الموضوع: بخصوص الرياداتير

شوف انا كان عندي المشكلة دي وحليتها ف البيت والتكلفة كانت 15ج مش اكتر من كدا

بس المهم يكون التنقيط بسيط ويكون الردياتير حالته كويسه يعني مش مهري

هتشتري معجون حديد (ستيل) ولازم يكون استيل هات نوع نضيف او مستورد

هتفك المراوح وتفك خراطيم المياه من الردياتير وتفك مسامير تثبيت الردياتر وتخرجه بره العربية طبعا لازم تكون العربية باردة مش سخنة اوك

هتحدد مكان التنقيط وهتعمل الاتي بنفس الترتيب
شوية مية عادية خالص وفرشة اسنان قديمة وتنظف مكان التنقيط كويس قوي حتى تشيل كل الاوساخ والترسيبات الموجودة
بعد كدا هتصب شوية صغيرين جدا من منظف فلاش (مية نار) بتاع التواليت او اي حاجة مشابه وممكن من زجاجة مياه البطارية 30% وتنظف بالفرشة بردوا بس مدة صغيرة جدا متعدي خمس دقائق عشان مش ياكل الردياتير
وبعد كدا تجيب مية نظيفة تاني وبالفرشة وتغسل المكان كويس وتصب عليه مية كتير عشان تتضمن ان معدش اثر لمية النار
وتجيب سنفرة اي حاجة خشنة ناعمة مش مهم وتسنفر المكان على قد ما تقدر ويكون ف نفس وقت السنرة بتضيف ميه وبعد كدا تصب مية عشان تشيل اي آثار أو اي حاجة ويكون المكان نظيف
تسيب الردياتر لما ينشف خالص من الميه نهاية وممكن تستخدم استشوار مثلا او ولاعة او علبة بيروسول وتشعلها عشان تنشف المكان كويس قوي دي اهم خطوة
تعجن معجون الحديد على بعد وتحطه على المكان اللي سنفرته من قدام وخلف وتغطيه كله خلص الانبوبتين عليه مش مهم المهم انك تضمن انك غطيت الجزء كويس جدا
تترك الردياتير مدة ربع ساعة على الاقل وتبدا عملية التركيب تاني
تركب الردياتير وتثبته بالماسمير ثم خراطيم المياه ثم المراوح
كدا كله تمام بس بلاش تضيف مية دلقتي للردياتير الا بعد ساعة او ساعتين على قد ما تقدر لو قدرت تسيب العربية لتاني يوم يكون احسن لان معجون الحديد بيصل للتصلب التام بعد 24ساعة
تضيف الميه بعد كدا من القربة (ميه مقطرة او مية خضرا) انسى حوار مية الحنفية دا سبب كل مصايب دورة التربيد وتقريبا هو دا السبب الوحيد اللي بيبوظ دورة التبريد
ومتناسش تاخد هواء دورة التبريد عن طريق اعلى خرطوم فايز راكب ف الردياتير تتاكد انه خرج مية كتير ومعدش ف هواء بيخرج
واتوكل على الله وجرب العربية مش هتلاقي ولا حتى نقطة تنشيع ميه بعدا نهائيا وهتدعلي

الموضوع محتاج شوية مجهود صغير بس انت لو عملته كدا احسن مية مرة من اي صنايعي هيعلمه

انا عملت كدا ف عربتي بنفس الخطواط والنتيجة فوق فوق الممتازة