الموضوع: بالله عليكم مش أحسن من شنطة الاسعافات ؟؟؟؟؟

المشاركة الأصلية كتبت بواسطة nasr-eldeen

عندي اقتراح لو أمكن تنفيذة ؟
بدل شنطة الاسعافات ومكوناتها التي ستفسد بعد اسبوع على الاكثر لأن أقل فترة بتقف فيها السيارة في مصر في الشمس على الاقل 3ساعات في اليوم ؟ ما علينا .
المهم اقتراحي هو لو الشنطة ثمنها 40جنية وعمرها الافتراضي مثلاً شهر مثلاً قول هنشتري مكونتها كل سنة (( تجديد يعني )) .
طب ايه رأيكم لو يتم تحصيل 25جنية سنوياً على السيارة عند التجديد تحت مسمي خدمة اسعاف بيقولوا يوجد في القاهرة تقريباً 4.5مليون سيارة ده في القاهرة اضرب في 25جنية 112500000جنية في السنة ده من القاهرة بس يتم توجيه هذه الاموال لخدمة الاسعاف سواء بشراء سيارات اسعاف جديدة وبناء وحدات اسعاف جديدة وكثيرة على الطرق السريعة وذيادة المهارات الطبية في هذه الوحدات الطبية بحيث يكون بين كل وحدة واخرى مسافة لا تزيد عن عشرة أو خمسة عشر كم ويكون هناك رقم طوارئ مخصص للطرق السريعة بحيث يتصل المصاب أو من يراه على الطريق ويحدد مكانه عند الكيلو كذا وتقوم غرفة العمليات هذه بالاتصال بأقرب وحدة اسعاف له ولا مانع من شراء أكثر من طائرة اسعاف (( الاسعاف الطائر )) لأن المبلغ ليس بالقليل وهو متجدد ايضاً 112500000جنية سنوياً من القاهرة فقط يتم تنفيذ المشروع سنوياً على مراحل ولا مانع من تطوير وحدات الاسعاف الداخلية في المدن .
لأنه من أبسط قواعد الاسعافات الاولية هو أن الشخص الذي لا يعلم اصول ومبادئ الاسعاف الاولي لا يجب عليه الاقتراب من المصاب وتحريكة حتى لا يضاعف اصاباته وعلى الاخص لو كان به كسور او انزلاق او ما شابه .
واحب اضيف معلومة ان الشعب المصري كله يمتلك الخبرة في اي شئ (( وسع يا جدع وسع هات الراجل على جنب ، اجلسة شربه شوية ميه ، خد شربة شوية من الزجاجة دي دي مطهر ينضف جوفه ويديلة شوية بيتادين ، هب الراجل مات قدره بئه احنا حبينا نخدم )) المفروض من ابسط قواعد الاسعافات الاولية للي معندوش خبرة انه يبتعد عن المصاب لكي يعطي له مساحة للتنفس ويطلب الاسعاف فوراً ، والاسعاف مش هتيجي بسرعة الا اذا كانت لها نقاط متعددة وقريبة على الطرق السريعة واعتقد ان هذا المصدر يكفي لتنفيذ المشروع واعتقد انه لو اتنفذ ورأيناه في الواقع الرسم ده هنكون راضين عنه حتى ولو زاد ووصل الى 50جنيه مادام يتم توجيهه للطريق الصحيح بدون مصاااااااريف ادارية و؟؟؟؟؟؟ احسن من الشنطه التي ستفسد بعد اسبوع ونشتري غيرها أو نأخذ مخالفة لأنها تحمل مكونات فاسدة من الشمس وإذا لم تفسد فأعتقد اننا سنضر المصاب ظنا منا اننا نساعده في الحادث بجهلنا بالاسعافات الاولية وانا اول من يجهل الاسعافات الاولية .
اللهم بلغ عني اولي الامر

بجد من اروع الافكار اللي اتقالت بخصوص الكارثه القوميه اللي عايزين يطبقوها في الشوارع مع شعب غالبيته العظمي ساذج و بيحب الفتي زي عينيه

الاسعافات الاوليه علم مش شنطه و الاذكياء بتوع 50% في الثانويه اللي بياخدو قرارات زي وشهم محدش فيهم فكر ولو للحظه ايه اللي ممكن يحصل للمصاب المسكين لما كل واحد معاه شنطه فيها شويه ادويه هزيله لا علاقه لها من قريب او بعيد بالحالات الطارئه المصاحبه للحوادث زي نزيف داخلي او خارجي كسور في الفقرات او الضهر او الاطراف و الضلوع صدمات عصبيه اغماء توقف التنفس سواء لوجود عائق في مجري التنفس او لتوقف القلب و الرئتان (و ده بيحتاج انعاش قلبي رئوي- قبله الحياه و انعاش للقلب يدويا)

و انا ابسط مثال انا دكتور اسنان و مكنتش اعرف حاجه عن الاسعافات الاوليه الا لما اخدت دوره عنها في الهلال الاحمر و صدقوني يا جماعه الاسعافات الاوليه مش لعبه او تهريج و اقل خطأ ممكن يؤدي بالمصاب للوفاه لدرجه اني في 3 مرات وقفت في الشارع علشان اشوف المصابين اول حاجه بسأل عليها الناس مفيش دكتور هنا و افضل اكرر ندائي كذا مره قبل ما اطلب من الناس يوسعو السكه ليا لو مكنش فيه دكتور بشري لأنه اكيد اكتر مني تأهيلا و خبره في التعامل مع اصابات زي دي

فمع كل ده و يطلعو بهلوسه شنطه الاسعافات يبقو عالم بيهرجو و العيب كل العيب علي وزاره الصحه الي ساكته علي حاجه زي كده في خلال ان ممارسه مهنه الطب علي يد اي حد مش دكتور تعتبر جريمه في حق المجتمع بيعاقب عليها القانون

يبقي ازاي بقي يسكتو عن تعريض حياه مصابين الحوادث( اللي ممكن اكون انا و انت و اهالينا منهم ربنا يحفظنا) و لا حول لنا ولا قوه في اللحظات دي اننا نعاني من مضاعفات و عاهات و يمكن الوفاه جراء قيام اشخاص عاديه غير مؤهله او مدربه بتجريب الطب علينا من واقع الافلام و الخيال و الجهل

ابسط مثال الانعاش الرئوي القلبي لو بتشوفوه في الافلام بتلاقي المسعف او الطبيب حاطط ايده علي القفص الصدري في المنتصف و بيضغط بكل قوته و وزنه, تعرفو بقي لو ايدك كانت 1 او 2 سم تحت مكان معين ايه اللي هيحصل للمصاب؟
هيحصل قطع في الشريان الكبدي و نزيف داخلي و وفاه
شفتو بقي فرق سنتي او اتنين عن المكان المحدد ممكن يعمل ايه؟؟؟؟؟؟؟؟؟؟؟؟؟

بجد لازم حد يهتم و يرفع قضيه علي الحكومه بتهمه تعريض حياه مصابي الحوادث للخطر

و فكرتك بجد من اروع ما قيل بخصوص الحوادث