مشكله بعد غسيل الماتور بالمايه أبيزا 2000

السلام عليكم

انا النهارده قلت اغسل العربيه عادى يعنى رحت غاسلتها فى مكان خاص جمب البيت بنفسى
فتحت الخرطوم عليها وقلت اغسل الحوض بعد ماخلصت حدث الأتى .

ادور حالفه مادور سبع تمن مرات ولا الهوا
جبت ميكانيكى جمب البيت شمال يمن قالى هزوقك اركب ورمى كده
تارت أخيرا من اول محاولة زق ورمى :shyy:
بعدين الحلو مايكملش دارت بس ادوس بنزين الار بى أم 20 فقط مابيطلعش اكتر من كده
فضلت اسخنها خت مشوار 10ك وماشى براحه مهما ادوس بنزين على الأخر
وبعد كده لاحظت فجأه اشتغلت تمام وبعدين رجعت تانى عماله تعلق أبطل وبعدين اشغل الماتور
تشتغل تمام مره ومره لأ
اه لمبة EPC منوره على طول وشويه تفصل لما الماتور يظبط لوحده كده ولما الماتور يرجع تانى تنور تانى
وسعات تفضل منوره ويكون الماتور مظبوط
الميكانيكى قالى سبها للصبح عشان المايه تنشف

ايه رايكم يارجاله فى المشكله ديه وسبابها ايه
معش طولت عليكم
منتظر ارئكم

انت رشيت المياه علي ايه بالظبط في الحوض يا حسام؟ ممكن تكون المياه دخلت البوابة!! ومعاه حق الميكانيكي سيبها في شمس النهار تنشفها وافصل كابل البطارية وفك المنيفولد اللي فيه فلتر الهواء ونشف الفلتر وشوف البوابة لو وقع فيها مياه نشفها بقماشة والله اعلم

اشك ان البوجيهات او سلوك البوجيهات طالتها مياة ورطبت
اعمل زي إيهاب والميكانيكي قالوا

والله المستعان والموفق
،
،.

يا راااااجل حد يعمل كده!!!!!!!
حوض العربيات مش بينضف بالمياه لانه مليان حساسات وأي حساس لو طالو مياه هيفصل
المواتير دي بتتنضف بالفووم المخصوص ليها, ده انت أبو ال car care
ولو علي الحوض بحتة فوطة مندية بالمياه أو بالجاز وتمسح بيها الشنب والفخد

دلوقتي عشان تحل الموضوع ده فك فيش كل الحساسات ورش جواها wd40 عشان يزحلق المياه ويزيت الفيش وميخليهاش تجنزر من جوه

اقتباس:

---

المشاركة الأصلية كتبت بواسطة syd

اشك ان البوجيهات او سلوك البوجيهات طالتها مياة ورطبت
اعمل زي إيهاب والميكانيكي قالوا

والله المستعان والموفق
،
،.

---

ترطيب البوجيهات لا علاقه له من قريب او بعيد بالميه ياغالي
هو المصطلح بيتقال لكنه المقصود بيه حاجه تانيه تماما...

المعدن المصنوع منه قطب البوجيه ممكن يحصله تأكسد بعدة عوامل وهنا في الاردن بيطلق مصطلح انه مبررد زي متقول واخد برد
بغض النظر عن المصلطح...
انا بغسل بوجيهاتي كل 10آلاف كيلو بميه وصابون وبصنفرهم واركبهم وزي الفل


المشكله هتكون اما ميه جت في حساس لو العربية انجيكشن او جت عالاسبراتير لو العربية كربيراتير

وكده كده الحل فعليا انها تتساب تنشف وبلاش كتر التدوير عشان البطاريه متنامش ان شاء الله

تحياتي

وطبعا ممكن تكون العربية حاليا شرقانه من كتر محاولات التدوير فلازم تتساب في الشمس....

نسيت ااكد على معلومة

درجة الحراره جوه المحرك بتعدي ال300 درجه مئويه فلو في رطوبه من ميه جوه الماتور مستحيل تفضل ....
وده بيأكد ان الموضوع مش رطوبه بالمعنى المعروف


تحياتي

شاكر جدا يارجاله مُشاركاتكم واهتمامكم .
انا كنت رحت كشفت عليها بالكمبيوتر قلى انى حساس البدال بتاع البنزين وقلى هوا
ورى السدر يعنى فوق دواسة البنزين (تحت التبلوه كده ) مدى Error خطأ - وده الى بيفسر تنوير لمبة EPC مش كده
وعشان يفكه غلبه ، وقلى سبها فى الشمس وهيا هتنشف .

الكلام ده صح
ـــــــــــــــــــــــــ ــــــــــــ

انا غسلتها أكتر من مره بالميه بس ديه اول مره تعملها كده بالشكل ده قبل كده كانت بتلت عشان البوجهات جه عليها ميه شويت هوا وبتبقى تمام
وwd40 مش مشكله لما حطه ونضف بيه الحساسات

فى حاجه مهمه بردو لازم اقلها انا رشيت عارفين منظف الأوانى أو افران البتوجازات هههههه ومحدش يضحك
كنت اقصد أنزل أى زيت أو أى شحوم وبصراحه المتور لمع .
وعلى رأى المثل مايقع غير الشاطر

اه نسيت أقول انا نضفت البوابه كويس للعلم ونطرت الميه من البوحيهات وسلوكها وهيا ركبه

اقتباس:

---

المشاركة الأصلية كتبت بواسطة karim ibiza

يا راااااجل حد يعمل كده!!!!!!!
حوض العربيات مش بينضف بالمياه لانه مليان حساسات وأي حساس لو طالو مياه هيفصل
المواتير دي بتتنضف بالفووم المخصوص ليها, ده انت أبو ال car care
ولو علي الحوض بحتة فوطة مندية بالمياه أو بالجاز وتمسح بيها الشنب والفخد

دلوقتي عشان تحل الموضوع ده فك فيش كل الحساسات ورش جواها wd40 عشان يزحلق المياه ويزيت الفيش وميخليهاش تجنزر من جوه

---

معلش عايز اوضح نقطة
فيش فولكس (والأوروبي عموماً) لو فكيتها هتلاقي جواها جوان بيمنع دخول اي اتربة او مياة او اي حاجة تماما جوة الفيشة
وبالتالي ، لو الفيشة راكبة تماما مفيش حاجة ابداً تقدر تدخل

تحياتي

الحمد لله انها جت علي قد كدة
انا فعلا قعدت افكر ايه اللي حايش الأربي ام وخانق العربية
لقيت كلام ايهاب منطقي جداً - لدرجة استبعدت تماما موضوع البوجيهات اللي انا قولتلك عليه

ودة بردو امر منطقي جداً (وخصوصاً ان كمان عندك ايرور في التابلوه)
دي مشكلة ان الدواسة تبقي علي حساس بالكهربا وليس واير

انا عشان كدة معجب جدااااااااااااا بالأبيزا
عربية تكنولوجيا عالية بميكانيكا بسيطة وسهلة وواضحة
SEAT Ibiza, I like it

تحياتي

حسام بك صديقي العزيز مساء الفل يا باشا ، انا ليا تجارب مع موضوع غسيل المواتير والحوض ده مافى مرة اغسلها الا وطبعا الاسبراتير يقرفنى او الموبينة لكن فى حالة حضرتك البوابة طالها ماية وهى الى بتعمل كده ، انا فى حالتى كنت بتعايش لحد ما العربية تجف تماما فى النهار والشمس مع مشوار حلو كده تمام كل حاجة كانت بترجع لطبيعتها ، ده كانت لما تدور بعد محالوات كتيرة بعد الغسيل افضل ماشي بيها واحس انها متلته واحسها بتتحنق لحد ما تقرب تقف وترجع تسحب تانى كان بتتبوظ اعصابي اول ما هتجف ان شاء الله كلها هيبقى تماما يا صديقي لا تقلق ...........

مع خالص تقديري وتحياتي ،،

ربنا يسمع منك ياحسين بيه
انا جربتها من شويه ولسى بردو الاربى أم واطى جدا بس هيا ظبطت مره ورجعت تانى

طيب انا هسبها للصبح تخدلها ضربة شمس زى ماقلتم كلكوا وشوف النتيجة وبلغكوا

معلش يا باشا
انا بس عايز اشركك معايا في تفكيري
دلوقتي انت سايب العربية علي السلانسيه - صح كدة ؟؟
ايه دخل حساس الدواسة بكتمة العربية وانخفاض الأر بي ام ؟؟؟ هو انت لسة دوست بنزين ؟؟
طب لما تدوس بنزين والعربية تكتم - معقولة ومنطقية - لأن حساس البدال مش حاسس بانك دايس
لكن وانت سلانسيه ؟؟؟؟؟

تشيك علي البوبينة - دة 1
نمرة 2 - تشيك علي الأسبراتير
نمرة 3 - البوجيهات وسلوك البوجيهات

تحياتي وربنا يوفقك لما فيه الخير

اقتباس:

---

المشاركة الأصلية كتبت بواسطة syd

معلش يا باشا
انا بس عايز اشركك معايا في تفكيري
دلوقتي انت سايب العربية علي السلانسيه - صح كدة ؟؟
صح تمام
ايه دخل حساس الدواسة بكتمة العربية وانخفاض الأر بي ام ؟؟؟ هو انت لسة دوست بنزين ؟؟
ماهيا لما بدورها الار بى أم بنخفض ويطله شويه وينزل مبرجله او مش ريقه كده
طب لما تدوس بنزين والعربية تكتم - معقولة ومنطقية - لأن حساس البدال مش حاسس بانك دايس
لكن وانت سلانسيه ؟؟؟؟؟
حساس البدال جوه العربيه فوق البدال أزاى هيوصله ميه مش فاهم بصيت عليه لقيته ناشف هوا صحيح فوقيه فتحه منفده على الحوض بس صغيره اوى
كمان لما بدوس على البدال بيرتفع الر بى ام بس لغاية 20 او 2.5 ده اخره
طيب مش كده يبقى حساس البدال عارف انى دوست - يمكن العيب من حاجه تانيه مش عارف
تشيك علي البوبينة - دة 1 مش واخد بالى
نمرة 2 - تشيك علي الأسبراتير
رشيت على حساسه wd40 وكمان بعض الحساسات ومفيش فيده ( هوا لازم أنشفه )
نمرة 3 - البوجيهات وسلوك البوجيهات
تفتكر طيب انا هشيك كده

تحياتي وربنا يوفقك لما فيه الخير

__________________


تحياتي

---

انا ممكن اوديها لحد بس كان نفسى اكتشف العيب بنفسى

معش تعبك معايا ياباشا

طمنا يا حسام بك عملت ايه

الحمد لله العربيه زبطت وعرفت ايه المشكله
طبعأ انا شفت العجب بس الواحد ببركت المولى عز وجل وبتفكيره ومعاه الناس المحترفه الى عرفتهم بالصدفه
بيتحل اى موضوع .
بكره أقصد النهارده بليل هكتبلكم تقريرى وحكلكم وهناك دروس مستفاده
اصلى لسى داخل البيت من نص ساعه كده وتعبان جداااااا

اقتباس:

---

المشاركة الأصلية كتبت بواسطة grandfox

طمنا يا حسام بك عملت ايه

---

مخدش بالى من المشاركه ديه من التعب باين هههه

الله يطمنك بكره هحكى باذن الله
ونتا عشان معاك قرطبه هينفعك الى هحكيه


تحياتى

QUOTE=grandfox;3874968388]طمنا يا حسام بك عملت ايه[/QUOTE]

مخد بالى من المشاركه ديه من التعب باين هههه

الله يطمنك بكره هحكى باذن الله
ونتا عشان معاك قرطبه هينفعك الى هحكيه


تحياتى

نبتدى الحكايه
امبارح روحت لكهربائى ( الكهربائى الثانى ) حموكشا المشهور كشف على العربيه بالكمبيوتر وقلى بدال البوابه هات وحده ايستيراد امت ماشى ونا فى الطريق نزلت احيب حاجه من محل وجيت أروح للعربيه لقيت لمبة الفانوس الى ورا منوره جنب واحد مع أنى طافى النور !!!!

مشيت شويه قلت فى بالى يمكن ديه الى عمله ارر وملغبطه الدنيا
وقفت على جنب بحاول اشوف الدنيا كده وأثناء ذلك جه واحد وقلى
اى مساعده يابيه قلى أنا بفهم فى الكهرباء ! قلتله اتفضل شمال يمين معرفش يعمل حاجه فقلى ايه رايك اوديك عند الأسطى بتاعى قلت فى بالى مش هخسر حاجه خاصة انى شاكك أن البوابه مش بيظه خالص زى ما التنين الكهربائيه قلولى حسب حسابات الكمبيوتررررر .

وطبعا المبينه شغاله والبوجيهات شغاله
المهم فين يعم الحج الأسطى فى مجرى العيون ( مصر القديمه ) قلتله دا هنا جنبنا خلاص يالا بينا

رحت قابلت الأسطى على مظالى العبقرى راجل فوق 65 سنه شمال يمين فك البوجيهات كشف على المبينه وام فاكك البوابه قلى العيب هنا ( بدون كمبيوتر ) قلتله انا كشفت عليها وقلولى هات بوابه وكدا قلى استنى أبص عليها المهم صلحها باحترافيه شديده وأنا بشوفه بيعمل فيها ايه وشرحلى الأتى
فى حد ماخر الترس + مرشوش ماده مزيته ( wd40)عمله عازل للكهرباء بالداخل ( شغل الكهربائى الأولانى جه يكحلها عماها )
ام منظفها بالبنزين تمام وركبها ورش قبلها الرشاشات بماده ونضفها العربيه ظبطت
ونا بدردش معاه اصلى بصراحه مكنتش مقتنع فقلى انتا عارف انا طول عمرى شغال فى المكن ده مش فى مصر فقط
فين ياعم الحج فى توكيل bmw فى المانيا وأختارونى فى اختبار مهندسين ألمان بعد مارشحنى توكيل bmw فى مصر ورحت قبلها بى ام فى لبنان كمان والكويت كمان
ديه قصه باه وقلى رحت وعرفت كمان المكن vw بجميع موديلاته انا فى المهنه أكتر من 50سنه

- اوعى ترش ماتور العربيه بالميه ممكن جاز ودور العربيه عشان تنطر الجاز او بالفوم وممكن لو خايف بقطعة قماش وخلاص .
-ماتستهونش بالصنايعيه غير لما تشوف شغله أو تعرف تاريخه او بخبرتك هتحس بيه .

حمد الله على السلامة يا باشا وأهى تجربة والواحد ما بيتعلمش ببلاش
بس فين عنوان الراجل العبقرى ده ياريت تبعتهولى على الخاص ويسلام لو معاك رقم تليفونه يبقى تمام

تحياتى

اولا حمد الله على السلامة
بس انا مش فاهم برده ايه اللى حصل؟؟

اقتباس:

---

المشاركة الأصلية كتبت بواسطة grandfox

حمد الله على السلامة يا باشا وأهى تجربة والواحد ما بيتعلمش ببلاش
بس فين عنوان الراجل العبقرى ده ياريت تبعتهولى على الخاص ويسلام لو معاك رقم تليفونه يبقى تمام

تحياتى

---

الله يسلمك . الحمد لله على كل شيىء
هبعتلك على الخاص العنوان

اقتباس:

---

المشاركة الأصلية كتبت بواسطة karim ibiza

اولا حمد الله على السلامة
بس انا مش فاهم برده ايه اللى حصل؟؟

---

الله يسلمك ياكيم

تقصد ايه الى حصل فى عملية الصيانه ، طيب انا هحاول اوضح

هوا فك البوابه من ورا ( قلب البوابه ) فى ماتور وترس كبير ونص ترس وشريحة الكترونيه
هوا ظبط اليله ديه كلها الموضوع ده لازم يتشاف بالعين .
يعنى نضف كل ده بالبنزين فى الاول عشان يزيل الماده الى كانت متنضفه بيه الاول تقريبا wd40وعمله عازل للشريحة اللكترونية وبعد كده ظبط الترس مع ترس الماتور مع الترس النص

وممكن من خلال الترس تعلى وتوطى السلنسيه ، بصراحه اتعلمت ازاى اصلحها منه :shine[1]: .