الموضوع: الماروتي عليها اللعنة

بدا الموضوع لما استلفت عربية ابن خالي(ماروتي 99) لشراء شوية حاجات من عوض الله اللي ف المجزر المفيد انا صراحة رحت وخلصت علي 9 بليل وبعدين عملت شوية مشاوير وبعدين قولت الف واشوف حته فاضية كده اتعلم فيها نقل الغيارات بسرعة انا لقيت كده شارع طويل شوية بتاع سور الامن المركزي وكان فاضي الشيطان لعب ف دماغي بمفك واجري بقي يامعلم قال يعني راكب عربية ف سباق فورميلا 1 مشيت شوية وقلت الف بقي وارجع وانا راجع لقيت برده فاضي طيارة بقي واذا بيا المح واحد بيشاور لتاكسي مش عارف ماهي كانت فاضية دااحنا الساعة 12 بليل ايه ده ؟ بسيطة دبرياج وفرامل وهات المورالاول قلت اتخطاه وخلاص بس انا جيت احسبها لقيت ان كمان في عربيات جاية ف وش التاكسي يادي النيلة ماهي كانت صحرا من شوية قولت طب عقبال مابتاع التاكسي يمشي هفرمل بسيط يعني مش هقف وخد عندك البيه كان واقف بيكلم الراجل مش هيركب قولت خلاص الامر لله اقف وقد كانت المفاجاة ان دواسة الفرامل لصقت ف الارض احلاووة ده انا لسة بتعلم من اسبوعين ده انا كده هتبهدل ومش عربيتى يادى النيلة ودى شاهين يعنى ده انا بالنسبة لها قد البوجيه ماعلينا انا حسيت انها بردت فجاة كده وميه دافيهه انا فكرت ف 3 حلول اول واحد اني افتح الباب وافرمل بالاديدس بس افتكرت ان دي عربيه مش لعبه تاني واحد اخبط بقي يامعلم تالت واحد اني انزل من التالت للاول علي طول وقد كان بس العربية جعرت كده وحسيت انها هتشتم صراحة لما بصيت للهاند بريك خطف كده وانا برجع للاول افتكر اني ممكن اشدها قمت شاددها والحمد لله زحفت ولفت كده وانا عمال اجيب ف الدركسيون شوية يمين وشوية شمال والا هاخد العمود بالحضن وأخيرا وقفت افففف ركنتها زق والموتور داير كمان وطفيتها وقفلتها بالانذار واتصلت بصاحبها جه خدها وتوبه مش راكبها تاني ده انا قطعت ميه ونور من الخضة بس اكتشفت اني ف الزنقة بفكر بسرعة اوي اه والله السؤال بقي هل انا دست جامد فرامل فرملت بس الدواسة مارجعتش بس لو معلقة كانت كلبشت ف الارض مااتحركتش انا جريت بيها قبل ماالف وفرملت واحدة واحدة يعني مش ضعطة واحدة طب ليه بقي كده ؟ بس الصراحة لولا العناية الالهيه والمنتدي الجامد ده لان كنت قريت قبل كده موضوع هنا كان بيتكلم عن انك هتعمل ايه لو معاكش فرامل ؟ بصراحة شكرا يااجمد منتدي سيارات ف مصر والله مش مبالغة بصراحة مش راكب علبة السالمون دي تاني