اللي بيروح دايموند موتورز القاهره - الفرع الرئيسي أفي بو رواش يدخل هنا لو سمحتم
سلام عليكم ياجماعه
أكيد اللي راح هناك ولو مره واحده هايبقى عارف انا باتكلم على ايه
الشهاده لله - الفرع نضيف وكل حاجه ومعاملة الناس كويسه - بغض النظر عن التأخير الفظيع في الصيانات
لكن الحاجه اللي مش كويسه عندهم واللي أنا بجد آسف اني اقولها هي موضوع الذباب
وزي ماقولت اللي راح هناك أكيد لاحظ , مع ان الفرع نظيف وكل حاجه لكن هناك كمية ذباب مش طبيعيه
وطبعا مع طول فترة الإنتظار في جو مليان بالذباب كده .. الواحد بيلاقي نفسه خلاص اتخنق بجد
وبصراحه انا مش عارف ازاي فرع نظيف بالشكل ده ولتوكيل محترم زي ميتسوبيشي .. ويبقى عندهم العيب ده
ولو أخذنا في الإعتبار ان ممكن يكون في مناطق زراعيه جنبهم واخذنا في الإعتبار كمان انهم صعب يحافظوا على الباب مقفول طوال الوقت لكن برضه ماننساش ان في اختراع اسمه أجهزة صواعق للحشرات الطائره سواء ذباب او ناموس - وقطعا توكيل كبير زي ده مش هايفرق معاهم ألف ولا ألفين جنيه يجيبوا بيهم أجهزة صواعق للذباب
فانا عامل الموضوع ده مخصوص عشان احنا نشوف لنا حل .. أعتقد لو كلنا اشتكينا من حاجه زي كده .. هاينفذوا مطالبنا - أي نعم هي حاجه محرجه لينا أننا نتكلم في حاجه زي كده
بس هي قبل ماتكون محرجه لينا هي عيبه في حقهم هم أصلا ان يبقى توكيل لشركه محترمه زي ميتسوبيشي ويكون عندهم عيب في حاجه عبيطه زي دي.
مش بس يافرحتي انهم مقعدني في مكان شيك ومكيف وتليفزيونات LCD في كل حته ومشاريب مجانيه وأبقى قاعد مش طايق نفسي من الذباب .
طولت عليكم ياجماعه معلش .. وعايزين نبتدي ناخد خطوه فعاله
أنا من رأيي .. أي حد يروح يعمل صيانه هناك .. الشركه بتتصل بيه بعديها بيوم أو يموين ياخدوا رأيه في مستوى الخدمه
وهنا ييجي دورنا بقى اننا نلفت انتباهم لحاجه زي كده (قال يعني هم مش عارفين) :new:
وأعتقد كمان احنا ممكن نسيب ملاحظاتنا على موقعهم على الفيس بوك
وأنا أولكم ياجماعه وأول مايكلموني هاقول على حاجه زي كده (لأنهم أكيد هايكلموني يسألوني على مستوى الخدمه) ولو ماحصلش هابقى اتصل انا بقسم الشكاوى .