ميامي...أسوء مصيف

السلام عليكم جميعا...
لسه راجع من المصيف (ميامي-الاسكندرية) و حبيت أحذر أي حد أنه يصيف فيه ... ليه؟

1- زحااااااااااام من هنا للصبح لدرجة أن العربية ركنتها طول فترة المصيف علشان عارف لو طلعت أتفسح بيها هارجع مش هلاقي مكان أركن فيه.
2- البياعين و السماسرة و المشرفين على الشواطئ أقدر أوصفهم بالزبالة و أنا ضميري مستريح ... نصب و سوء معاملة و قلة ضمير و خناقات يوميا و أشكال فعلا ما يعلم بيها الا ربنا.
3-أسعار تأجير الشقق المفروشة غالية جدا مع أنعدام النظافة و الصيانة للشقة (سباكة - فرش - كهرباء ...) و السمسار يقولك "يا بيه ده موسم"!!!
4- طبعا الشواطئ على نفس الحال .. زحام و استغلال و مياه غير نظيفة معظم الأيام
5-أصبح معظم رواد ميامي الأن هم من أدني الطبقات الاجتماعيه في البلد...

لللأسف أنا أخر مره زرت فيها ميامي كانت من 7-8 سنين و صورة ميامي الجميلة كانت في خيالي لكن أتصدمت فعلا لما صيفت فيها السنة دي...

الحاجة الوحيدة اللي استفدت بيها هي شويه الهوا الحلويين اللي مش موجدين في القاهرة اليومين دول.

و سلام...

1 فعلا زحام شديد والناس بتريح دماغها ومش بتمشي بالعربيات عشان مش حيلاقو مكان
2السماسرة فعلا صعب التعامل معاهم
3 بالعكس الاسعار السنة دي قليلة لان يقال ان الموسم رايح رمضان وكل سنة وانت طيب ,ممكن تلاقي شقة ب 80 وتكون معقولة (شباب)
4 الشواطئ انضفهم اللي قدام فندق رمادا وشاطئ الزهرة اللي عند سينماالمنتزة
5الكلام دة بقالة مدة
حمد الله علي السلامة

الله يسلمك يا محمد ... بس عايز أقولك أني مسمعتش رقم 80 جنيه و لا حتى 100 جنيه في ميامي خالص ... من 120 و انت طالع بدليل أن اللي على البحر بتتأجر في الرانج من 450 ل 600 جنيه في اليلة!!!
المشكلة أنك بيدفع و تفاجأ بعد كده بأن الشقة خربانة !!

بس بالنسبة لحي المنتزة فهو جميل جدا فعلا و كمان أماكن كتير في اسكندرية لكن ميامي neveeeeeeeeeeeeeeeeeeeeer

اقتباس:

---

المشاركة الأصلية كتبت بواسطة Mohamed-Saoud

الله يسلمك يا محمد ... بس عايز أقولك أني مسمعتش رقم 80 جنيه و لا حتى 100 جنيه في ميامي خالص ... من 120 و انت طالع بدليل أن اللي على البحر بتتأجر في الرانج من 450 ل 600 جنيه في اليلة!!!
المشكلة أنك بيدفع و تفاجأ بعد كده بأن الشقة خربانة !!

بس بالنسبة لحي المنتزة فهو جميل جدا فعلا و كمان أماكن كتير في اسكندرية لكن ميامي neveeeeeeeeeeeeeeeeeeeeer

---

الشقق اللي علي البحر علي طول فعلا بتوصل ل600 ولو نضيفة اوي بتعدي ,انما في الشوارع الجانبية ,من 100 وطالع ,80 دي جوة شوية وحتلاقيها عالية وبدون اسانسير ,تعوضها السنة الجاية ان شاء الله ,علي العموم افضل وقت للي عاوز يصيف في ميامي وعاوزها فاضية هادية جميلة اول 9 بتبقي حاجة تانية

معلش تعيش وتاخد غيرها ... وأبقى إسأل واحد إسكندراني قبل ما تروح تصيف المرة الجاية في إسكندرية

انا مثلا عايش في إسكندرية ومش بعتب ميامي نهائيا في الصيف او حي شرق بصفة عامة إلا للشديد القوي ... للاسف اصبحت ميمي وسيدي بشر مصيف للشركات والقري (مع إحترمي الشديد للمصطافين القادمين من قرى مصر) بس للأسف يجب مراعاة بعض الأداب والذوق العام وايضا المحافظة على النظافة وده مش بيحصل نهائيا..... فلو عمرك ما شفت البحر روح ميامي حتستمتع ... بس لو عندك مزاج ومعاك فلوش مش كتيير قوي عليك وعلى مطروح او الساحل الشمالي..... ميامي وسيدي بشر اصبحت مستنقع !

ارجع وأقولك محدش بيتعلم ببلاش :)

اولا حمدا لله علي سلامة حضرتك ..... بالنسبة للاسكندرية نفسها فبقت زحمة جدا خصوصا في فصل الصيف انا من منطقة سموحة في اسكندرية و بيطلع عيني علشان الاقي مكان لركنة العربية قريب من بيتي
بالنسبة للتصييف في اسكندرية فانا عن نفسي بقالي اكتر من 10 سنوات ما بانزلش البحر بتاع اسكندرية ده ابدا ولا حتي افكر اني انزله للاسباب الاتية :
1-مياه البحر نفسها مش حلوة و لا تشجع اساسا علي النزول دي حتي بقت اشبه بالترعة و الرملة ما بقتش بيضاء زي زمان بقي لونها بني غير الزبالة المرمية يمين وشمال اللي تلاقيه ياكل بطيخة ويروح سايبها مكانه و اثار حلل المحشي و المكرونة برضه ليها دور
2-الزحام وما ادراك ما الزحام تلاقي مالايقل عن 4 صفوف شماسي وراء بعض لدرجة انك بتلاقي شمسيتك بصعوبة وانت طالع من البحر
3- بحر اسكندرية بقي مليان ناس بيئة ولاد تيييييت اللي يشتم هنا و اللي يسب الدين هنا غير المناظر المقرفة العيال اللي تلاقيها نازلة بالملابس الداخلية والعيال الصغيرة اللي بينزلوا البحر بلابيص

انا عن نفسي باحب اصيف في مرسي مطروح و لا بديل عنها خصوصا في شهر يونيو او سبتمبر علشان بتبقي فاضية....... وانا انصح حضرتك تجرب تصيف السنين اللي جاية في مرسي مطروح و حتدعيلي ان شاء الله

سيدي الفاضل حضرتك بتقول انك اخر مره جيت فيها ميامي من 8 سنين
وايامها كانت شواطئ اسكندريه تمتد من اوي راس التين لحد المنتزه الا الجزي اللي من اول الشاطبي لحد المنشيه كان حاجز صخري
دلوقتي الكونيش كله بقي حاجز صخري ومفيش غير كام شاطئ في راس التين ومن اول ميامي لحد المنتزه بس
وايامها كانت ميامي من انضف المصايف واحسنها بالنسبه لشرق اسكندريه وبرضه اغلاها مقارنه بالاماكن التانيه
دلوقتي كل الناس دي بقت تروح ميامي لانها بقت اول الكونيش ومن ناحي تانيه بقي كل اللي عنده شقه في ميامي بياجرها سواء كويسه ولا تعبانه لان الطلب زاد جدا عليها
وبناء عليه البايعين والناس اللي كانت بتسترزق في الموسم ده كلهم اتجهوا الي ميامي ومابعدها المختصر
ان كثافه المصيف انحصرت في ميامي وما بعده من شواطئ ومناطق سكنيه
وحتي العجمي اتحولت لشواطئ خاصه كلها ما عدا شاطئ او اتنين علشان كده الكثافه زادت
لما تحب تصيف تاني وتشرفنا في اسكندريه ابدا فكر انك تروح يا اما العجمي او شاطئ النخيل الشقق هناك نضيفه اوي والاسعار كويسه جدا

لعلمك اللى بوظ شواطىء اسكندريه وخصوصا سيدى بشر وميامى حاجه واحده بس وهى رحلات اليوم الواحد ودى دلوقتى مبقتش متقيده بيوم معين يعنى كل ايام الاسبوع شغاله
وطبعا انت عارف ان معظم رحلات اليوم الواحد دول بيبقوا عاملين ازاى
ولعلمك ان تقريبا 95% من الاسكندرانيه مبيرحوش البحر وان حصل وحبينا نروح بيكون اى مكان على الساحل الشمالى او مرسى مطروح
وعلى العموم حمدا لله انك روحت وجيت بالسلامه ويا سيدى ماشى (مره عسل ومره بئه مش زى كل مرة)المهم انها كانت فرصه جميله اننا نشارك معاك فى الموضع
واسكندريه كانت منوره بيك وبعيلتك ياباشا

يا راجل
حد يروح ميامي
دي قنبلة موقوتة
دول بينامو في الشارع وتشم الريحة حتى لو قافل ازاز عربيتك هاتتدخلك الريحة برضه
اوووووووف
ده انا عندي شقة في العجمي هانوفيل ولما بحب انزل العيال المية بوديهم الييطاش في شواطيء خاصة زي بيانكي او غيرها
او استنى لما ارجع مصر انزلهم البسين في النادي غير كدة ابدا
وروحت مطروح 5 ايام في شهر 7 روووووووووعة فعلا بسة ممملة اخرها 3 او 4 ايام بالكتير
انا لما باجي اسكندرية باجي اتفسح
يوم داون تاون
يوم كارفو وملاهي
يوم جراند بلازا
يوم البيطاش او سينما
كدة لكن اخاطر وانزل ميه
ده انا معملتهاش في مارينا (بدون نق يا جووود ويف) يا بتاع لسان الوزراء :arghh:
ها ها
حمد الله على السلامة

هول لسة فيه حد بيصيف فى ميامى، دى راس البر برقبتها يا راجل

اللى تدفعه فى ميامى تأجر بية مكان محترم فى الساحل الشمالى

بلا قرف

نصيحه من أسكندراني

بلاش ميامي ده خالص

نصيحه من اسكندرانى لو عايز تصيف فى اسكندريه انزل فى نص شهر 9 تكون المدارس على الابواب وكل الهمج مشيوا من البلد
على فكره انا ساكن فى العصافره وطول الصيف مش بفكر حتى اتمشى على البحر لانه بيبقى مقرف وزحمه والحمد لله احنا شارين مكان فى الجراج بتاع العماره من زمان كان بحوالى 4500 جنيه دلوقتى مكان زى ده بيتباع مش أقل من 40 الف

على فكرة يا كريم يا أبن عم منير!!! لو بتقول كدة على مارينا وإنك ما أستنضفتش تنزل فيها وإنها ما تتنزلش يبقى إنت ماروحتش مارينا اصلا وبتشتغلني .... يا إما كنت مقضيها نوم طول النهار وبالليل ديسكو لحد الصبح ... والأتنين أسوأ من بعض!!! بسين إية إللي العيال بتعمل فية بي بي وإللي جربان وإللي عنده هرش إلخ إلخ ..... يع يع يع

يا شقيق .... ميا البحر في مارينا جميلة ونضيفة جدا جدا جدا جدا بالظبط زي مطروح وكمان هادية وممكن النزول فيها كل يوم بغض النظر عن سؤ الجو وحالة البحر لانها محمية بحواجز الأمواج .... ده طبعا غير الوجة الحسن وال..... الحسن بردة إللي مش ممكن تلاقية بالكترة دي في مطروح :)

صحي النوم يا كيمو :) صباحووووووووووووو

يا جماعة مش عارف أقول أيه؟ مش هاقدر أشكر و أعقب على كل ردودكوا لأنها كلها 100% و فعلا أستفدت منها جداااااااا

أولا.. بالنسبة لردود الزملاء الاسكندرانية أبتديت أشم ريحة أهل أسكندرية الجمال اللي كانوا دايما يرحبوا بينا كضيوف لما نزورهم و اللي فعلا نسيتهم و يمكن ابتديت أكرهم بعد المناظر اللي شوفتها في المصيف السنه دي.

ثانيا.. أنا فعلا عندي جهل بالمصايف لأن فين و فيييين لما أروح مصيف مع الأسرة بسبب ظروف الدراسة و الشغل الخ الخخخ و فعلا أنا كنت ناوي أستشيركوا قبل المصيف بس هي جت كده فجائية و كمان مكنتش متخيل أني هشوف الوجه القبيح لميامي زي ما شفته السنه دي أبدا

يا خسارتك يا اسكندرية :no4:

ياراجل ميامى وسيدى بشر والعصافرة وخالد بن الوليد مقفولين طبعا انا راجع من اسبوع

وماكنتش بعرف اخرج بره المعمورة بسبب الحبسة اللى بتحبسها على الكورنيش مقفول قفلة سودا بالذات الخميس والجمعة

انا لسه راجع من اسكندريه من اسبوع كنت قاعد فى المعموره الصراحه تحفه و نضيفه بس اسعار الايجار غاليه شويه

فندق رمادا وشاطئ الزهر

عندك حق والله انا السنة دي خبت ورحت صيفت في ميامي وندمت اشد الندم. الشقة كنت ماجرها ب 500 جنية في اليوم وكانت مليانة فئران. الشط دخولة ب 7:20 ويا ريتة نظيف بل كان مطين. بصراحة غلطة عمري ومش ها تتكرر تاني. وعلي فكرة رحت يوم المنتزة عشان اغير بس لاقيت الوضع هناك بردة نيلة. مش عارف الواحد يصيف فين في بلدنا دي؟

اقتباس:

---

المشاركة الأصلية كتبت بواسطة goodwave

على فكرة يا كريم يا أبن عم منير!!! لو بتقول كدة على مارينا وإنك ما أستنضفتش تنزل فيها وإنها ما تتنزلش يبقى إنت ماروحتش مارينا اصلا وبتشتغلني .... يا إما كنت مقضيها نوم طول النهار وبالليل ديسكو لحد الصبح ... والأتنين أسوأ من بعض!!! بسين إية إللي العيال بتعمل فية بي بي وإللي جربان وإللي عنده هرش إلخ إلخ ..... يع يع يع

يا شقيق .... ميا البحر في مارينا جميلة ونضيفة جدا جدا جدا جدا بالظبط زي مطروح وكمان هادية وممكن النزول فيها كل يوم بغض النظر عن سؤ الجو وحالة البحر لانها محمية بحواجز الأمواج .... ده طبعا غير الوجة الحسن وال..... الحسن بردة إللي مش ممكن تلاقية بالكترة دي في مطروح :)

صحي النوم يا كيمو :) صباحووووووووووووو

---

مين قال بسين وبي بي فيه
انا قصدي على ريحة رحلات اليوم الواحد في ميامي
انت جبت الكلام ده منين ولا قريت مشاركة حد تاني وبترد عليا يا شقيق
انا بقول مانزلتش المية من مارينا ماعملتهاش فيها وهيا نضيفة هانزل في اسكندرية
وعيب عليك تتهمني كدة يا شقيق:ANSmile13:
ديسكو ايه تعرف عني كدة ولا بشتغللك ايه بس هو انت مفرش تريكو:no4:
تعرف المكان ده ولا لاء يا شقيق
يا بتاع مصدات الامواج:nopity:

http://www2.0zz0.com/2008/08/23/00/230923854.jpg