السلام عليكم
فرسان الفيليشيا الأبطال، حبيت أقول لحضراتكم تجربة استخدامي لزيت موتور فيسكو في موتور الفيليشيا
طبعا أخوكم بصراحة مبيغيرش عن زيت ليكوي مولي من حوالي سنتين سواء في موتور الفيليشا أو البورا وحتى المرحومة البيجو، وكان بصراحة ممتاز ومشتكيتش منه بتاتا.
بحب اشوف النشرات الفنية للزيوت وبحكم خبرتي المتواضعة فبذاكر الزيوت دي إلى حد ما من نواحي فنية تخصصية، بصراحة لقيت مواصفات الفيسكو كويسة مع إني لاحظت إن اسعار برضه كويسة حتى مع ارتفاع الأسعار الإستهبالي اللي كلنا عايشينه في كل حاجة منها زيوت المواتير.
غيرت زيت موتور الفيليشيا بزيت فيسكو2000 درجة 20w50 الجركن الأخضر ولون الزيت أحمر شربات !!!!
وشئ مهم إننا نعرف إن مش معنى 2000 إنه بيمشي 2000كم بس لأ... معاك لغاية 5000كم أو أكتر (موضوع الكيلومتر ده مسألة فيها أقوال كتير جدا)، وأنا متأكد من كده، وخاصة إن البياع أو العامل في المحطة غالبا معلوماتهم خاطئة
ملاحظاتي وخاصة إني قاربت أول ألف:
- صوت موتور ناعم
- الزيت مغمقش علطول ولغاية دلوقت درجة لونه كويسة (علما بأني عاوز أغير فلتر بنزين وهوا)
- اللزوجة رهيبة وهو جديد وفي حالة سخونيته وبعد الاستهلاك المدة البسيطة دي
- سلاسة في النقلات دون أن العربية تزعق معاك حتى لو قرصت عليها
- المستوى واللزوجة منقدرش نحكم عليه إلا لما نوصل 5000كم مثلا
الخلاصة:
- أنصح باستخدامه
- سعره كويس
بالإضافة إلى إن الفيسكو 3000 حسب البيانات الفنية هيكون أفضل بس أديني بجرب الأولاني، وأحكم الحكم النهائي عليه بعد 5000كم على الأقل.
دي كانت تجربة في المرحلة الأولى بس حبيت أنقلها لحضراتكم،،، وتحياتي