الموضوع: صيانة 60 الف لفيفي بعد زيادة الاسعار وجنون الدولار

اولا انا بعتذر لاخواتي في المنتدي الجميل نايل موتورز عن انقطاعي الفترة الاخيرة وذلك لظروف الجواز والشغل



وطبعا اتلهيت عن الزوجة الاولي مدام فيفي ولحد ما لقيت العداد في وشي كدا



طبعا افتكرت ان الزوجة الثانية شطبت علي اللي ورايا واللي قدامي طب اعملها صيانة منين بس المهم كنت مخبي قرشين علي جمب كدا من ورا الحكومه وقولت مبدهاش ويانا يا الصيانة دي واتصلت بحبيبي هاني ميخائيل وربط معاه معاد علي امبارح 29/4 طبعا علشان الحق عرض الميه الخضرا اهو حتي لو محتجهاش الريداتير اشربها انا الجو حر بردك ومفيش عندنا مراوح تبريد

طبعا انا رايح ومنتظر الصدمه في ارتفاع الاسعار وقطع الغيار اللي هتولع نار

ابتديت بشراء الزيت وطبعا كالمعتاد بجيب فيسكو 3000 بمشي بيه 10000 كيلو وطبعا مصدقتش اني لقيت سعره زي ما هو 120 جنيه فرحت جدا طبعا

وطلعت علي مركز سبيد وقابلت حبيبي هاني باشا وخدت منه لسته بالمشتريات وكانت كالتالي

سير كاتينه أصلي ( 195 جنيه )
بليتين كاتينه أصلي ( 200 جنيه )
سير تكييف ودينيمو وباور أصلي ( 90 جنيه )
فلتر هواء كوري ( 25 جنيه ) الاصلي ب ( 50 )
فلتر زيت أصلي ( 20 جنيه )
فلتر بنزين أصلي ( 35 جنيه )
تيل فرامل أمامي موبيس ( 120 جنيه )
طقم بوجيهات أصلي ( 65 جنيه )

الاجمالي 895 جنيه

وطلعت علي حبيبي هاني وفيفي خدت البنج وريحت وابتدي الشغل من الساعه 7 مساء الي 9.30 مساء والحمد لله كل شئ كان تمام وخلصت الحمد لله علي خير

تم تركيب كل المذكور أعلاه مع بعض الاضافات

اولا تغير مياه الريداتير بمياه خضراء بدل الصداء اللي كان هاريه والبشمهندس هاني ربنا يباركله فضل ورا الريداتير لحد ما صفي كل الصداء اللي جواه وجوا الماتور والمياه كانت نازلة صافيه زي الفل

ثانيا الكشف بالكمبيوتر علي فيفي والحمد لله كل شئ كان تمام

ثالثا غسل الماتور بالكامل ورش WD40 علي المكونات الداخليه للحوض وتنظيف البوابات

الشهاده لله العربية ما شاء الله كنت حاسس انها هترميني براها وتطلع تجري مني حسيت ان العربية رجعت 5 سنين لورا وبقيت زيرو

الفرامل اللي كنت بشتكي منها أدائها أتحسن جدا وحاسس ان فرامل العربية بقيت حاجه تانيه
طبعا المركز مفيش بعد كدا في الامكانيات والله ما حاسس بأي فرق بينه وبين الوكيل في أي حاجه عدا الضمير تحس ان اللي كنت بروحلهم في التوكيل كانوا بيقلعوا ضميرهم مع هدومهم ويلبسوا العفريته بتاعت الشغل
خدت ضمان 5000 كيلو او 3 شهور علي الشغل اللي تم في العربية
المصنعيه الصراحه الناس تستاهل اكتر من كدا علي الشغل اللي اتعمل فيها 150جنيه

يعني العبد لله اتفحت اليوم ده في 1045 جنيه


وبعتذر لاخواتي لان الموبيل فصل شحن ومعرفتش أصور العربية وهيه بتتعمل بس انا شرحت علي قد ما قدرت ويارب اكون افادتكم

واحب اقول لهاني حبيبي كل سنة وانتا طيب يا غالي

المشاركة الأصلية كتبت بواسطة sammor_28

مبروك ياباشا للزواج
ومبروك لصيانه فيفي
ربنا يباركلك فيها

الله يبارك فيك يا بشمهندس

المشاركة الأصلية كتبت بواسطة mhkorayem

مبروك الصيانه والجواز
وفعلا المهندس هاني راجل محترم ورينا يباركله

الله يباك فيك يا بشمهندس وفعلا البشمهندس هاني انسان ربنا يباركله

المشاركة الأصلية كتبت بواسطة khaabas

مبروك يا كبير على كل حاجة
والاسعار الحمد لله لسه زى ما هى بالنسبة للفيرنا
بس سيبك انتا ايه ورق العدادات الجامد موت التنين ده ما شاء الله

الله يبارك فيك يا غالي وبالنسبة للعدادت اتفضلها والله ما تغلي عليك

المشاركة الأصلية كتبت بواسطة Walid_M

مبروك الصيانة .... وقبلها مبرووك على الزواج

بصراحة إنت بطل انك بعد الجواز عرفت تعمل الصيانة دي !!!

ده إنت فدائي يا راجل ....

ربنا يبارك لك فيها ... ويديك خيرها ويكفيك شرها إن شاء الله

تحياتي

ههههههههههههههههه الله يخليك يا استاذ وليد يا رافع من روحي المعدنيه وعبال ما تفرح باولادك

المشاركة الأصلية كتبت بواسطة dr.hazem

ألف مبروك الصيانه وحمد لله على السلامه

الله يبارك فيك يا دكتور حازم

المشاركة الأصلية كتبت بواسطة BuNsH_FoX

حمدلله على سلامتــــــــــــــــــــ ـــــــــــــــــــــــــ ـــــــــك *مفتقدينك*
ومبرووك على الصيانـــة وربنا يباركلك فيها يارب وأنا مكنتش مصدق الكلام اللى بيتقال على م/ هانى لغاية لما شوفتة بنفسى ,, راجل محترم وخدوم لابعد الحدود .

الله يبارك فيك يا زعيمنا وبعدين انا اللي افتقدتكم الفترة دي كلها وربنا اللي يعلم غصب عني وان شاء الله ابقي علي قد ما اقدر متواجد معاكم دايما

المشاركة الأصلية كتبت بواسطة S O P H O S

الف مبروك الصيانة ..

الله يبارك فيك يا غالي