الف شكر على نقل التجربة
عرض للطباعة
الف شكر على نقل التجربة
من المثير للضحك والسخرية أن الـ Throttle Body بدأ أعراض تلفه تظهر بعد إصلاح مشكلة تلميس السلك.....والليلة وقف عن العمل تماماً :grin54::grin54:
زي ما قلت قبل كده.....ساعات لما أمشي كتير بالعربية وأبطلها وأدور تاني عالطول ( بمون بنزين مثلاً ) أجد لمبة الكويل نورت عند فتح الكونتكت قبل الدوارة.....أقفل الكونت وأفتح تاني اللمبة تطفي والعربية تدور عادي......وساعات لما أدور واللمبة منورة متعملش أي مشاكل والعربية تمشي عادي
إلي حصل المرة دي إني لما وقفت أمون بنزين وفتحت الكونتكت تاني اللمبة نورت وبعدين أقفلت وبفتح الكونتكت تاني برضه منورة....دورت العربية عشان إلي ورايا ميعطلش.....بس المرة دي مفيش دواسة بنزين تحت رجلي....مفيش أي تحكم.....بطلت وإنتظرت 20 ثانية ودورت وكله تمام
فضلت على الحال ده لمدة أسبوع تقريباً
اليوم إتزتقت في شارع النصر بسبب وقفة موظفي الكهرباء الله يسامحهم.....مشيت من نادي السكة حتى إشارة رابعة على الغيار الأول وأخدتها تقريباً في 45 دقيقة.....ركنت العربية تمام.....نزلت أدورها تاني بعد 4 ساعات عشان أمشي....لمبة الكويل حلفت ما تطفي ومفيش بنزين تحت رجلي لما أدور العربية
أيقنت تماماً إن البوابة كده عمرها الإفتراضي إنتهى وحمدت الله
الحمد لله على كل شىء
أدعو لي إن العربية تدور الصبح عشان أروح أغير البوابة في الحرفيين عشان مش عايز أدفعلي 300 جنيه في ونش.....أو أضطر إني أستعين بالله ثم بالفيديو إلي يبوضح كيفية فك البوابة لأن كل الأدوات والعدة معي بفضل الله :coolio:
الله المستعان
أستغفر الله
أسف....خطأ لفظي في جملة أضطر أستعين بالله
المقصود الإضطرار بفك البوابة بنفسي
الله المستعان
أنا فكيت بوابة ميجان على فكرة ... بس مش عارف أنت موتورك كام سى سى ؟؟ وشكله عامل ازاى من فوق ؟
على العموم هعملها موضوع وياريت تشوفه
ربنا معاك ..
ابقى تابع معانا عملت ايه بالتفاصيل
علشان شكلها هتعملها عندى
وبالاسعار الله يكرمك ...
وهل كان السحب وحش معاك؟
وهل العربية بتحس انها بتقطع خفيف معاك ؟
مستنى ردك
تم بحمد الله تغير البوابة والعربية تمام
البوابة من عند عصام بشطر بـ 750 جم
مشكلة موتور البوابة إن أعراضه بتختلف
أنا عندي مكنش ليه أي أعراض طول ما العربية ماشية تمام......سحب زي الفل ومفيش أي تنتيش
المشكلة كانت بتظهر لما أبطل العربية وأدورها تاني لمبة الكويل بتفضل منورة ومفيش إستجابة لدواسة البنزين مطلقاً والـ rpm بيفضل ثابت على 10 أو أعلى بسيط وممكن ينزل فجأة لـ5 ويطلع تاني وإنت بتتفرج عليه معندكش أي تحكم في الدواسة
هي إيه الأعراض عندك ؟
هى بوابة ميجان قدام عينيك بس مش هتطولها غير لما تعمل الآتى
هتشيل فيشة حساس الهواء
هتشيل فيشة حساس الكامة
هتشيل خرطوم السيرفو الواصل للموتور
هتشيل خرطوم راجع الزيت
هتشيل خرطوم حساس أو فايص البنزين زى ما بيتسمى
هتفك الوصلة اللى بين فلتر الهواء والبوابة
هتفك 4 توصيلات ال 4 كويلات
هتشيل فيشة سولونيد ترس الديفزر
هتخلع اى خراطيم كهرباء متثبة على غطاء الموتور الأسود
هتفك غطاء الموتور متبت ب 8 مسامير فى الموتور (بيبة )
هتطلع الغطاء بالبوابة
هتفك البوابة بالبيبة برضه ليها 4 مسامير وتشيل الفيشة بتاعتها طبعا فيشة رخمة قوى
مش بسيطة ... وعايزة حد مش أول مرة يشتغل فى عربية عشان لو نسى خرطوم السيرفو تبقى مشكلة :)