عاوز اغير زيت .. ومش فاهم !!!

**HHALAWANY** · 01-05-2013 12:49 PM

السلام عليكم ورحمة الله وبركاته
شباب المفروض اني عاوز اغير الزيت بعد ال١٠٠٠ كيلو لاني مسافر زي ماكنت قلتلكوا ومش هتأخر ولما ارجع هابقى اروح للتوكيل... تمام
وكنت عاوز اعرف عشان انا متلغبط جدااا لان في زيت فيتيس وزيت ماتور وزيت مش عارف ايه والكلام ده
فسؤالي هو
١) هو انا هاغير زيت ايه للعربية بعد زييت التليين ؟؟؟
٢) ايه افضل نوع كويس يمشي مع عربيتي السوزوكي الماروتي ؟؟
٣) عند مين بالظبط ؟؟
٤) احط كام لتر؟؟؟
٥) لو في اي معلومة تانية انا مش عارفها يا ريت الجهابزة يفيدوني بيها...

وشكرا جداا ، واتمنى ان اساتذتي ترد على الاسئلة نقطة نقطة عشان ساعات في حاجات بتتنسي
معلش بقا انا تاعبكوا معايا بس لسة مبتدء ،،
تحياتي

**HHALAWANY** · 01-05-2013 02:02 PM

ايه يا شباب فين الهمه ، كله بيشاهد بس !!! :) :)

**lidosasa** · 01-05-2013 03:36 PM

الأول لازم تغير عند موزع معتمد أو محطة بنزين محترمة وتتأكد بنفسك إن الجركن متبرشم عشان الغش اللى فى الزيت
أفضل زيوت للماروتى سواء للموتور أو الفتيس هى الشيل
زيت الفتيس بيكون 80w90 والعربية بتاخد 2 لتر ولو ملقتش عبوات لتر من زيت شيل ممكن تجرب الموبيل فيه عبوات لتر تجيب علبتين هو تقريباً تمنها حيكون 22 أو 24 للعلبة .
وأعتقد إن الأفضل تغيير زيت الفتيس عشان الرايش اللى بيبقى فى العربية من التليين .
وبالنسبة لزيت الموتور شيل هيليكس الأصفر 15w50 وأنا لسه شارى الجريكن 4 لتر ب 130 جنيه والعربية بتاخد 2.5 لتر لو مش حتغير الفلتر و 2.75 لتر لو حتغير الفلتر وأوعى تحط نقطة زيادة عن المعيار ده .
الأسعار دى شاملة التغيير يعنى مش حياخد منك فلوس تمن التغيير
زيت الموتور ممكن يقعد معاك 5000 كيلو أو أكثر وممكن جداً يبقى أقل حسب سواقتك
بس مش عارف بقى أيه هو وضع التوكيل مع تغيرك للزيت بعد ما ترجع من السفر ؟؟ هل حينزل الزيت اللى أنت حاطه تانى ولا أيه ؟
دى تجربتى الشخصية وأنا بعمل كده فى عربيتى ولو فيه حد من خبراء الماروتى يفيدك أكتر يبقى جزاه الله خيراً
وأوعى تحط من الطرمبة اللى بيتبقى شبه البرميل مهما كانت الظروف عربيتك جديدة وحرام تبهدلها بزيت من برميل ربنا وحده اللى يعلم محطوط فيه أيه

**Amr Axel** · 01-05-2013 07:05 PM

معلش هرد عليك بشكل مختصر عشان موبايل
المفروض تغير في التوكيل عشان لو فيه اي حاجة في العربية تقوللهم عليها و الضمان لو هتسيبك من التوكيل اذن اللي يتغير دلوقتي زيت موتور بس اما زيت الفتيس بتاع التليين بعد اول 10 الاف ك و بعد كده كل 20-30 الف بالكتيير
زيت الموتور يبقي شل 15w50 او اللي بيسمي شل الاصفر و ده يتغير تقريبيا كل 4-5 الاف و ممكن اكتر ع حسب زي ما شرحت قبل كده و تجيبه من البنزينة بلاش برة و التغيير ممكن في نفس البنزينة بس يكون عندهم فلتر زيت الماروتي تسالهم الأول او تشتريه من برة معاك و تغير الفلتر مع كل تغييرة زيت للحفاظ ع نضافة الموتور و لأن الواحد برده ميضمنش الفلاتر المنتشرة الا لو هتجيب الفلتر الاصلي سوزوكي من منفذ بيع مودرن موتور
العربية بتاخد 2.75 بالفلتر اوعي يزودلك اكتر من كده و لا يفتي عليك