الموضوع: أشتري speranza a113 و لا byd f3r

المشاركة الأصلية كتبت بواسطة shetoshandasa

شكرا جزيلا علي الرد .. طيب هل حضرتك شايف ان ال a113 مناسبة ؟؟
لاني كلمت اكتر من حد عليها و شككني فيها .. فياريت أخد منك الرد الوافي لاني ان شاء الله هشتري الاسبوع الجاي
محتاج اعرف الاتزان بتاعها علي السرعات العالية و الثبات و السحب و قطع الغيار .. يعني اكيد انت فاهمني و عفوا علي الاطالة

والله يا فندم موضوع توجيه النصح لشراء عربية معينة أنا بعتبره مسئولية كبيرة أنا مش قدها .. لأني ممكن أنصح بعربية ما شايفها من وجهة نظري كويسة وهي مش مناسبة لظروفك وإمكانياتك أو ربنا مش رايد ليك فيها الخير .. فأكتر شخص قادر على النصح هو أنت شخصياً لأنك أكتر واحد أدرى باحتياجاتك وإمكانياتك المادية .. وما علينا هنا هو عرض مواصفات كل عربية بموضوعية وحيادية أما الاختيار فهو عليك ومن قبلك ربنا سبحانه وتعالى بعد الاستخارة .

أنا أسف إذا كان ردي لا يسمن ولا يغني من جوع .. ولكن علشان أريحك أنا عن نفسي مبحبش كل العربيات الهاتش باك (ودي أذواق) يعني لا دي ولا دي .. ولكن لو في اختيار بينهم ومعايا المقدرة المادية لشراء الاتنين حشتري البي واي دي نظراً لقوة موتورها ووسع صالونها " وفقاً لظروفي أنا وإمكانياتي أنا المختلفة عنك " ( ومتنساش كلامي اللي فوق )

المشاركة الأصلية كتبت بواسطة horeen

توكيل إسبرانزا أسوء من سئ
توكيل الأمل بتاع byd ورشه كبيره ومفيش ضمير
قبل ما تشترى روح إتفرج على مراكز الصيانه هتشوف العجب العجاب
وقديما قالو تخير الجار قبل الدار
روح شوف مراكز الصيانه اللى هتتعامل معاها واسمع من الناس هناك
على فكره معايا تيجو وسايب التوكيل من صيانه الألف لسوء المعامله
وأخويا معاه byd ,وبيلعن اليوم اللى جابها فيه
ملحوظه أخيره أسأل على أسعار قطع الغيار وأندهش
أنا نادم على اللانوس أشد الندم
قطع غيار رخيصه عند البقالين
وأى صبى ميكانيكى بيفهم فيها

ده حال معظم التوكيلات في مصر .. مش ابو الفتوح والأمل فقط .. ولكن في الأونة الأخيرة ابتدى توكيل الأمل في التحسين من نفسه كثيراً .. وتلافي الأخطاء السابقة في مراكز الخدمة .

وبالنسبة لقطع الغيار فهي للعربيتين منتشرة خارج التوكيل وبأسعار معقولة جداً .. بالإضافة أن ناس كتيرة ابتدت تشتغل في العربيتين بعيداً عن التوكيل .

وبصفة عامة العربيات الصيني تعتبر صفقة رابحة مقابل ما تدفعه .