الموضوع: ايه المشكلة لما تتكلم انجليزي بلهجة مصرية ؟

ايه المشكلة لما نتكلم انجليزي باللهجة المصرية ؟

فاكرين المشهد بتاع فيلم عسل اسود لما حلمي راح المدرسة والاستاذة ميرفت قعدت تقول كيلاس وفيسيتور والكلام ده ؟
طيب فاكرين فيلم اتش دبور لما مكي دخل اوضة ارواح وكانت بتقول لصاحبتها i will prepare my papers to be th best in this world?

دي مشكلة عندنا في مصر بس وصلت لمرحلة العقدة النفسية ، وهي ازاي تتكلم انجليزي بلهجة كانك بتتكلم عربي مصري ؟

اصبح من العار انك تنطق الحرف العجيب ده اللي معندناش منه في العربي وهو ال p وتنطقه b فيجي خريج المدرسة اللغات ويرصهملك ويقولك الفرق بين ال p وال b زي الفرق بين ال s وال t!

فتحس انك عندك نقص ما ، والبرغم من انك قلت الجملة صح بدون اخطاء نحوية الا انك بتبقى خايف تتكلم تاني لحسن تضحك علينا الاجانب

احب اقولك انت كويس واللي بيسخر منك هو اللي طالع فيها وعنده عقدة الخواجة

مقدمة صادمة صح ؟ ابو رقية يدعوا للجهل!!!!

انا مش بدعو للجهل ، انا سافرت اكتر من عشر دول اجنبية ، ولا واحدة فيهم ناطقة بالانجليزية ، ولم اري شعب في الدنيا لا ينطق الانجليزية بلكنته! ودلوقتي انا عايش في مدينة كوزموبوليتان ، يعني متعددة الجنسيات ، لو مشيت في الشارع مش حتلاقي اتنين من بلد واحدها ، زيها زي دبي وسنغافورة وهونج كونج
لا الالماني بينطق انجليزي صح ولا الروسي ولا الهندي ولا الصيني كلهم بينطقوها بلكنة لغتهم الام ، ودلوقتي سهل جدا اعرف عرقية اللي بيكلمني في التليفون بمجرد لكنته! الماليزيين تلت عرقيات ماليو وهنود وصينيين ، في التليفون من اول كلمة بعرف اللي بيكلمني من انهي عرقية في التلاتة

كفرنا احنا بقه لما بنتكلم بلكنه يعرف من خلالها اننا مصريين!!!!

ايه المشكلة اننا ما بنعرفش ننطق ال p? طيب ما الايرانيين ما بيعرفوش ينطقوا ال w وبينطقوها v وكنت في الاول بجد صعوبة في فهمهم لحد ما عرفت لما يقولي anyvay يقصد anyway حد سمع ال r بتاعة الروسي ؟ حد سمع ال r بتاعة الفرنساوي ؟ حد سمع اسباني مدريدي بينطق ال j او ال v ؟

بمناسبة الاسباني ايام الكلية درست كام كورس اسباني في المركز الثقافي الاسباني في اسكندرية ، كان بيدرسلنا واحد اسمه سينيور خوسيه نابارو ، الراجل ده بقاله 36 سنه عايش في اسكندرية ، بيتكلم عربي ضايع ، بينما انا وكل اللي معايا بعد تاني محاضرة بقينا بننطق الكلمات الاسباني بمنتهي الطلاقة حتي واحنا مش فاهمين بنقرا ايه!

انت لما بتتكلم انجليزي عندك مشكلة في حرف واحد وهو ال p طيب الانجليزي لما بيتكلم عربي عنده مشكلة في كام حرف ؟
عد معايا ح خ ض ظ ع غ ، يبقي انت احسن منه كفاية انك بتكلمه بلغته وهو مايعرفش يتكلم بلغتك
الاهم بقه ، صدقني وكذب مكي وحلمي ، هو معندوش مشكلة انك تتكلم كده طالما هو فاهم ، المشكلة في زميلك المصري اللي عمال يألس عليك! صدقني تلاقيه ما سافرش ومسمعش الشعوب بتتكلم ازاي
المهم تتكلم صح والناس تفهمك ، انا كنت في مؤتمر وكان في كلمة لمسؤول رفيع المستوى جدا خليجي والحضور كان علية القوم من جميع دول العالم ، الخليجي ضايع في النطق انما كان بيتكلم في موضوع مهم وكلامه مفهوم جدا للجميع فكانت الكلمة ناجحة ، محدش ضحك محدش آلس عليه انجليز وامريكان قاعدين ومعندهومش اي تعليق ولا اي مشكلة ، المشكلة عندنا احنا ، محدش عنده مشكلة انك تتكلم انجليزي بلهجة طالما الانجليزية مش هي لغتك الام!!!
دكتور مهاتير محمد زيه زي كل الماليزيين ال th بينطقها s لان في اللغة الماليزي مفيش ث ، وبيخطب بالانجليزي في ارفع الدول مكانة ، مشفتش واحد متعلم كويس شوية انتقد طريقة مهاتير ، يقدر ؟ تقدر انت ؟ مهاتير لما بيتكلم الناس بتسمع وكأن على رؤوسهم الطير

فمتكبروش الموضوع
انا بدعو للتعلم وياريت تنطق صح زي الخواجة هنري حيبقى شكل كلامك جميل ، لكن لو مش قادر ما تتعقدش ومتخافش واتكلم برحتك صحاب اللغة نفسهم معندهومش مشكلة تتكلم لغتهم اللي هي اجنبية بالنسبالك باي شكل المهم تعرف توصل وعليه لازم يكون ال grammar. سليم
ومتخفش ، اتكلم.

المشاركة الأصلية كتبت بواسطة Mzeid

متفق معاك تماما

و اضيف كمان فلبيني بيقولي coffee كان بيقولها copy
يوناني بيقولوا sulphoor بدل sulphur
و hydrovlic بدل hydraulic

لا الفليبيني بيقولها بلغته ، قهوة يعني kopi بالفلبيني والماليزي والاندونيسي