انا اصلا مش عارف هو هيطبق ازاي بالظبط والاسعار ايه بالظبط والحصه كام لتر بالظبط ولذلك معرفش
انا اصلا مش عارف هو هيطبق ازاي بالظبط والاسعار ايه بالظبط والحصه كام لتر بالظبط ولذلك معرفش
ياريت الموضوع هايقف على رفع دعم البنزين او السولار وخلاص
لكن حضرتك الغلاء هايزيد فى كافة القطاعات الصناعية ومواد البناء والزراعات
يعنى كل مايتم شرائه سيرتفع سعره بشكل جنونى
اضف على ذلك عدم وجود فرص عمل يعنى الدخل قل والاسعار زادت
دى تتحل ازاى بقى
احنا كدة بنرجع لورا سنين كتير اوى اوى
لكن فيه ناس شايفة ان رفع الدعم عن المحروقات ده اعظم اختراع حصل بعد الثورة واحتمال يتكتب فى كتاب الانجازات
وجهات نظر تجيب الضغط
يجماعة فلنفرض ان الطريقة دى كويسة وهتساعد على توفير فلوس للحكومة وتخفف شوية العبء من عليها
المشكلة هنا ال 1800 لتر
انا حسبتها لنفسى باخد فى السنة 2400 داخل محافظة السويس بس يعنى فى فرق 600 لتر
مع العلم ان ال 2400 لتر دول من غير سفر برا السويس يعنى كلها مشاوير داخلية
فا تقريبا كدا كدا لازم هشترى الغير مدعم المفروض الكميه تزيد شوية علشان تكفى
انا طالما كنت الوم على نظام مبارك فى موضوع الدعم ده انه الناس اللى معاها عربيات تكروز بيها تاخد 70% من الدعم من فلوس الدولة والغلابه ملهمش حاجه
اعتقد النظام الجديد بالكروت فكره جيده جدا وان كنت افضل يكون دعم نقدى توفيرا لتمن الكروت والماكينه اللى هتقرا الكروت وتوفيرا للوقت فى المحطه
سندوتش الفول البسيط ثمنه هيزيد
هو ده اللي حايحصل بالظبط، فوضي ما بعدها فوضي، وخد عندك الآتي....
١- أماكن توزيع الكروت حايبقي فيها تلاعب.
٢- طبعا في بشر حاتضرب رخص عشان تاخد كروت، مع العلم ان الكارت لا يحمل صفة السيارة.
٣- شوية و مش حاتلاقي كروت و تلاقيها بتتباع سوق سودة، كعادة أي شئ في هذا البلد العظيم.
٤- غياب رقابي كامل عن التوزيع و التنفيذ.
٥- تلاعب من محطات التمويل في خصم الرصيد.
٦- استعباط أصحاب المكروباص و شركات النقل و اوتوبيسات المدارس و فرصة، يلا بينا نغلي.
٧- ارتفاع اسعار جميع السلع.
و طبعا التوقع حاجة و الواقع المرير اللي حانشوفه حجة تانية خالص.
لو حد قالي ايه يا عم التشائم ده، أقوله، و ماذا تري يدعو الي التفاؤل؟؟.
و طبعا برده انتم عارفين كويس الجهاز الرقابي المصري الجبار اللي لو فيل معدي من قصاده، حايقول ما خدتش بالي، ماشفتوش، اثبت ان في فيل عدي من شوية.
تحياتي لكم و لصاحب الموضوع.
استرها علينا يا رب و ارحمنا من الأفكار الجبارة ده.
الأسعار كده كده بتزيد لأن الناس عندها جشع و طمع و اللي بيكسب قرشين عايز يكسب أربعة و منطق المكسب و الخسارة في بلدنا مختلف و مختل
و عدم وجود فرص عمل ده كلام غير حقيقي لأني أعرف ناس أصحاب أعمال عايزين عمالة بأي ثمن و مش لاقيين و الغريبة أن اللي بيشتغلوا هما الافارقة و الصينيين !!
طيب و المصريين ؟؟
قاعدين علي الكوفي شوب و بيحلموا بالفيلا و العربية من غير تعب و لا مجهود و اللي بيتخرج و يشتغل بيسيب الشغل بعد يومين و لو صمد شهرين يبقي بطل , ليه ؟
علشان مش عاجبه المرتب أو طبيعة الشغل
و قصة الرجوع لورا دي برضه من أختراعات مابعد الثورة .. و كأننا ماكناش بنرجع قبل الثورة !!
أما تتحل أزاي بقي , أقول لك تتحل أزاي :
1- أننا نغير من أخلاقياتنا و سلوكياتنا
2- اللي بيشتغل يشتغل بجد و بضمير
3- و اللي مابيشتغلش يحاول يشوف أي حاجة مفيدة يشغل فيها نفسه و يفيد فيها الناس بدل ماهو قاعد و لاشغلة و لامشغلة أو علي الاقل مايكونش عبء علي اللي بيشتغل
4- نبص قدامنا و نشوف غيرنا عمل أيه و نعمل زيهم مش نقعد نعيط و نندب حظنا و نتغني بحضارة ال 7000 سنة
المعلومه دي جديده عليا .... بس حتي في الحاله اللي حضرتك بتحكي عنها دي لازم اشوف حلول تانيه مش هرمي بلايا كله علي الشعب ،،، لازم فعلا ابتدي اشوف ايه احسن طريقه اتصرف بيها في فلوس من غير ما اخلي الناس تنتحر بالشكل ده .... يعني مثلا في رأيي التوزيع ده غير عادل باي شكل علي الاطلاق يعني انا ممكن ادعم عربيه موديل 2013 موتورها 1600 تربو سعرها ميقلش عن 300 الف مثلا و بشيل الدعم من علي بني ادم كل ذنبه انه لبس في عربيه قديمه سعرها ممكن ميعديش ال ٧٠ الف و مع ذلك موتورها اكبر من ١٦٠٠ -قديمه دي بقي كتير معاك من التسعينات و انت نازل كتير - .... ده مجرد مثال انما امثلة سوق التوزيع لا حصر لها ،،،، بدل ما اخلي البنزين يعلي من 1.85 ل 4 جنيه اخليه يعلي يبقي 3 جنيه مثلا بحيث انك هتأزم المواطن شويه و هتساعد الحكومه شويه من الاخر شيلنا شويه علينا و شويه عليهم انما 4 جنيه انا كده زودتله قدم تمنه مرتين يعني حرام مينفعش اغلي كده غير لو مقابله اي زياده في دخله باي شكل علشان يعرف يكمل حياته !!