جنيه بيطلبوا فيه 7 و10 جنيه ده لو تكرم ووافق اصلا يوصلك.
مش عارفة بجد ممكن اكرر الموضوع ده تاني ولا هاخاف ولا اعمل ايه.

بجد ربنا يستر

علي فكرة بجد عجبني جدا رد فعلك وتصميمك علي انك متركبوش عربيتك
فعلا مفيش ضابط بيقولك نركب معاك عربيتك ونروح بيها علي القسم لو في حاجة فعلا بيبقي في بوكس موجود او عربية شرطة بس انت ربنا الهمك الصح وقتها.
وعجبني اكتر تصميمك انك تروح القسم وتعمل قلق وتكبر الموضوع بالشكل ده وتوصل للمأمور لولا كده كان الموضوع ممكن يتكرر كتير مع ناس تانية من غير مايعرفوا.
وبيتهيألي مفيش ضابط بيطلع الكارنيه بتاعه لوحده كده لما يوقفك بس لو حد حصل معاه الموقف ده هل هايطلب من الضابط الكارنيه بتاعه فعلا ؟ وياتري لو الضابط حقيقي فعلا مش ممكن يحس بالمهانة لما مواطن عادي يطلب منه الكارنيه ؟

مع ان ده وضع عادي جدا وطبيعي بره مصر وطبعا كلنا بنشوف المواطنين في الافلام الاجنبيه بيعاملوا الضباط ازاي وبيتكلموا معاهم بثقة وجرأة ازاي طالما مش مدانين اومحل شبهه بس احنا هنا في مصر صعب بل مستحيل نعمل كده ونكلمهم بالجرأة دي مع اننا فعلا مش مدانين ولا محل شبهه
عموما ربنا يسترها معانا جميعا ويكيفنا شر الطريق بجد.

حمد الله علي سلامتك:)