الموضوع: طيب أعمل إيه دلوقتي؟ ..التيل الجديد بيصفر!! (وائل عطية)

شكراً ياهاني على الروح الجميلة دي وأنا عارف إنك بتتكلم بجد مش هزار
أنا امبارح رحت حوالي الساعة 6 مركز جسر السويس واللي أخرني إن كان للأسف في حادثة جامدة على طريق المطار (أنا كنت رايح من مدينة نصر) والطريق كان واقف
المهم رحت وكل الشياطين عمالة تلعب قدامي على كبوت العربية ورايح عايز أقفل مدخل الورشة بعربيتي ولكن للأسف ماكانش ينفع لأن كان في عربية واقفة، المهم ركنت ودخلت أسأل على الدكتور شوقي (صاحب الابتسامة الجميلة، اللي تأكل أجدع زبون الحلاوة)
المهم، قالولي كان لسه هنا دلوقتي، تلاقيه بيمر في الورشة ولا حاجة (واتضح في الآخر إنه كان زوغ)
للأسف رحت للمهندس خالد، ودا راجل مهذب جداً وماكانش ينفع إني أنفذ مخطط الخناقة اللي كنت ناوي عليه معاه، حكيتله على الموضوع وشكوتي من تيل الفرامل اللي لسه مغيره وكمان من إنهم ماجابوش الطارة اللي هايغيروها لسه، وكانت المفاجأة:
أولاً الطارة ماجاتش ومش عارف هاتيجي إمته
ثانياً ودا الأهم قاللي باللفظ مين اللي قالك إن التيل اللي اتركب من النوع الجديد، قولتله المدير بتاعكم ،
ضحك الأصيل .. وقال حضرتك كده بتديني معلومة جديدة تماماً، لأن التيل الموجود هو هو القديم، وكمان حكاية أنه يتغير على الضمان معنديش أي تعليمات بيها
المفاجأة بأه اللي بجد فعلاً إنه إداني رقم خدمة العملاء، قولتله ماهو معايا هاعمل بيه أيه، قاللي اتصل بيهم وقول أنا ليا قطعة غيار طالبها من فترة وماجاتش، قولتله دا كده مش طبيعي المفروض إنهم بينفذوا أي أوردر بتعملوه حسب الحاجة - قاللي أهو احنا من ناحيتنا وحضرتك من ناحيتك عشان يبقى فيه نوع من " البريشر " زيادة !! ضحكت وتذكرت في سري الموضوع اللي كنت دعيت فيه الأفاضل من أصحاب العربية للاتصال بالتوكيل وخدمة العملاء ومركز حماية المستهلك وما لاقاه هذا الموضوع من عدم استجابة لدرجة أن أحد الأخوة المحترمين قال باللفظ إن دا يبقى " لعب عيال " ودي أول مرة باقولها دلوقتي
بس عايز أقول لحضراتكم إن التوكيل نفسه قاللي اتصل بخدمة العملاء علشان تضغط عليهم (إذاً دا مش لعب عيال ولا حاجة بالعكس دي كانت دعوة لعمل فعلي بعيداً عن الشعارات)
المهم انتهيت مع المحترم المهندس خالد (اللي مش في إيده حاجة يعملها) إلى أنني هاروح يوم الأربعاء القادم لعمل تعديل التكييف و" هايبصلي" على التيل وهايشوف حكاية الطارة يمكن تكون جت.
مشيت طبعاً وأنا أجر أزيال الخيبة، لأني ماعملتش حاجة ومش عارف هاعمل إيه
مش قدامي غير إني هاروح يوم الأربعاء وأشوف ردهم إيه.
ملحوظة هامة:
يا جماعة يهمني هنا التأكيد على نقطة مهمة، وهى إن العربية معايا ممتازة والحمد لله والتكييف بعد الصيانة اللي عملوها أصبح أكثر من رائع.
النقطة السلبية اللي مخلياني قرفان فعلاً هي الطريقة الهمجية وغير الاحترافية بالمرة والتي يتعامل بها مركز جسر السويس (والصحراوي منظم بعض الشيئ ولكنه يتبع نفس سياسة الهبش ثم الهبش والعميل يغور في مصيبة) وللأسف دا خلاني أقول إن الضمان اللي معانا دا ملوش أي لزمة، غير في تناول كوب كبيييييييييير من منقوعه كل يوم صباحاً ومساءً ولا مانع من رش العتبات المباركة للسيارة بهذا المنقوع لطرد العكوسات والأعمال السفلية !!!!!!!!!!!!!!!!!!!!!!!!!!!!!!!!!!!!!!!!!!!.