مواقف مؤثرة

**sniper2010** · 16-08-2008 04:36 PM

ارحمينا يا علا بقى _ _ _ مش كل شوية تخلينا نعيط كده _ _ _ ده حتى وحش ع الغدد الدمعية بتاعة الواحد من كتر استهلاكها _ _ _ و نحتاج بعد كده نغير فلتر و يمكن بوجيهات كمان :)

**zalpany2000** · 16-08-2008 11:52 PM

يا جماعة لله في خلقه شؤون
انا بقي يمكن ربنا وراني قدرته في موضوع الحياة والموت دي عن قرب

انا يمكن حكيت الموقف ده قبل كده علي المنتدي بس هاعيده للي ما قرائهوش علشان عندي رسالة عايز اقولها للناس وخصوصا لاستاذة علا

بحكم شغلي .. أحيانا بنلف علي الجامعات المصرية علشان ندرب أهضاء هيئة التدريس او علشان نتابع مشروعات تبع الوزارة في الجامعات
ولما بتبقي جامعة قريبة بتيجي عربية بالسواق علشان توصلنا ونرجع في نفس اليوم

وفي يوم كان عندنا تدريب في جامعة المنوفية في شبين، وكان معانا راجل محترم سواق شغال علي عربيته ليموزين... المهم واحنا راجعين "علشان القدر" بأتفاوض

**zalpany2000** · 17-08-2008 12:19 AM

يا جماعة انا عايز احكيلكم علي موقف حصل معايا أنا حكيته قبل كده علي المنتدي بس عايز اعيده هنا للي ما قرائهوش... وكمان علشان عندي رسالة خصوصا لأستاذة علا.
يمكن انا ربنا كان عايز يوصلي رسالة برضو عن قدرته وعظمته. في موضوع الحياة و الموت

بحكم شغلي في المجلس الاعلي للجامعات... بنلف الجامعات المصرية من وقت للتاني ... ندرب أعضاء هيئة التدريس ... نتابع مشروعات .

المهم لما بيبقي المشوار قصير بتيجي عربية ليموزين تاخدنا وترجعنا
وفي يوم راجعين من جامعة المنوفية.. وأنا وصديق ليا بنتشاور نجيب فطير من برج المنوفية ولا لأ.. ويقطع كلامنا السواق انه الطريق هايطلعنا بعد برج المنوفية .. وانا وصديقي في تردد انه ياخد طريق فرعي ويعدينا علي برج المنوفية ... لحد ما الراجل دخل من دخلة فرعية يمين وطلع علي الزراعي وركن قدام برج المنوفية من الاتجاه اللي جاي من اسكندرية.
طيب المفترض اني انا وصديقي نعدي الطريق الزراعي ونجيب طلباتنا ... نزلنا وسألنا الراجل لو نجيبله حاجه شكرنا وقال لنا لأ وانه مش هايتحرك من العربية

مسكت في ايد صاحبي وجري عدينا
دخلنا نجيب طلباتنا
ومسكت ايده
عدينا اول طريق
نفاجأ بالسواق معانا علي الجزيرة اللي في النص. بيقولنا انه افتكر انه عايز سجاير.. "خد يا بيه مفتاح العربية علشان تقعدوا في التكييف علي ما اجي". أخر جملة قالها ..
نزل خطوة
وفجأة عربية نص نقل "الدبابة دي" راحت طايحة الراجل بتاع 15 متر طارهم في الهوا.. العربية كمان خبطت في عربية ماشية قدامها علي اليمين محملة علف فالعربية التانية دي وقعت شكارتين قدام الراجل اللي كان اترزع علي الأسفلت بصورة مخيفة.

أول مرة اشوف حد بيموت قدامي " كل اللي في بالي الراجل ده هانبلغ أهله ازاي"
الراجل ده 100 % مات .. وقطع عليا حبل افكاري في الثواني اللي بتعدي دي عربية كمان جاية علي سرعتها و هوب راحت طالعة علي شيكارات العلف اللي الراجل وراها قبل ما تفرمل وتقف...
كده مش مات .. ده مات و اتفرم
أفوق علي روحي زي المجنون واقف في وسط الطريق باوقف العربيات.
وبعدين مش فاهم حصلت شوية حاجات
المهم انه فجأة لاقيت الاسعاف وأمين شرطه في أقل من دقيقة واقفين معانا
ركبت مع الراجل الاسعاف وصاحبي مع واحد بيسوق بيه العربية اللي ماعدش فينا أعصاب نسوقها..

انا راكب جنب واحد ميت .. يا رب هونها عليا ... فجأة ألاقي الراجل بيتنفس انا ما لاحظتش قبل كده انه بيتنفس ... كمان بيتشاهد "ايه ده هو لسه بينازع !!"
المهم دقيقتين بالظبط كنا دخلنا مستشفي قويسنا ... ومن غير تفاصيل مستشفياتنا الحكومية المصونة .. بعد شوية زعيق وتعريف بينا .. بدأوا يسعفوا الراجل .. اتضح انه عايش .. وبعدين بيكلمني "انا مش مقتنع انه ده صوته أصلا.. دي تهيؤات "
بعد شوية اشاعات اشتبهوا في نزيف داخلي عنده

كنا احنا عملنا اتصالتنا علشان ننقله من المستنقع اللي كنا فيه.
وأفاجئ انه اصلا ظابط جيش متقاعد . وشغال علي عربيته.. لما كلمنا أهله طبعا جم وبالليل نقلوه علي مستشفي القوات الجوية

هناك قالولنا انه الحمد لله ماعندوش نزيف داخلي ولا حاجه... كل ما هنالك شرخ في ضلع وفي قصبة الرجل.

لحد النهارده انا مش مصدق انه عايش بينا
وكتير بيبقي طالع معانا مشاوير بس انا باتعمد اني ما اطلعش معاه...

ربنا رحيم قوي يا اخونا

من قلب الموت بتتوجد الحياة... وديما الامل ما بيمتش ... الدنيا مش ديما حلوة ... بس كوننا عايشينها دي نعمة

و باهدي بيت الشعر اللي حاططه في توقيعي لكم جميعا وللأستاذة علا تحديدا.. فعلا ده انا كتبته من واقع أزمة كبيرة مرت بيا ولما بافتكره باحس ان لازم كلنا نفكر كده
ملاحظة لحضرتكم للي ما أخدش باله كل جمله في السطر الاولاني بترد عليها جملة في السطر التاني

ليل طويل ... هم ثقيل ... وهم سرمدي
صبر جميل ... شاب فتي ... ورود وحلم جميل نقي

لكم مني أطيب التحيات والمني

**sab3aawy** · 17-08-2008 11:08 AM

ارحمنا يا رب باه من الجثث والأشلاء اللى بتتحدف علينا من كل حتة

يا ناس المواضيع دى مش مناسبة للجميع فمن فضلكم اللى عايز يكتب موضوع زى ده ينبه من الاول انه غير مناسب للكل، وخصوصا من كان عنده حساسية ضد الجثث والأشلاء الممزقة،

ارحمونا يرحمكم الله

**OlaOsman** · 17-08-2008 01:11 PM

المشاركة الأصلية كتبت بواسطة sab3aawy

ارحمنا يا رب باه من الجثث والأشلاء اللى بتتحدف علينا من كل حتة

يا ناس المواضيع دى مش مناسبة للجميع فمن فضلكم اللى عايز يكتب موضوع زى ده ينبه من الاول انه غير مناسب للكل، وخصوصا من كان عنده حساسية ضد الجثث والأشلاء الممزقة،

ارحمونا يرحمكم الله

فيه ايه بس يا باش مهندس؟ مافيش حاجة تستدعي كل ده.. الموضوع عبارة عن مواقف مؤثرة و تصادف ان معظم الناس المواقف المؤثرة اللي مرت بيهم كانت عن الموت الفجأة لشباب في مقتبل حياتهم و بدون مقدمات.. كل ده للعبرة و العظة.. مافيش غير مشاركتين كان فيهم تفاصيل حوادث فيها جثث و أشلاء.. يعني الموضوع مش أصله كده خالص، عشان كده مش شايفة اني كان المفروض اني أنبه على محتوى الموضوع.

ده بالنسبة لموضوعي.. اما لو كنت بتتكلم عن انتشار مواضيع ذات محتوى صادم للمشاعر في أرجاء المنتدى فأنا زي ما انت عارف مش متابعة لجميع موضوعات المنتدى و تقريبا مش باخرج من الاجتماعي و دايهاتسو وحش النص نقل

منور الموضوع يا سبعاوي باشا :)