الموضوع: موقف حصل معايا فعلا وبحكيه للفائدة

موقف حصل معايا من كم سنه

كنت بعمل شوبنج قبل المصيف انا وقريبتى وطلعنا من المول معانا شنط كثير جدا

ركبنا تاكسى وصلت قريبتى بالتاكسى الاول وبعدين كمل على بيتنا عشان يوصلنى كانت الساعه 10 بالليل
نزلت طلعت شقتنا و بعد خمس دقايق لقيت خبط وهبد على الباب والدى كان فى الشغل ومفيش غير ماما واخواتى الصغيرين

ماما فتحت الباب لقت قدامه 3 رجاله كل واحد فيهم حيطه لوحده قالت لهم انتم مين ردوا احنا مباحث ... عاوزين ايه نفسى اقولكم ماما من الخضه بتاعه الخبط واشكالهم جالها السكر المهم قال لها عاوزين الانســــه اللى دخلت من شويه ... خير عاوزين من بنتى ايه ......... لو سمحتى ناديها

انا طلعت على الصوت طبعا اول سؤال كان
انتم مين وعاوزين ايه وبتخبطوا على الشقه كده ليه
قالوا مباحث وفيه جريمه سرقه حصلت وبنفتش المنطقه قلت لهم ورينى كارنيهات الشرطه بتاعتكم ومعاكم اذن تفتيش ...؟
طلعواااااا لى كارنيهات مباحث بصورهم ودخلت قوضى خد كل الاكياس اللى اشتريتها كانت لسا على السرير وراح فاتح الدولاب ومطلع كاميرا فيديو ديجتا ل وموبيل نوكيا فى علبته وقال دول بتوع مين قلت لك انت مالك بتوعى
راح مزعق للى معاه وقاله خدهم فى الشنط قلت له انا رايحه معاكم القسم
قالى احنا هبعت لك استدعاء
طبعا الكلام ده كله عبط فى عبط انا كنت فى رابعه كليه حقوق ساعتها وعاوزه اشوف اخر الفيلم ده

قلت لهم لا رجلى على رجلكم يلا على القسم وسيبوا الشنط دى هنا قالوا لا تعالى انتى والشنط هنروح القسم
واحنا نازلين لقيت ابن الجيران قلت له تعالى معايا ببص على العربيه بتاعه البوكس لقيتها هيواندى اكسنت طالع عينها
ركبت انا وابن الجيران والساده الظباط واحد جمبنا ورا واثنين قدام ومعاهم الاكياس اللى اخدوها من شقتنا ويلا بئه ودونى القسم طلعوا لحد اول الشارع وقالى بصى انتى بنت ناس وبلاش تدخلى اقسام هتشوفى ناس واطيه وهيقعدوكى معاهم
قلت له مش فارقه انا عاوزه ادخل القسم ومش نازله من هنا الا فى القسم

قعدوا يلفوا يلفوا فى نفس المنطقه مش راضين يروحوا ناحيه القسم خالص والدى اتصل قلت له حصلنى على القسم احنا فى الطريق
بعد ما قفلت المكالمه راح البيه راكن وقالى عشان خاطر والدك مش هنستجوبك فى لقسم وهنروحك عشان محدش يتبهدل فى الاقسام
وراح ركن على جمب وقالى انزلى انتى وجاركم قلت له ماشى هات الشنط بتاعتى راح قالى ااااه ااه قال يعنى فكرته راح مدينى الاكياس قلت له وكاميره الفيديو فين قالى ااه دى وقعت من الشنط فى الارض اتفضلى
نزلت وعلى طول ركبنا تاكسى وعلى مديريه امن الجيزه وطلبت اقابل مدير الامن الظابط النبطشى قالى انا اساعدك ايه المشكله حكيت له القصه والدنيا اتقلبت
وفى الاخير طلع الظباط دول نصابين وكارنيها ت مزوره
الحلوين راكنين جمب المول وبيمشوا وراء البنات ويقلبوهم واللى قال كده واحد سايس هناك ان فيه ظباط مباحث بيوقفوا دوريه جمب المول ووصف اشكالهم
النتيجه قلبونى فى موبيل نوكيا الحيوان خباه فى جيبه وانا معرفش انه اخده لما رجعت البيت اكتشفت انه مش موجود

المشاركة الأصلية كتبت بواسطة hazem_khidr

يا خبر يا دموع
ايه دا ولا في الافلام فعلا
الحمد لله انهم ما عملوش فيكم حاجه انتي و جارك
كانوا ممكن يقتلوكم :(

يا حااازم انا كنت مستبيعه لان القسم قريب اوى من البيت والشارع فيه ناس بالهبل هيعملوا لنا ايه اول ما سمعوا ان والدى رايح لى على القسم اتكهربوا وانا مفهمتش الا بعد ما رجعت من المديريه

ولالالالالالاد اللذينا بقول يتهجموا على البيوت علنى كمان واللى قاهرنى الكارنيهات

على فكره لو حد فيكم اتعرض انه يسال ظابط على كارنيه ياخد الكارنيه فى ايده ويتاكد من الصوره ومن ان الصوره مش ملزوقه على كارنيه قديم

واى بنت او حتى شاب

يلاحظ ان فيه عربيه ملاحقه نصيحه يروح على القسم عدل ويشوف اخرتهم ايه

بخصوص موضوع التعامل مع الغرباء في الطرق السريعة سواء كانت مساعدة او توصيلة...

كنت راجع من اسكندرية بعربيتي الاونو السابقة و معايا والدتي و 2 من اخواتي البنات و في نص الطريق الكاوتش اللى ورا نام فركنت اغيره و لسوء الحظ لقيت مفتاح مسامير الكاوتش متاكل من جو يعني بيلف على الفاضى, فضلت واقف اشاور لاي عربية نص ساعة تقريبا حيث الظلام الدااااااااااامس و الصحراء القاحلة

المهم الحمد لله فجاة لقيت عربيتين ليجانزا و لانسر بيركنوا ورا بعض و ميعرفوش بعض جابولى مفتاح و ساعددوني في تغير الكاوتش و سابولي المفتاح و عشان انا مبقاش معايا اطار احتياطي فضلوا ماشين ورايا طول الطريق لحد ماوصلنا لواحد بتاع كاوتش ركنا كلنا و راحوا صحوه من النوم و كانوا عايزين يحاسبولي كمان, و برضة فضلنا ماشين مع بعض للاخر.

سالتهم ليه وقفتوا مع ان كان ممكن اكون نصاب او بلطجي جاوبوا بكل بساطة:
تكون زي ماتكون إحنا توكلنا على الله سبحانة و تعالى ووقفنا بنية عمل خير و اكيد ربنا سبحانة و تعالى هيبقى معانا

و شكرا