الموضوع: في بيتنا مراهق

واضح ان انا بس اللي عنده مراهقين في البيت
المراهق في السن دة بيبقى عاوز يثبت شخصيته وكينونته
بيبقى عاوز يبقى صوته من دماغه
بيبقى حاسس انه خلاص بقى راجل يعمل الل يعمله ويتصرف زي ماوا عاوز من غير ما يرجع لحد
البداية لامكانية التعامل م المراهق هي الصداقة
صاحب ابنك
صاحبي بنتك
لازم ننزل لمستواه ونشاركه اهتماماته
نسيبه على راحته ونرخي الحبل شوير بس بشرط
اخر الحبل لازم يبقى في ايدك تشده وقت اللزوم
لازم تعرف بيروح فين ومع مين وهيقعد اد ايه
مشكلتي كأم ان ابني متصور اني خانقاه قد اكون كدة شوية بس باخاف عليه
باخاف من مخاطر الطريق ومخاطر الناس اللي في الشارع
بيتهيألي انه لازم يبقى معايا وان معاه في كل حتة

يا ريت نقول المشكلة تحديدا اللي بتقف ادامنا مع ولادنا عشان نتبادل الخبرات مع بعض
لازم تحسسه انك واثق فيه
لازم تكبره وما تصغروش
تحترمه
تديله برستيجه وانه له دور مهم في البيت ومن غيره هتفرق كتير
لازم تفكره من ان لاخر انك بتثق فيه وانك بتحبه
لازم تعرفه ان اي تعليمات بتقولهاله يحاول ما يتخنقش منها لان انت في يوم من الايام كنت في سنه وفي حاجات غلطت فيها ومش عاوزه يكرر الغلط
لازم يعرف ان مش عشان احنا الاباء نبقى معصومين من الخطأ
احنا بش نصيب ونخطئ وبنتعلم من غلطنا
وبنحاول ننبه اللي حوالينا عشان ما يقعوش في نفس الغلط
فمن باب اولى ابني حبيبي لازم يعرف انا غلطت فيه ايه
بس طبعا بشكل ما يؤثرش على هيبة الاب ادام ابنه

المشاركة الأصلية كتبت بواسطة hugan

والله يافندم معاكي في كل كلامك
خصوصا لما اكون دارس علم نفس
لكن المشكله انه مش مقتنع نهائي اني ووالدته خايفين عليه وعلي مصلحته
يعني مثال
ابني يهتم جدا بمظهره وعلي الاخص شعره
بيصرف عليه مصاريف جامده
وملابسه تقريبا ليه ميزانيه مخصصه ليه هو واخيه الاصغر منه
حاولت افهمه ان الاهتمام بالمظهر ضروري وشيء جميل
لكن يتحول الي كل حياته
هنا الغلط
وان واجبه حاليا الاهتمام بدراسته بقدر مظهره
وحاولت كتير اقنعه انه لازم يؤدي اللي عليه
وبعد كده يطلب اللي هو عايزه
بخلاف صراعه اليومي مع والدته علي المذاكره ودروسه
مع انه من المتفوقين
لكن التوفوق بالنسبه له ياتي كبند ثانوي في حياته مش اساسي
وجربت معاه نظام المكافاءت
تليفون محمول
ساعه
خليته يشترك في بظولات كارتيه واخد احزمه فيها
لكن الموضوع معاه مش اكتر من تسليه ولعب وهروب من المذاكره
المزعج ان اخوه لاصغر منه بيقلده تقليد اعمي

على فكرة طالما هوا بيحب حاجة و في حاجة تانية ايجابية متحاولش تضغط لانه هيعاند اكتر
حاول تنقل له وجهة نظرك مش بشكل اوامر لكن بشكل انك بتاخد رأيه
يعني مش هتؤمره ولا هتنهيه عن حاجة الا في الوقت المناسب
هتقول له ايه رأيك لو عملت كذا وكذا
طالما هوا متفوق هنحاول نكبر الجانب الايجابي و نبرزه
موضوع الاهتمام بالمظهر دي مرحلة وهتاخدلها وقتها
طالما الموضوع دة مش بيؤثر على تفوقه
طبيعي السن دة بيهرب من المذاكرة
بس لازم تحمله جزء من المسئولية
الفلوس اللي بيصرفها على مظهره لازم تخليه يشارك فيها بمعنى
انت بتديله مصروف تقول له لازم تدخر من مصروفك عشان تجيب اللي انت عاوزه وتدفع
حتى لو انت عندك المقطرة لازم يحس انه بيضحي من فلوسه
لو ما ادخرتش مش هاجيبلك
انت تدفع النص وانا النص
حبة حبة ممكن تلاقيه طالما دة بيأثر عليه هيقلل من الموضوع
والتجربة مش هتخسرنا حاجة

المشاركة الأصلية كتبت بواسطة sherifmt

حابب اشارك معاكم علشان اولادي برضة في نفس المرحلة الصعبة وكمان ظروف أصعب ولد 14 سنة وبنت 11 سنة خصوصا واني مغترب والأم كتر خيرها بتقوم بالدورين ام واب مؤقت وبحاول اعوض غيابي عنهم بشتي الطرق بنتكلم كل يوم بدون استثناء بالساعات زي ما اكون قاعد وسطيهم و بيجولي في أجازة نص السنة يقعدو معايا بالأسابيع ويرجعو شهرين يمتحنو ويرجعولي تاني أجازة الصيف كلها ورمضان ونرجع كلنا شهر قبل المدارس واسيبهم وارجع لوحدي لغاية نص السنه وهكذا السنة بتجر سنة..... ولله الحمد احنا احسن من غيرنا لكن برضة الوضع مش مستقر وتغير البيئة بالنسبة للولاد بنحاول نتستفسد بية بشكل أيجابي زي فسحة وكمان علاقتي بالولاد أصحاب جدا وخصوصا الولد هو عارف ان هو أعز أصحابي بعلمة السواقة والصيد والشطرنج وهو بيعلمني البلاي ستيشن والعاب تانية مؤخرا بدأت الاحظ أهتمامة بشكلة ولبسة وخصوصا موبايلة طبعا بدات بالتدريج اكلمة عن المرحلة اللي بيمر بيها وان دة طبيعي وان انا كمان في يوم من الأيام مريت بنفس المرحلة مع أختلاف الزمن والمؤثرات وكمان كلمتة علي التغييرات اللي بتتطور في صوتة و حجمة وجسمة (تقريبا دلوقتي أطول مني علشان اخر مرة شفته من شهرين كان طولي) ولله الحمد كل الأمور تحت السيطرة لكن كل خوفي وقلقي من أصحابه والشلة اللي بياخد معاهم الدرس مامتهم بتحاول تتابع وتختار الجروب اللي بياخد الدروس معاهم علي قد ما تقدر .....انا معاكم تماما القرب من دماغ أولادنا وزرع الثقة مع اليقظة الشديدة مهمة جدا ......انا سعيد للمشاركة علشان حاسس اني بفضفض معاكم.........تحياتي ودعواتي من مكة

اولا نسألك الدعاء من تلك الاراضي الطاهرة
ثانيا حضرتك ماشاء الله نموذج محترم لما يجب ان يكون عليه الاب
ما انطفعتش وراء العمل والجري وراء جمع المال دون الالتفات للثروة الحقيقية وهي اولادنا
طبعا ربنا يعين زوجتك عالمهمة الصعبة اللي هيا فيها
انا بأة عندي ولد ١٦ سنة وينت ١٣
الموضوع متعب جدا خاصة ان ابوهم تقريبا مش موجود اغلب الوقت و حتى لو تواجد بيبقى مجهد
بس بيحاول يلبي طلبات الاولاد النفسية على اد ما بيقدر
لكنه واثق فيا ورامي الحمل كله عليا
مشكلة الصحبة دي كارثة
اصحاب ابني معاه من كي جي ون وعارفة اغلب امهاتهم معرفة شخصية
واللي كان منهم غير سوي فضلت احاول واحاول في ذكر مساوئه لحد ما ادرك لوحده انهم مش كويسين و بعد عنهم
المشكلة ان ابني كتوم وبيعتبر دي رجولة
بيخبي عليا حاجات كتير باكتشفها بالصدفة
كنت الاول باهاجمه خوفا عليه بس غيرت اسلوبي بعدها عشان اسحبه انه يصارحني
في حاجات بيقولها وحاجات لأ
مخلياله خصوصياته ومش بافتش في حاجته بس باراقبه من بعيد
مرات قليلة جدا كان بيبقى ناس الفيس بوك مفتوح باشوف حواراته مع اصحابه عشان اطمن عليه بس
ولما اطمنت من سلوكه وسلوك اصحابه مهما كان مفتوح مش بابص لاني خلاص اطمنت لاسلوبه واسلوب اصحابه لان اغلبهم متربيين على ايدي
البنت مقدور عليها لحد دلوقتي لانها مش بتفارقني غير للمدرسة
حواراتها مع اصحابها ادامي
دروسها عندي في البيت
في اسس ماشيين عليها مفيهاش تفاهم
الحمدلله اتحجبت برضاها وباقتناعها
وربنا يعينا على تحمل تبعتهم ويجعلهم ابناء صالحين

ربنا يكون فى عون كل اب وكل ام وبالذات فى فترة المراهقه
عندى 3 ابناء 20 سنه .......17 .........12
كل واحد مختلف عن التانى
الاول
اتربى على الدلع والتدليل من اخواتى ووالدتى ووالدته حتى عمر 6 سنوات بحكم سفرى
ربيته على الشده والعقاب واصبح بيخاف منى ولايذاكر الاخوفا منى وعلى الرغم من عقليته الممتازه الا انه لم يتفوق فى المراحل الاعداديه والثانويه كماكان فى الابتدائيه
لم يكن كثير الخروج او السهر او الارتباط باصدقاء حتى الثانويه العامه
مع دخوله الجامعه طبعا اتقلب حاله واصبح شديد الاهتمام بمظهره وتسريحة شعره ولبسه الغريب واصدقائه وسهره معهم وكمان بداء يدخن سجاير مع عدم الاهتمام بالصلاه
حصلت مشكله معاه اكتر من مره وقام يشراء لاب خاص به ب 3500 جنيه بالتقسيط وموبايل s2 هديه من عمه وكل دا لزوم المظاهر
العلاقه بينا شبه علاقه يعنى يلزم اوضته
طبعا اضطريت لوضع ضوابط للخروج والسهر
علاقته جيده بوالدته واخواته عكسى علاقتنا بارده ولانتناقش فى كثير من الامور

طبعا فيه اخطاء انا وقعت فيها زى الضرب والشده ودا كان السبب الرئيسى اللى جعله يتحاشانى ويبتعد عنى وللاسف دى كانت نصيحة صديق الله يسامحه وكانت نصيحه سيئه جدا


التانى
لا اتذكر انى ضربته سوى مره واحده وهو فلذة كبدى فعلا
لايؤخر لى طلب مهما كان .......ملتزم ومتدين ومثقف ويشغل باله جدا بالسياسه ونتناقش فى كثير من الامور
اصدقائه مثله .......وهو مختلف عنه كثيرا ولكن الحلو مايكملش .......من فتره لاحظت انشغاله احيانا بالموبايل واغلاق حجرته احيانا للتحدث فى الموبايل ................المفاجاه اتضح انه بيحب ههههههههههه طبعا عرفت كده لما واجهته وبالدليل .......لم ينكر ولكن تساقطت دموعه مع اراده غريبه انه لايفعل شىء خطاء ......تحدثت اليه بهدؤ وتركته بعد سحب الموبايل لعدة ايام .......المهم استطعت تجاوز هذه المشكله معه وعاد لطبيعته وتلاشت ملامح واعراض الحب التى ظهرت عليه واحيانا تكون هناك قفشات حول هذا الموضوع مع علمى تماما بانه داخليا مرتيط بزميلته
الاخير
احاول زراعة الثقه فيه وتحميله مسؤلية تفوقه ولايمكن ان اعاقبه بالضرب بل فقط النصح ومحاولة جعله قريبا منى واظهار خوفى عليه وتبصيره بماهو مقبول وغير مقبول واحيانا اجعله اماما فى الصلاه ونتناقش فى كثير من الامور ومشكلته ادمانه الالعاب على الموبايل والكمبيوتر وقنوات المصارعه وحثه على التفوق خاصة انه متميز