الحمد لله : ركبت بريدجستون b250 .. مع الشكر أ/طارق علاء و أ/محمد ممدوح
الحمد لله : رحت انهارده بريدجستون fit&fix و قمت بتركيب كاوتش بريدجستون B250 اندونيسي المقاس الاستاندرد للانوس 13/175/70 .. سعر الفرده 395 جنيه شامل الفك و التركيب و البلوف و الترصيص . و عليها عرض خصم لان السعر الاساسي 440 جنيه .
كان ادامي عندهم كاوتش فايرستون TZ 700 تايلاندي عليه خصم من الشركه .. سعر الفرده 360 شامل فك و تركيب و بلوف و ترصيص . و الاستاذ/ طارق و الاستاذ / ممدوح رشحوا ليا الفايرستون .. و كان نفسي اركبها .
لكن لقيت تاريخ انتاجها (0412) ... يعني الاسبوع الرابع سنه 2012 ...يعني انتاج 1/2012 .
اتصلت باستاذ/ طارق و خدت رأيه .. و قاللي كده بقالها سنه و 3 شهور .. و نصحني بعدم تركيبها لان انتاجها قديم و كان الاختيار التاني ال B250 ...لان تاريخ انتاجها (4712) يعني الاسبوع ال 47 سنه 2012 يعني شهر 12 /2012 ... بقالها 5 شهور منتجه ... و نصيحه استاذ طارق كانت بناء علي ان الواحد المفروض بيشتري الكاوتش انتاجه حديث .. علي الرغم من انه كان مرشح لي الفايرستون بقوه .. و انا كان نفسي اركبها .. لكن التزمت بنصيحه أ/ طارق و توكلت علي الله .
في بريدجستون حاولوا اقناعي باني اخد الفايرستون و قالولي ان الكاوتش قديم بس بيخزنوه بطريقه صحيحه ... بس انا مارتحتش ... خصوصا ان عليها خصم جامد .
في النهايه قالولي انه سواء بريدجستون B250 او فايرستون ... الاتنين مستواهم واحد .
و قبل التركيب قالولي فيه بريدجستون B250 اندونيسي و فيه هيه هيه الفرده تايلاندي . كان الاستاذ/ ممدوح نصحني سابقا بإني اجيب الاندونيسي .
ملاحظاتي كألاتي :
1- لازم و انت بتركب الكاوتش تهتم بانك تقرأ تاريخ الانتاج من علي الكاوتش . لان مدير الفرع كان مفهمني ان الفايرستون انتاجه في الاسبوع ال 40 من سنه 2012 ... و العامل بيركب ..فوجئت بانه الاسبوع الرابع من سنه 2012 و ليس الاسبوع ال 40.
2- قرأت المواصفات الفنيه زي ال tempreture و كانت A ...و ال Tradeware 200... و ال Traction B
قلقني موضوع ال TRACTION B لان معلوماتي انه لازم يكون A ...او AA .... لكن حعمل ايه .
3- لايوجد علامه حمراء علي الكاوتش لظبطها مع العلامه اللي موجوده في الجنط ... و لكن يوجد علامه صفراء و قام العامل بظبطها امام البلف .. و كنت عارف اهميه الموضوع ده في انه بيحقق الاستداره المثاليه للكاوتش الي حد كبير .
رحت ظبطت زوايا .. و كانت النتيجه ان الزوايا مظبوطه و كشف علي العفشه و وراني قاعده الموتور اللي تحت طريه جدا و لقيت الموتور بيتهز جامد من تحت عند المارشدير .
حبيت انقل لكم التجربه من أولها لأخرها .
