يارس مانيوال ولا فيات بونتو كلاسيك
عرض للطباعة
يارس مانيوال ولا فيات بونتو كلاسيك
انا عارف ان المقارنة غريبة شوية بس لما شفت البونتو الكلاسيك دة عجبتنى اوى شكلها وسمعت انها ايطالى 100/ وكمان سمعت انها عربية حمالة اسية على الاخر وعفشتها ناشفة وموفرة جدا فى البنزين وحسيت ان سعرها 75 الف ( جنوط اسبور 2 ايرباج سنتر لوك زجاج كهربا امامى فوج لايت باور تكيف بدون كاسيت وفيها نظام تحكم فى اتجاة الاضائة فى الكشافات الامامية ونظام مساعد للباور اثناء الركن )
اليارس طبعا حبيبتى معايا منها موديل الاتوماتيك الفول اوبشن بس السؤال هنا
تشترى بونتو 1300 مانيوال ب75
ولا يارس مانيوال فاضية ب88 او بالسنتر والكهربا والكاسيت ب 94
هل الفرق بتاع اليارس يستاهل وهل اصلا البونتو دة فعلا عربية معمرة وياريت الناس تكلمنا على الفروقات بينها وبين اليارس من حيث
1: قوة الصاج
2:سحب الموتور وجودتة
3:استهلاك البنزين
4:اسعار قطع الغيار وتوافرها
5:جودة الخامات وعمرها
6:سعر اعادة البيع
حتى تعم الفائدة على الجميع...................................... ..................................
ياريس.......
طبعا ياريس
بس الفرق فى السعر حتاخد فى المقابل موتور اقوى و توكيل احسن و حاجة احدث و فرق شاسع فى المساحة الداخلية و الشنطة و سهولة البيع و توافر قطع الغيار
دي فئة و الأخرى فئة مختلفة تماما
المساحة ............. الياريس
أما بالنسبة للإعتمادية و قطع الغيار و توفير البنزين
الأثنين يتساووا
قوة المحرك
الياريس تكسب
التوكيل
التويوتا يكسب ( توكيل تويوتا محترم من ناحية خدمة ما بعد البيع ) و إن كان هناك تحفظ على طريقة التسعير المتبعة
البونتو عربية قوية و بتعيش و معمرة جدا و قطع غيارها متوفرة
إعادة البيع ........... مش لصالح الهاتش باك في مصر
يعني العربية بتأخد وقت على ما تبيع لأن ليها زبون مخصوص
و بصراحة ........... مقارنة ظالمة للأثنين .... لأن الياريس عربية سيدان و مساحتها أكبر و زبونها مختلف عن البونتو
بس أنا بعشق البونتو و بعش فيات .......... شركة محترمة بجد
يعنى صاج قوى وسمكة مناسب
لو عيل ركن بكوعة على العربية ميتطبقش معاه
ولو اتخبطت بكورة عيال بيلعبوا فى الشارع ميتطبقش
ولو خدتلك خبطة خفيفة تقدر تردة على البارد او الساخن بدل ما تروح تشترى رفرف او باب عشان واحد خبط فيه الكورة
شكرا على ردك :).
بس هو كان سؤال تهكمى, عشان انا مش مقتنع "بقوة صاج" مثلا فى فئة معينة.
انا افضل العربية اللى تمتص القوى الناتجة عن الحوادث وما ينتج عنة من دمار للعربية بدل من تمريرها لركابها.
كلام سليم
بس فيه حاجة
في بلد زي مصر .......... لازم صاج العربية يكون متوازن شوية
علشان بعد كام سنة تكون حالة الصاج هي هي .......... و ميأثرش فيها زلط الدائري و الرملة و تحميلات الأطفال الأشقياء في الشوارع و قعدات الحبيبة و الأخوة الظرفاء اللي أفتكروا أن عربيات الناس في الشارع هي إمتداد للكنبة اللي في بيتهم
متهيألى ممكن الموضوع يبقى أوضح لو كان فى تقييم بالتفصيل للبونتو كلاسيك . ياريت لو حد عنده تفاصيل أكتر عنها تبقى حاجة مفيدة أقوى
اقتباس:
متهيألى ممكن الموضوع يبقى أوضح لو كان فى تقييم بالتفصيل للبونتو كلاسيك . ياريت لو حد عنده تفاصيل أكتر عنها تبقى حاجة مفيدة أقوى
تقييم شامل للفيات البونتو و تاريخ السيارة
بدأ إنتاج الفيات البونتو عام 1993 و ظهرت أول نسخة من هذه السيارة في سبتمبر من نفس العام
و كان هناك خطط لإستبدالها بالفيات الأونو القديمة
فازت البونتو بجائة أفضل سيارة أوروبية في هذ الحجم عام 1995
و تفقوت هذه السيارة على سيارات المنافسين بسبب الجودة و الأداء و السعر و من أمثلة المنافسين الذين خسروا كثيرا في أوروبا المنافسة أمام هذه السيارة هم
أوبل كورسا ........... فولكس فاجين بولو
و أصبحت أكثر سيارة شعبية لفيات في أوروبا و من أكثرهم نجاحا و تحقيقا للأرباح للشركة العريقة
صورة لأول موديل من هذه السيارة ( الجيل الأول 1993 )
http://i26.tinypic.com/2hxbntc.jpg
تم إنتاج النسخة الرياضية من هذه السيارة و تم تزويدها بمحرك 1.4 سم مكعب و تكنولوجيا التوربو التي جعلت المحرك ينتج 130 حصان و يصل لسرعة 200 كم / س
و تم توقف إنتاج هذا الموديل الرياضي ...... نظرا لمخالفته قوانين النبعاثات البيئية الأوروبية
و تم إستبدالهم بمحركين أخرين بقوة 1.2 أي 1242 سي سي 16 صباب .... و عدد غيارات قدره 6 غيارات ..... و تم تزويده بتكنولجيا CVT لصندوق التروس المكون من 6 سرعات و في بعض النسخ 7 سرعات
مواصفات المحركات التي كان يتم يقديمها في السيارة فيات بونتو من عام 1999 إلى عام 2003
محرك رقم 1 ( المحرك الموجود في سيارات بونتو في مصر )
سعة 1242 سي سي .... بينتج 64 حصان عند 5500 لفة / دقيقة
محرك رقم 2 ( لم ينزل مصر مطلقا )
سعة 1800 سي سي .... بينتج 128 حصان عند 6000 لفة / دقيقة
http://i31.tinypic.com/2rptfkl.jpg
البونتو كلاسيك .... مع تغيير الشكل الأمامي
مع بزوغ عام 2003 ....... تم الإحتفال ببيع 5 مليون سيارة من بونتو في وقت قصير
و في هذا العام تم تغيير الشكل الأمامي للسيارة و نزول الشكل الجديد المسمى ببونتو كلاسيك
و كان هناك أتجاه لفيات بوقف إنتاج هذه السيارة و إستبدالها كليا بجراند بونتو و لكن نظرا لوجود بعض الأسواق التي تطلب بونتو كلاسيك و أيضا لرخص سعرها عن الجراند بونتو
فتم أخذ القرار بالإستمرار في الإنتاج للدول النامية مثل تشيلي و البرازيل و الشرق الأوسط و منهم السوق المصري
مواصفات المواتير التي يتم تركيبها في البونتو كلاسيك
هناك محركين
الأول 1242 ......... و هو الموجود في مصر
و مواصفاته كالتالي
بينتج 64 حصان عند 5500 لفة / دقيقة .......... و أقصى سرعة للسيارة بهذا المحرك هي 155 كم / س
المحرك الثاني ( غير موجود في السوق المصري )
1910 سي سي و يعمل بالديزل
ينتج 128 حصان عند 5000 لفة / دقيقة
و سرعته القصوى 205 كم / س
تقوم شركة زاستافا اليوغسلافية بإنتاج السيارة تحت الترخيص الإيطالي و تنتج بإسم زاستافاف 10
http://i27.tinypic.com/2efjjg7.jpg
فــــــــــيـــــــــات جراند بونتو
بدأ إنتاج هذا الموديل منذ عام 2005
المحركات الموجودة و المتاحة لهذا الموديل
محرك رقم 1
1242 سي سي ....... نفس المحرك الموجود في البونتو كلاسيك الموجودة في مصر
و لكن هذا المحرك غير موجود في الجراند بونتو الموجودة في السوق المصري
به 8 صباب فقط ........ و بينتج 64 حصان ........عند 5500 لفة / دقيقة
و عزم مقداره 102 نيوتن / متر عند 3000 لفة / دقيقة
و أقصى سرعة هي 155 كم / س .... و يصل لسرعة 100 كم في 14.5 ثانية
محرك رقم 2
1368 سي سي ..... و هو المحرك الموجود في الجراند بونتو اللي موجودة في السوق المصري
8 صباب أيضا ..... بينتج 76 حصان عند 6000 لفة / دقيقة و عزم 115 نيوتن /متر عند 3000 لفة / دقيقة و سرعته القصوى 165 كم / س و يصل لسرعة 100 كم في خلال 13.2 ثانية
محرك 3
1368 سي سي ستار جيت .... بينتج 94 حصان عند 6000 لفة / دقيقة و عزم مقداره 125 نيوتن / متر عند 4500 لفة / دقيقة و سرعته القصوى هي 178 كم / س و يصل لسرعة 100 كم في خلال 11.4 ثانية و به 6 سرعات
محرك 4
1368 سي سي تي جيت .... 118 حصان عند 5000 و عزم مقداره 206 نيوتن / متر عند 2000 لفةت / دقيقة فقط لا غير و ده طبعا شئ ممتاز سرعته القصوى هي 195 كم / س و يصل لسرعة 100 كم في خلال 8.9 ثانية و تم تزويد هذا المحرك في السيارات جراند بونتو موديلات 2007
أختبارات الأمان
بالنسبة للسائق و الركاب من غير الأطفال
5 نجوم .............. ما شاء الله
بالنسبة للركاب قصار القامة و الاطفال
3 نجوم فقط لا غير من أصل 5 نجوم ( معدل كويس مش وحش )
بالنسبة للمترجلين و المشاة
3 نجوم من أصل 4 نجوم
http://i30.tinypic.com/2mzm6ns.jpg
----------------------------
التجربة الشخصية للبونتو
العربية قوتها معقولة قوي و بتؤدي الغرض منها بنسبة 100 % لتقضية المشاوير و الذهاب إلى العمل و الذهاب إلى المتنزهات
السيارة موفرة في البنزين ......... معقولة المساحة الداخلية و إن كانت ضيقة لكبار الحجم و طوال القامة
كماليات السيارة ليست كثيرة و لكنها تؤدي الغرض منها بنجاح تام
التكييف ... تأثيره في الحر الشديد ليس جيد على المحرك و لا على الركاب
فهو تكييف عادي جدا و بيؤثر على أداء السيارة في الحر الشديد فقط و يكون مفعلوه داخل السيارة عادي جدا
و لكن على الطرق المفتوحة بيكون تأثيره أفضل كثيرا حيث يكون هناك فرصة أفضل للمحرك للتهوية و التبريد مما يزود كفاءة عمل التكييف و المحرك معا
الكاسيت ... نظام صوتي معقول جدا و مناسب للسيارة و صوته نقي
البارو ( التحكم الإلكتروني أو الكهربائي في عجلة التوجيه أو عجلة القيادة )
من أفضل أنواع البارو التي يمكن أن تراها في حياتك
له درجتان ........... المدينة و هذه الدرجة تجعل منه ... سلس كأنك تضع يدك في ماء النيل .............. لا يوجد أي مقاومة و هو مفيد جدا في القيادة الداخلية و مفيد بطريقة جميلة جدا في ركن السيارة و الإنعطاف في أماكن ضيقة
الدرجة الثانية و هي المخصصة للقيادة على الطرق السريعة و هو جيد للسرعات العالية
زجاج كهربائي أمامي فقط .............
المحرك موفر في البنزين فعلا ....
الإستهلاك بيوصل ل 15 أو 16 و أحيانا 20 كم / لتر و ده ناتج عن وزن السيارة القليل المقارب لحوالي 860 كجم و أيضا المحرك صغير الحجم المتناسب جدا مع حجم السيارة
قطع الغيار متوفرة في كل مكان و بتعيش لفترات طويلة إذا حافظت على العربية كويس
التوكيل الرسمي للسيارة هي شركة أواماترا في منطقة جسر السويس
و هناك أيضا مركز الخدمة الخاص بشركة النيل الهندسية الموجود في أبو رواش و يجب أن نذكر هنا أن شركة النيل الهندسية هي التوكيل السابق لفيات في مصر و لديهم مركز ممتاز و يقومون بإصلاح ماركات ايطالية مثل فيات و ألفا روميو
أداء السيارة
تجميع السيارة للسرعة على سرعات قليلة ... ممتاز لأنها بتديك أقصى عزمها على سرعات قليلة مما يجعلها سيارة مثالية للقيادة داخل المدينة
و لكن تجميع السرعى على سرعة أعلى من 90 إلى 100 بيبدأ يضعف قليلا و بتجمع ببطئ و خصوصا لو حاولت تشد مع عربية تانية عند السرعة دي
بتوصل لأقصى سرعة بالعافية و خصوصا لو أنت مهتم بالمحرك و صيانته و بتحط بنزين 92 أو 95
و ممكت توصل لسرعات أعلى من كدا بحد أقصى 170 في حالة وجود الهوا في ظهرك و أيضا وجود منزل
العربية بعد سرعة 120 إلى 130 بتبدأ تحس أنها هاتطير من على الأرض و هي ثابتة كويس قوي لغاية 110 .........
خامات العربية ممتازة و بتستحمل شوارعنا ...... و بتعيش و صعب لما حاجة فيها تنكسر أو تبوظ
فيها عيبين
المشط الإلكتروني أو وحدة التحكم الإلكترونية بتعملها و تقل بأصلها بعد مع تعدي 100 ألف كيلو في فترة من الفترات يعني ممكن تقعد معاك لغاية 150 و ممكن لاءة و أنت وحظ و دي ثمنها حوالي 2200 جنيه مصري من التوكيل و من خارج التوكيل بحوالي 1500 جنيه مصري
الدريسكيون الباور
لو وحدة التحكم بتاعته باظت ( الخاصة بقيادة المدينة ) ......... ثمنها غالي بيوصل 3500 جنيه مصري
من الأخر السيارة ممتازة و أختيار ممتاز في الفئة دي
أرجو أن يعجبكم التقرير الشامل
اعتقد لو المقارنه بين سيريون وبونتو كانت هتبقى مقارنه واقعيه اكتر لان الاثنين متقاربين فى السعر والحجم. ولا ايه رأيكم
شكرا على المجهود الرائع يا توت
بس سبب مقارنتى للموضوع دة اننا هنا فى مصر مش فى اوربا يعنى للاسف اللى بيجى يشترى عربية مش بيبقى مركز اوى على انها هاتشباك او سيدان وما ينفعش واحنا بنشترى عربية اننا نجمع العربيات اللى بسعر قريب من بعض ونشوف انهى احسن ما يمكن عربية تبقى سعرها ارخص من عربية تانية وتبقى احسن ومعنى احسن معنوى مش مادى بمعنى ان شئ كويس مناسب لسعرة وشئ افضل شوية صغيرة بس مبالغ فى سعرة
والامثله كثيرة
سيراتوا تقريبا هية هية النترا نفس الموتور والعفشة وشركتين فى بعض وكمان توكيل كيا احسن وسعر السيراتوا مانيوال 90 بمقابل 104 النترا
جين تو من 84 الى 90 الف وعربية تحفة وتتقارن بعربيات بفئة اعلى منها
هوندا سيفيك ب 143 توكيل و 153 فورى وشفوا الكورولا بكام وطبعا عارفين الفرق الواضح وكمان الانسر الجديدةشوفوا سعرها كام
والامثلة كثيرة يبقى مش معنى كدة ان السعر دائما يدل على القيمة لان الشركات دة بتضرب السعر بمزاجها حسب العرض والطلب
يعنى البونتو دة ممكن يكون ال 75 دول مناسبين عليها اوى واليارس دة تكون افضل من البونتو وهية افضل طبعا بس هل فرق الجودة البسيط يساوى فرق ال 15 الف دول تقريبا............والسؤال طبعا مش للخناق ولكن لتعم الفئدة على الجميع
لو افترضنا ان السيارتين متساويتين من حيث :
استهلاك البنزين - الارتفاع عن الارض - الشكل والبرستيج - اختبارات التصادم
يبقى الاتى :
1- الياريس فيها 2 ايرباج
2- قطع غيار اليابانى معمره بفرق كبير عن الفيات
3- تكييف اليابانى لايقارن بتكييف الفيات
4-قوة ونعومة موتور الياريس افضل اكيد من الفيات
لو بختارأدفع اكثر من ال 15 دول وأحصل على اسم تويوتا وفرق الجوده اكيد مش بسيط
أخي الفاضل ممكن أعلق على هذا الكلام
أرتفاع السيارة عن الأرض .......... الياريس أرتفاعها أعلى عن الأرض
الفيات البونتو فيها 2 وسادة هوائية و الياريس فيه موديلات مش فيه
قطع الغيار ........ الفيات معمر جدا و مين قال إن الياباني معمر عنه ؟؟؟
التكييف فعلا بتاع الياريس أحسن
بالنسبة للقوة و النعومة ......... أيوة الياريس أحسن
و برضه أسم فيات مش قليل و أرقى و أعرق من تويوتا
و مفيش فرق جودة إلا لصالح الفيات بونتو
أنا ركبت الأثنين و شوفت تقفيل دي و تقفيل دي
و البونتو تكسب في التقفيل
ال 15 الزيادة دول
علشان أنت بتشتري عربية سيدان و أكبر في الحجم
و علشان جشع التوكيل و أسعراه المبالغ فيها
مش علشان فرق جودة و فرق أسم تويوتا
مع احترامي لحضرتك استاذ توت
ولكن حضرتك من أول الناس اللي مش بتحب انك تقول صناعه ياباني مثلا
وحضرتك بتستشهد امام مميزات الياريس ان اسم فيات اسم عريق وده هيفرق معايا ايه اذا كان مالهاش سوق في ااعادة البيع في بلدي او سوقنا عموما زي الياريس
فرق الاسم والعراقة في ايه دلوقتي
وفي النهاية تقول مش علشان اسم تويوتا طيب اشمعنا في دي مينفعشي اسم مع انه الصانع الاول في العالم
ثانيا تقفيل البونتو احسن من الياريس ازاي يعني
ده يا أخي من ضمن عيوب الفيات عموما تقفيلها وخاماتها الغير جيده بما فيها الموديل الجديد الجراند بوتتو التابلوه عبارة عن بلاستيك صرف ناشف بطريقه وشكله باين قوي
يعني بصراحه انا بستغرب ده من اشيك حاجه في الياريس شكل التابلوه وخامته التي هيا ليست رفاهيه وانما مناسب جدا لسعر العربيه
يا أبو عبد الله أزيك و أزاي أخبارك
إن شاء الله تكون بخير
بُص ياباشا
أنا مش من الناس اللي بتقارن بالإسم أو الماركة بس
أنا لما أقارن أقارن عربية بعربية
و أنا قلت إن فيات أعرق حسب كلام الأخ شريف
هو اللي قال إن تويوتا أعرق
و أنا ما قلتش إن بونتو أحسن علشان فيات أعرق
و المعنى ده مطلعش مني خالص
نيجي بقى لتابلوه الياريس
تابلوه الياريس تابلوه عادي جدا و مصنوع من البلاستيك برضه زي البونتو
و لو حضرتك أخدت نظرة على تقفيل الفيات البونتو
هاتعرف أنا بتكلم على أيه
مشكلتنا في مصر
إن الفيات اللي في دماغنا هو 128 و 127
و مع ذلك 128 و 127 كانوا في وقتهم من أحسن العربيات و كانوا أختراع جامد و كفاية إن فيات من أوائل مخترعي و مستخدمي نظام الجر الأمامي
و برضه مش علشان شركة فيات شركة قيدمة و عريقة يبقى خلاص منتجاتها أحسن من كل اللي في السوق
أنا قلت مميزات الياريس و مميزات البونتو
و في الآخر دي حاجة و دي حاجة
لو شاب روش و عايز عربية شبابي ......... يبقى بونتو بمميزتها و عيوبها
لو شاب برضه عايز عربية تمشي كدا و كدا يعني شكل إلى حدا ما مقبول و برضه تمشي عائلية يبقى ياريس
إنما ردي على الأستاذ شريف كانعلى نقط محددة
هو قال إن جودة ياريس أحسن ........ و ده كلام مردود عليه
و قال برضه إن تويوتا أعرق و برضه ده كلام مردود عليه و غير حقيقي و بالأرقام
بالإضافة بقى للحاجة المهمة جدا
كمية المبيعات لا تعني بالضرورة الجودة
ما مرسيدس أقل من تويوتا ........... و بي إم أقل من تويوتا
و هيونداي من أكبر 5 شركات في العالم
هل ده يخلي مرسيدس أقل من تويوتا ؟؟؟؟؟؟؟؟؟؟؟؟
و هيونداي أحسن من الماركات اللي بعدها في عدد السيارات المباع ؟؟؟؟؟؟؟؟؟
تويوتا ماركة محترمة علشان بتحترم عملائها
بس ده مش معناها أنها الأحسن على طول الخط و مش كل عربية عليها علامة تويوتا تبقى أحسن عربية
أرجوا أنك تكون فهمتني يا باشا
يا اخي توت
أنا لا اتكلم عن مين احسن ومين اعرق وانما انا بقول رايي عن تحربه وحاجات شوفتها بعيني وليس كلام بدون معرفه مسبقه
أولا تابلوه الياريس انا لم اقل انه من الجلد مثلا
وانما انا اعلم انه من البلاستيك ولكن بلاستيك عن بلاستيك يفرق
يعين شكل تابلوه الياريس لا يحسسك انه بلاستيك او على الاقل شكله وخامته جيده جدا
اما تابلوه البونتو فواضح جدا انه بلاستيك يعني بيقول لأي احد يشوفه انا بلاستيك
وانا شوفت الأتنين وعارف انا شوفت ايه
وده من العيوب اللي فيات مستمره مش عارف ليه فيها
ان شكل التابلوه وتصميمه وخامته سيئه جدا بالنسبة لأسم الشركه
وانا اشهد بصراحه ان البرافو الجديده مختلفه فعلا في الموضوع ده يعني استطاعو انهم يغيروا في الموضوع ده فيها ولكن سعرها كام
بصراحه انت عكست الكلاماقتباس:
مشكلتنا في مصر
إن الفيات اللي في دماغنا هو 128 و 127
و مع ذلك 128 و 127 كانوا في وقتهم من أحسن العربيات و كانوا أختراع جامد و كفاية إن فيات من أوائل مخترعي و مستخدمي نظام الجر الأمامي
ده يا راجل احنا مشكلتنا في مصر ان احنا منعرفش من العربيات في اوائل التصنيع غير فيات وبيجو ومرسيدس في فترة السبعينات والثمانينات
ده دي سبب مشاكلنا مع كلمة ياباني
يا اخي هتلي اي عربيه 128 موديل 80 او 81 او 82 او قبل ذلك وهات بديلتها من الياباني
وهنخرج من المقارنة دي تواجد قطع الغيار
بالله عليك لو امامك 128 جديده زيرو ومثلا مازدا 323 موديل 80 او 81 او 82
هتركب انهي
انهي نقدر نركبها ونحس انك راكب فخامه وراحه في العفشه واداء عالي مع توفير البنزين وسرعات عاليه وخامات تابلوه وخامات داخليه وعمر افتراضي ومشاكل واعطال وسخونية وميه بتفور وكهرباء ولعت العربيه وكبالن بتشخلل
يعني انا مش عارف فين العراقة في الكلام ده
مشكلتنا في مصر ان احنا مكناش نعرف عربيات ايامها في مصر غير دول بس ومركبناش ياباني الا في التسعينات تقريبا بدأنا بعد ما كان مكسر الدنيا من السبعينات في الخارج
بدون الدخول في تفاصيل كبيره
البونتو فئه و الياريس فئه.
جوده الخامات لصالح البونتو و أأكد ان البونتو خامتها افضل
انا من ملاك الياريس و ركبت الاتنين و فعلا تابلوه البونتو خاماته افضل من تابلوه الياريس
انا اليومين دول بفكر اغير السويفت بعربيه زيرو
و حاليا بفكر في عربيتين و هما البونتو كلاسيك و الكيا ريو (لانه ما ينفعش اجيب ياريس تاني)
لما روحت مع والدي نتفرج علي البونتو و هيا داخله دماغه اوي
قالي برضه الاوربي اوربي!!
و والدي راجل كبير ربنا يديله الصحه معدي ال 60
قالي بالحرف شوف باب البونتو الصغير دا تقيل ازاي و باب الياريس خفيف ازاي
شوف تابلوه البونتو و تقفيله افضل من الياريس حتي قعده الكراسي.
..........
بالنسبه للمشككين في قطع غيار فيات
قطع غيار فيات الاصليه معمره جدا لاقصي درجه و عن تجربه
من ايام ال 125 و ال 132 و العربيات الجميله دي
حتي الاعتماديه برضه فيات الحمد لله عمرها ما قصرت معايا غير مره واحده بال 125 طنبوره المروحه ملصت و دا كان عيب من اللي ركبها .
ال 125 موديل 75
و سنه 1992 استلفها قريبنا
اخدها من المحله للقاهره
و من القاهره للاسماعيليه
و من الاسماعيليه لبور سعيد
و من بور سعيد للاسماعيليه
و الاسماعيله للمحله
كل دا في يوم واحد فقط !!!!!!!!!!!!!
طب عربيه علي طريق بقالها 17 سنه و تاخد مشوار زي دا تبقي ايه؟؟؟!!!
ال 132 برضه كنا بنروح بيها اسيوط لمسافه 700 كيلو من المحله و الحمد لله مافيش منها اي مشاكل
الفيات عربيات اعتماديه لاقصي درجه و عربيات حموله
طول عمري راكب فيات و الحمد لله مافيش منها اي مشكله
لا سخونيه ولا اعطال ولا اي شئ نهائي.
اقتباس:
جوده الخامات لصالح البونتو و أأكد ان البونتو خامتها افضل
انا من ملاك الياريس و ركبت الاتنين و فعلا تابلوه البونتو خاماته افضل من تابلوه الياريس
الحمد لله .......... و شهد شاهد من اهلها
الأستاذ حازم خضر من ملاك الياريس
و فصل فيه اللي عليه نقطة الخلاف
إن خامات البونتو أحسن من خامات الياريس من ناحية التابلوه و الكسوات الداخلية
أنا بصراحة يا أبو عبد الله مقدر حبك للياباني
بس لازم تعطي كل ذي حق حقه
لأن أنا شوفت تابلوه الياريس .......... خاماته عادية جدا و مش مميزة و خامات تابلوه البونتو أحسن و حتى تقفيل العربية نفسه النهائي لصالح البونتو
على العموم إختلاف الرأي لا يفسد للود قضية
و شكرا مرة أخرى أستاذ حازم على المداخلة الحقانية الجميلة دي
و شكرا أبو عبد الله على الحوار الراقي
و كل عام أخواني ( أبو عبد الله و الأستاذ حازم ) و تكونوا بخير
شكرا
الجراند بونتو ولا التويوتا كورولا ؟؟!!
السوءال مش محتاج نقاش اصلا
أهلا يا أستاذ سعداوي
بس الموضوع مش كدا
مش مسألة مين أحسن من مين
لأن الجراند عند ناس أحسن ......... لأسباب
شكل ........ شبابية أكتر .......... موتور كويس ......... صالون كويس .... شكل خرافي
أما الكورولا
سيارة عائلية في المقام الأول
و تبقى لشاب ........................... أقل من الجراند
علشان برضه المواضيع مش بتتقاس كدا
مفيش حلو مطلق ........... و مفيش وحش مطلق
كل واحد بيبقى عنده أختيارات و ميزانية و تناسب بين الإمكانيات و المال المدفوع
يعني لا البونتو أحسن من الياريس و لا الياريس أحسن من البونتو
و لا الجراند أحسن من الكورولا و برضه الكورولا مش أحسن من الجراند
لكل مقام مقام
و شكرا ...... و السلام عليكم
مع احترامي طبعا لرأي والدكاقتباس:
قالي بالحرف شوف باب البونتو الصغير دا تقيل ازاي و باب الياريس خفيف ازاي
شوف تابلوه البونتو و تقفيله افضل من الياريس حتي قعده الكراسي.
..........
ولكن العربيات لا ينظر لها بخفة الباب وثقله
لأن ده مقياس قديم لقياس جودة العربيات
اما الأن فالخفه هيا المقياس الجيد وليس الثقل
وانا مش عارف ايه فايدة الثقل يعني ولا أمان ولا اي حاجه وزيادة في وزن العربيه بزيادة في استهلاك البنزين
برضه ليس مقياساقتباس:
بالنسبه للمشككين في قطع غيار فيات
قطع غيار فيات الاصليه معمره جدا لاقصي درجه و عن تجربه
من ايام ال 125 و ال 132 و العربيات الجميله دي
حتي الاعتماديه برضه فيات الحمد لله عمرها ما قصرت معايا غير مره واحده بال 125 طنبوره المروحه ملصت و دا كان عيب من اللي ركبها .
ال 125 موديل 75
و سنه 1992 استلفها قريبنا
اخدها من المحله للقاهره
و من القاهره للاسماعيليه
و من الاسماعيليه لبور سعيد
و من بور سعيد للاسماعيليه
و الاسماعيله للمحله
كل دا في يوم واحد فقط !!!!!!!!!!!!!
طب عربيه علي طريق بقالها 17 سنه و تاخد مشوار زي دا تبقي ايه؟؟؟!!!
ولو هيا عملت كده في مليون عربيه تانيه ممكن تعمل كده
مش معنى انها واحد جرب ونفع معاه يبقى العربيات التانيه مش هتقدر تعمل كده واكتر كمان
وانا ليا تجارب مع 128 أسوأ من الظلام الدامس
وليا تجارب مع ياباني اواخر السبعينات واوائل الثمانينات ولسه لحد الأن بيحفر في الأرض وبيعمل اكتر من كده والله
هنا اراء لمالكي البونتو بالخارج
http://www.carsurvey.org/model_Fiat_Punto.html
وهنا اراء مالكي الياريس في الخارج ايضا
http://www.carsurvey.org/model_Toyota_Yaris.html
ادخل هنا وشوفو الفرق وشوف نسبة كام واحد مش عاجبه لكام واحد عاجباه العربيه ده غير اللي بيقول ان البونتو فيها مشاكل
طب ما المرسيدس لحد انهارده صاجها تقيل و كويساقتباس:
مع احترامي طبعا لرأي والدك
ولكن العربيات لا ينظر لها بخفة الباب وثقله
لأن ده مقياس قديم لقياس جودة العربيات
اما الأن فالخفه هيا المقياس الجيد وليس الثقل
وانا مش عارف ايه فايدة الثقل يعني ولا أمان ولا اي حاجه وزيادة في وزن العربيه بزيادة في استهلاك البنزين
هل بقي المرسيدس وحشه و عربيه اي كلام و مش بتهتهم بالامان؟؟
متهيالي مافيش حد يجرؤ في يوم من الايام انه يشتم في عربيه مرسيدس ايا كانت لان
الاستبن بتاعها بس بكل الشركات اليابانيه .
لا مقياس مع احترامي ليك يا ابو عبد اللهاقتباس:
برضه ليس مقياس
ولو هيا عملت كده في مليون عربيه تانيه ممكن تعمل كده
مش معنى انها واحد جرب ونفع معاه يبقى العربيات التانيه مش هتقدر تعمل كده واكتر كمان
وانا ليا تجارب مع 128 أسوأ من الظلام الدامس
وليا تجارب مع ياباني اواخر السبعينات واوائل الثمانينات ولسه لحد الأن بيحفر في الأرض وبيعمل اكتر من كده والله
لاني ما ركبتش عربيه واحده لا انا راكب كذا عربيه و عيلتي كلها كانت عندها فيات و الحمد لله قليل جدا المرات اللي عطلت فيها
و بعدين قولنا 100 مره ما حدش ياخد ال 128 مقياس
فيات بطلت ال 128 سنه 1979 يعني بالعربي قالت يا جماعه انا خلاص استغنيت عن ال 128
مش ذنبها بقي ان الناس لسه بتصنعها و تركبها لحد انهارده
و بعدين مهما كان ال 128 عربيه صغيره مش بتاع هلك
و رغم كده برضه حقولك حاجه
واحد قريبي كان معاه 132 و اتقلب بيها اخد5 قلبات
و هو طلع من العربيه مافيهوش ولا خدش هو و اللي معاه كلهم.
يا ابو عبد الله انا ما بتكلمش من فراغ
انا بتكلم من خلال تجربه مش اقل من 25 او 30 عربيه فيات علي مدار عمري
معانا و مع قرايبي
علشان كده انا واثق من العربيات دي كويس
كون ان انت حظك وقعك في عربيه وحشه فاكيد مش حتبقي القاعده
انا بصراحه مش هكمل الحوار لأن في مفاهيم وخلط في الامور
ايه اللي جاب المرسيدس دلوقتي
وبعدين مرسيدس بنفسها دلوقتي صاجها مش زي القديم
وبعدين مش معقولة اجيب عربيه بــ 100 الف جنيه اقارنها بعربيات بــ 500 الف وانت طالع يعني حرام
دي ماتور ودي ماتور تاني خالص
ومين قال ان الثقل في الحديد أمان ده كان زمان علشان ياكل الصدمه
اما دلوقتي لما اكتشفوا ان لما تبقى السرعه عاليه هيبقى الصاج وثقله ده على السائق اسوأ
معدش بيحصل الكلام ده دلوقتي في الصناعه
مش معقولة يا جماعه نكون لسه بنفكر في الحاجه الاتقل
ما رينو عامله الرفارف فيبر وحاصله على خمس نجوم في التصادم
يا جماعة لية كل ما نتكلم فى حوار يقلب كدة خناقة
اولا انا معايا يارس وحازم نفس الموضوع واساسا حازم وابو عبد الله من الناس اللى خلونى اشترى يارس بعد توفيق ربنا .......بس الموضوع بس اانا كنا بنفكر مع بعض بصوت عالى
والتفكير كلة هل سيارة زى البونتو ممكن تكون كويسة ققيمة للمال من يارس .....لكن عمر اى حد هنا ومفيش حد يجرؤ ويقول ان البونتو الكلاسيك ولاحتى الجراند بونتو احسن من اليارس ............بس هية الصراحة مشكلة اليارس الاساسية الشكل هوة مش وحش بس مش انسيابى حبتين
بس لو فكرنا هية انسب عربية فى الرينج دة يمكن تكون الصنى او الانسر ال 1600 احسن شوية بس علشان دول 1600 واكثر ثباتا شوية
لكن فى زمنا دة وشوارعنا دة مش محتاجين غير موتور 1300 ويوفر فى البنزين ونعرف نعمل صيانات والتوكيل يبقى مريح ونعرف نبيع لما نزهق..........ولو رجع بيا الزمن ورا شوية كنت هجيب يارس بردة بس الصراحة كنت هجيب اليارس المانيوال الفاضية اللى ب 87 علشان احس انى وفرت شوية وابقى راكب نفس العربية.................................