قصتى الحزينة

**meza** · 18-08-2008 01:36 AM

هحكيلك حكايتى أنا كمان عشان متحسش إنك إنتا بس اللى كده

أستاذ مينا عنده حق فى دى :

مش هقولك انتا الغلطان بس هقولك صدقني مش والدك بس هو اللي كدا... نسبة كبيرة جدا من الاباء كدا دي صفة من صفات الآباء المصريين عامة
المبالغة في التضييق على ولادهم عشان بيكونوا فاكرين أنهم كدا بيحموهم

بص يا سيدى .. والدى و والدتى من النوع اللى بيخافوا على ولادهم لدرجة تخنق !!!
تخنق؟؟؟؟؟!!! ...
نتكلم شوية ... كنت واخد الموضوع عادى لأنى مكنش ليا فى الخروجات و كده لغاية تانية ثانوى ... إبتديت أروح دروس و أخرج مع أصحابى ... لقيت أهلى بقوا بيسألونى على كل حاجة ... إتضايقت ساعتها لأنى قارنت نفسى بأصحابى ... كلمتهم بصراحة (زى ما متعود) و قلتلهم إنهم خانقين عليا قوى ..أقنعونى إن ده كله مصدره الحب مش أكتر لأنهم ملهمش مصلحة عندى ولا نفسهم ينتقموا منى و ردهم خلانى أستغبى نفسى قوى إنى إزاى بردلهم خوفهم عليا من المخاطر الكتير اللى بره بالشكل ده.

المهم فضلت مقتنع إن خوفهم عليا نابع من حبهم ليا و كل ما الخوف ده يزيد بيثبت إنهم بيحبونى أكتر.

دخلت كلية الطب .. بدأت أخد راحتى أكتر .. أهلى عاملونى كأنى كبير و ممكن يعتمد عليا ... بس هما فضلوا متابعين كل حاجة بعملها بس على خفيف قوى ...و بقيت برجع متأخر بسبب خروجات مع أصحابى بعد الدروس و ريحتى ساعات بتبقى سجاير بسبب إنى بقعد على القهوة مع أصحابى ... و ده شىء كان بيضايقهم جداً .... و لاحظوا عليا إنى إبتديت أتغير و تصرفاتى مبقتش زى الأول .....
أخدوا قرار إنهم هيرجعوا للخانة الأولانية تانى ..... إبتدت المراقبة ترجع تانى من سنة و نص تقريباً ... و للأسف أنا مستوعبتش خوفهم عليا زى الأول ... و بدأت أبص لحبهم على إنه مؤامرة للتضييق عليا بدون أى مبررات .... حسيت إنهم مبقوش بيثقوا فيا خالص فى الفترة الأخيرة ... بسبب خناقات كتيرة فى فترة الإمتحانات و الضغط العصبى الرهيب فى الكلية ... و قالوهالى مرة .. إنتا مبقتش زى الأول و إحنا مش واثقين فيك !

و فى الأجازة دى ... زادت الخنقة عليا .... مبقتش مستحمل .... أخدت قرار صبيانى متسرع إنى هسيبلهم البيت ... فعلاً ... أنا عمرى ما تخيلت إنى ممكن أوصل للدرجة دى ... لكن فعلاً كل الإيجابيات بتاعتهم حولتها لسلبيات فى عقلى .... لميت هدومى ... و إبتديت الخناقة و السيناريو الخبيث اللى رسمته عشان ينتهى بإنى أفتح الباب و أجرى على بره و أرزعه ورايا .... و أشوفهم فى البلكونة و هما متحسرين عليا و أنا ماشى :(.... متستغربوش .. هى دى الدرجة اللى وصلتها .. عاوز أنتقم ! ... و صدقونى أنا أبعد ما يكون إنى أعمل كده عمرى ... بس فعلاً مكنتش قادر أستحمل و حولت كل حاجة حلوة لسواد فى عينيا.

فى وسط الخناقة ... والدى عمل حاجة ... خلت الخطة الشيطانية بتاعتى دى تبوظ و تتقلب 180 درجة و خلتنى أعيط الليل كله.
لقيته بكل قوته كأنه بيحارب رمانى على السرير و لطشنى بأجدع قلم على وشى ... و قفل باب الشقة بالمفتاح و دخل الأوضة و قفل باب الأوضة برضه بالمفتاح ....... و قاللى بعلو صوته .... أنا مش مستعد أخسرك عشان ساعة تهور منك و نظراته كانت صعبة عليا قوى ... و لقيته قعد على المكتب جنب السرير زى الحارس مراقبنى لمدة ساعة كاملة ... و أنا ساعتها مش قادر أرفع وشى و أبصله ..... كنت مكسوف من نفسى جداً .. أيوه القلم فوقنى .... قلتله كلمة لخصت كل اللى عايز أقوله .... أنا أسف :(.... علامات وشه إتغيرت .. إبتسملى .. و فتح باب الأوضه .. و قفل عليا بالمفتاح لحد الصبح .. و أنا قاعد بفكر و أعيط طول الليل .. إزاى ممكن أكون وصلت للدرجة دى ؟!!! .. أنا الولد الهادى العاقل الخلوق بشهادة كل اللى يعرفونى .. إيه اللى وصلنى للدرجة دى ؟ ... إيه اللى جاب الأفكار دى لدماغى ؟

أنا إتخنقت !!! .. لأ أبداً ... و بقولها و أنا كلى إقتناع ... أنا بفتخر إن والدى و والدتى بيحبونى للدرجة دى و بيخافوا عليا.

و بدأوا حالياً يثقوا فيا تانى ... و الحمد لله أنا آهل للثقة دى حتى الآن.

**************
إسمع كلام واحد فى نفس سنك و مر بنفس تجربتك ..... إنتا حبيت تنتقم من أهلك .. و أنا برضه كنت عاوز أنتقم من أهلى .. و للأسف إنتا نجحت

إنتا كنت عاوز تسيب البيت ... و أنا برضه كنت عاوز أسيب البيت .. و للأسف إنتا برضه نجحت.

بس بالرغم من نجاحك فى الحاجتين دول ... لسه الفرصة قدامك ترجع و تعترف بخطأك .... من فضلك متنكرش .. لأن ده جزء من المشكلة إن مكنش المشكلة كلها ... إنتا غلطان لكن لسه عميان عن الحكاية دى.

إدى فرصة لأهلك يظهروا حبهم ... جايز مقدروش يوضحولك ليه هما بيعملوا كده ... بس يمكن إنتا مدتهمش الفرصة.
إرجع و إعمل زيى و قول أنا أسف .. بس عن إقتناع ... هتلاقى كل حاجة إتغيرت و خطأك (أيوه خطأك) بإنك سبت البيت هيتحول لحب كبير بينك و بين أهلك و ثقة عمرك ما كنت تتخيلها.

إسمع كلامى ... إرجع و فووووق ... من غير قلم.
جايز القلم اللى أنا أخدته كان بإيد والدى و ساب أثر على وشى يومين و خلاص ... لكن إنتا متضمنش القلم اللى هيفوقك هيبقى بإيد مين ؟ و هيسيب أثر قد إيه؟ .... فاهمنى ؟!

أنا حكيتلك كل المشاعر اللى مريت بيها و إتكلمت بقسوة ... لكن ده لأنى لسه ندمان إنى عملت كده و ده ضامن إنه ميتكررش ... و نفسى إنتا كمان تبقى ندمان زيى ..

****** ليا تعليق على كلام الدكتور ليك :

و روحت لدكتور نفسانى و اتكلت معاه و اللى كان بيحصل معايا وانى صغير قالى انتا كويس ان لسة مستحمل لحد دلوقتى و ان فى ناس غيرك بيجلهم حالات اكتئاب و مش بنعرف نخرجهم منها و قالى ان كان فيه حالة شبيها لحالتى المريض اصاب بالصمم و قالى ربنا بيحبك و لو جبتلى والدك هالومة على اللى عمله فيك و ان دة مش صح و انتا مش بنت عشان يضغطوا عليك كدة و والدك السبب اللى خلاك تبعد عنه و متحبوش

الدكتور ده ... حاجة من الإتنين .. يا هو مبيفهمش لأنه بيشجعك على حاجة غلط ... يا هو ذكى جداً و حاول يكسب ثقتك عشان تسمع لكلامه و نصايحه.
لكن نصيحتى متاخدش كلامة حجة و مبررر ليك.

لو مش مقتنع بكلامى ... ناقشنى و أنا مرحب جداً.

آسف على الإطالة

**Karim_Monir** · 18-08-2008 01:48 AM

يا ادهم انت محترم وابن اصل ولا نزكي علي الله احدا_بس يا ريت تكون نفذت اللي اتفقنا عليه امبارح_مستني رسالتك علي الخاص رغم اني داخل من الموبايل

**theking2690** · 18-08-2008 10:38 PM

نصيحه استغفر ربنا و ارجع البيت تانى صدقنى مش والدك بس اللى بيعمل كده ناس كتير بتعمل كده انا والدى برضه محددلى ميعاد ارجع فيه وماينفعش اسافر مصيف مع اصحابى لوحدى وتحكمات تانيه كتير وفعلا برضه بضايق لما بقارن نفسى بأصحابى اللى اهاليهم سايبيهم براحتهم طيب انت عارف هقولك على حاجه المقابلات بتاعت المنتدى انا كذا مره اقول هاجى و ماروحش بسبب انو بيبقى عاوز يجى معايه علشان ينعرف على الناس بتوع المنتدى و يشوفهم كويسين و لا لأ لأن هو بالنسباله كل الحاجات اللى بتبقى على النت بتبقى كدب فى كدب فأتكسف و ماروحش المقابله و ارجع اعتذر بعديها بس انا بعد كده فهمت ان د من خوفه عليه لأنى ابنى الوحيد جايز ناس تانيه تقولك ده بيعاملك و لا كأنك بنت الناس اللى زى ديه متسمعش كلامها هو بيعاملك كده علشان هو بيحبك و بيخاف. عليك البنى ادم الوحيد فى الدنيا اللى يتمنى انك تكون احسن منه هو والدك البنى ادم الوحيد اللى هينصحك لوجه الله و هو مش مستنى منك حاجه هو والدك هو الوحيد اللى هيخاف على مصلحتك صدقنى مش انت الوحيد اللى كده بس المشكله ان جايز بسبب موضوع سقوطك ده كان والدك مضايق حبتين فالموضوع زاد شويه انما انت استغفر ربنا وارجع بيتك تانى و اوعى اوعى تعمل كده تانى عمر ما فى حد هيستحملك زى والدك ووالدتك

**aif** · 19-08-2008 02:52 PM

السلام عليكم
يا رب تكون اعصابك ارتاحت شوية يا ادهم .......
انا عاوزك تبص للموضوع من زاوية تانية يا ادهم ..... انت شايف سلبيات والدك بس .....لكن اكيد هو برضه له جوانب ايجابية ..... يمكن طريقة معاملته معاك فيها شيء من الخوف الزيادة عليك .....
تخيل يا ادهم انك اتحرمت من والدك ...... ( ربنا يباركلك فيه ويديله الصحة وطول العمر ) وتخيل حياتك من غيره ح تكون ازاي ....
انا عمري 44 سنة ....لكن وجود والدي جنبي بيحسسنتي بالامان ...برغم اني متجوز من زمان وعندي اولاد ....
الاب شيء مهم جدا في الحياه يا ادهم ..... يمكن اللي عندة اولاد بيحس بمدي حب الاب لأولاده ......لازم برضه تلتمس العذر لوالدك .... انت اكيد عارف ومتأكد انه بيعمل كده بدافع انه بيحبك وبيخاف عليك ..... ممكن يكون شاف مواقف معينة من اولاد تانيين تدفعه للخوف عليك بالشكل ده .....
نصيحة لوجه الله ..... خليك اقرب لله ....وخصوصا ان رمضان علي الابواب ....والزم الاستغفار .... حاول تستغفر الله ... وانت ماشي وانت سايق ...قبل النوم .....في جميع الاوقات ..... وان شاء الله ربنا يجعل لك مخرج من كل كرب

**KoDaK_Gti** · 23-08-2008 11:48 AM

الناس اللى هنا قالو كل حاجة ومفيش كلام زيادة لحد يقوله اكتر من اللى اتقالك
عملت ايه ادهم
طمنا وقول انك رجعت وبوست ايد والدتك ووالدك

**r0xer** · 23-08-2008 01:31 PM

أنا مبعرفش أنصح والحمد لله.

لكن هقولك حاجة...اللي بيسامح بيكون قلبه كبير. و اللي بيعتذر بيكون عقله أكبر.

و بجد بدعيلك من كل قلبي إن ربنا يصلح الحال عندك و أنت واضح من كلامك إنك بني آدم محترم وحساس و إن شاء الله تنتهي مشكلتك مع والدك.

و على فكرة ناس كتيرة كانت تتمنى إن أهاليها يبقو حريصين على أولادهم زيك كدا :) أنا والدي و والدتي سابوني أعتمد على نفسي و أنا في سن 14 سنة :) و كنت في سن 16 سنة ببات برة البيت و النتيجة إني تعرضت لمصايب ياما و خناقات ياما ومشاكل ياما و محدش لمني غير خطيبتي السابقة اللي رجعتني للحياة الطبيعية تاني و دلوقت بحاول أبدأ من ال0 تاني :)

صدقني خوف الأهل اللي أنت متدايق منه دا..ناس غيرك كانت تحلم بيه علشان على الأقل يحسو إن أهاليهم كانو بيحبوهم.

ربنا يوفقك يارب و تنجح السنة الجاية و بتقدير كمان.

**r0xer** · 23-08-2008 01:34 PM

أه صحيح نستني يا اخي أقولك :) أنت بما إن ليك في مجال البرمجة و الHacking. فأكيد عندك خلفية عن أنظمة *Nix. ممكن يبقى في بينا شغل أو أي نقاشات لإن أخوك عمره في حياته ما أستخدم ويندوز و طول عمره بيعتمد على برمجته هو و الOpen Source في مجال البرمجيات. يعني إحنا متقاربين كمان في النقطة دي لان أكيد أنت مهتم بمجال المصادر المفتوحة واللينوكس :)

روّق بقا :)