الموضوع: تجربه تجديد رخصه القياده

السلام عليكم ورحمه الله وبركاته
من اسبوع ببص في الرخصه لقيتها منتهيه يوم 18/4/2013 رخصه القياده طبعا الرخصه بتبقى 10 سنين فالواحد مش بيبقى مركز مع التاريخ
المهم قلت اشد الرحال على المرور للتجديد المرور هو مرور مركز ومدينه ميت غمر محافظه الدقهليه
نزلت الساعه 9 ونص طبعا انا مكنتش عارف اخد ايه اصلا بقالي فتره كمروحتش فكنت واخد معايا روشته باطنه ورمد وصور شخصيه والبطاقه
وصلت هناك لقيت الشباك فاضي قلت قشطه دخلت للموظف قالي هنحتاج براءه ذمه من النيابه وهنحتاج دمغات والذي منه بس مفيش هنا دمغات الاحسن تعالا كمان يومين تكون جت قلت له طيب شكرا طلعت على النيابه عملت براءه الذمه وروحت المركز جبت طابع الشرطه وروحت البريد جبت الدمغات وطيران على المرور كانت الساعه تقريبا 10.30 روحت للموظف قالي ايه لقيت قلت له الحمد لله قالي طيب هاتلنا ملف تجديد روحت جبته ورجعتله كتب بيانات وقالي خد امضي الورقه من الظابط دخلت للظابط سلام عليكم ومردش عليه هههههههه المهم روحت حاطط قدامه الملف راح هو واخده وماضيه رجعت للموظف قالي عاوزين صورتين للبطاقه روحت رايح مصورها وراجع له قالي طيب روح هات بقه استمار 256 روحت رايح جايب 256 ور راجع له تاني قالي امضي هنا قالي روح الخزينه ادفع وتعالا وهات البطاقه قلت له قشطه مضيت قالي روح بقه استنى عند الشباك بتاع الظابط
روحت بقه فضلت ملطوع من الساعه 11.30 للساعه 1 تقريبا ليه بقه عشان البيه الظابط خرج
ليه بقه عشان الحلوين بتوع التاكسي والسرفيس عاملين اضراب وقاطعين شارعيين مهمين جدا وحيويين جدا ومتجمهرين عند مجلس المدينه والظابط راح لهم يتحايل عليهم عشان يفتحوا الطريق ما هي زيطه بقه
طبعا قعدت ادور على البطاقه لانها بتكون مع موظف والرخصه مع موظف تاني وحاجه هرتله لقيت البطاقه وقعدت الف على الرخصه اروح للشباك المخصوص يقولي مفيش وهو عنده جوه ههههههههه يعني اروح له يقولي مفيش بطاقات واتاريه بيديها للبوفيه تروح تستلمها منهم مش عارف ايه علاقه البوفيه بتسليم الرخص روحت استلمتها الحمد لله اخيرا

المهم هي العمليه كانت ماشيه نوعا ما كويس ومفيش تعطيل صراحه من الموظفين لكن في غباء من المواطنيين كعاده الكائن المصري لازم الفتاكه والفهلوه وعدم الانتظام في طابور
يعني مثلا كنت واقف انا وقدامي اتنين بس يعني تلاته فقط والحياه ماشيه بنشتري دوسه تجديد قجأه الاقي كائن هولامي بيزفلط نفسه من الجمب وعاوز يشتري وهكذا بقه على كل شباك اي ثغره بس تكون قدامك او جمبك في الشباك تلاقي كائن هولامي بظظ فيها سواء بايده او رجله او مناخيره اي حاجه المهم يحشر نفسه وخلاص حاه اخر قرف حاول تحلق قدر الامكان على الشبك وانت واقف عشان متلقاش واحد في ثانيه داخلك من اي حته هههههههه انا كنت بحلق فعلا مش هزار

المهم الاوراق المطلوبه للتجديد عشان اللي كان زي حالاتي مش عارف هي
1-روشته باطنه و رمد من دكتور عيون وباطنه انك سليم وميه ميه طبعا عليهم صورتك الشخصيه ومختومه من الدكتور
2-صورتين شخصيتين
3-طبعا هيكون معاك البطاقه والرخصه القديمه+ صورتين كمان للبطاقه
4-براءه ذمه من النيابه التابع لها
5- ب 4 جنيهات طابع شرطه + 50 قرش دمغه+ 2 جنيه مهن طبيه
ده اللي هتجيبه انت + بقه دوسيه تجديد من المرور نفسه ب 8 جنيه + استماره 256 ب 3.25 جنيه بس كده
طبعا المصاريف بخلاف الدوسيه والاستمار بتكون 85 جنيها تسدد في الخزينه

طبعا طابع الشرطه الموظف في الاول قالي مش موجود خالص وتعالا كمان يومين اكتشفت بعهد كده ان في اشخاص معاهم بس بيبيعوه اغلى من سعره طبعا بس انا كنت اتصرفت الحمد لله
احسن حاجه انك تجهز كل الحاجات دي قبل متروح عشان ما تتمشورشي
اتمنى اكون افدتكم شريف مصطفى