أعصابك يا حاج علشان صحتك :ma:
انتا بتتكلم عن مشكلة
باتت اساسية فى شورعنا
تحياتى للجميع
انت جيت على الجرح والله - انا فى منطقة عين شمس - و الركنه من كام سنة بقيت نيلة أوى - و بدأت بعض الناس تحط موضوع الحديد ده
الحقيقة بيكون هاين عليا أساويهم على الارض بضهر العربية - بس معرفش ممكن يحصل ايه و انا بخاف على عربيتى
منهم لله
انا من الناس اللى كنت عامل حديد ادام بيتنا ودا عملته بعد كذا موقف
واجهة العمارة صغيرة عبارة عن المدخل و بابين للمخزن يعنى مفيش حيطان على الشارع خالص
بعض الجيران ربنا كرمهم وجابوا عربيات حديثة وعندهم عربية تانية قديمة وطبعا مبيستخدمهاش خالص
يقوموا يركنوها ادامنا يسدوا بيها ابواب المخزن وكمان باب العمارة
اقسم بالله وصلت بينا ايام كنا بنطلع من فوق كبوت العربية علشان ندخل العمارة
لان العمارة مفيش ادامها رصيف والبهوات بيلزقوا العربية في الباب
في البداية اتكلمت بكل زوق وكان رد الناس دا شارع الحكومة واركن فين يعنى هتلى مكان وانا راكن فيه
رغم ان نفس الناس كانوا بيتخانقوا مع سكان عمارتهم لو سدوا مدخل عمارتهم
دا غير ان علشان نحط بضاعة في المخزن العربية بتقف في اخر الدنيا والعامل اللي بياخد 50 جنيه بياخد 100 علشان بيمشي مسافة كبيرة
وتيجي تسأل بواب عن صاحب عربية يقولك مسافر او في الشغل او مفاتيح العربية ضايعة
لحد ما صبري خلص وشتمتهم افظع الشتايم وحلفت لو اى عربية هلاقيها ركنة في خلال 5 دقايق هكسرها
وفعلا المسافر رجع واللى في الشغل جه واللى مفاتيحه ضايعة لقاها وشالوا عربيتهم في اقل من 5 دقائق
وقعدت فترة كبيرة كل اللى يركن ابهدله لحد ما ناس قالتلي ركب حديد علشان تريح دماغك بدل الخناق
وفعلا عملت الحديد بسبب الناس اللى معندهاش دم اللى بيرموا عربياتهم بالشهور من غير ما يحركوها
في ناس هتقولي برضه ملكش حق تعمل الحديد
هرد عليه واقوله بس من حقي ادخل العمارة اللى ساكن فيها
ومن حقي افتح المخزن بتاعي واخد بضاعتى زى ما انا عايز من غير ما اتحايل على حد ينزل يشيل عربيته