الموضوع: طقم الدبرياج

المشاركة الأصلية كتبت بواسطة arwah

السلام عليكم ورحمة الله ..الاخوه الاعزاء الشيراويين ..كتير ما اسمع عن رداءة المنتج الصيني بالنسبه للالماني او غيره خاصة في موضوع التيل وانا شخصيا جربت بنفسي المساعدين الاماميين والبطاحات بتوعهم الصيني بتوع العربيه شيري a11 لونج2006 جبتهم جداد من عند الجمال عندنا في الاسكندريه جوز المساعدين ب600 اخدتهم 580 واخدت البطاحتين 150 ومن اول يوم مساعد حجر والبطاحات كوتشيتها بعد شهر واحد بدات تتشقق وتتاكل في الخلاصه حاجات العربيه الصيني زي الزفت والله كنت جايبلها مساعدين جولف ببطاحتهم استعمال عادي مش خليع (استيراد) وكانو افضل وانعم واقوي وارخص وعلشان كده بضم صوتي لصوتكم وبنصحكم بلاش اي حاجه صيني الا المضطر فمعذور ...وانا الان بصدد طقم دبرياج (اسطوانه وديسك وبلي) ..بتاع العربيه سالت عليه عند الجمال لقيته ب450 جنيه كامل ..فهل فيه افضل منه لماركه تانيه تركب علي الشيري ولا مش حيفرق ولالستعمال افضل ولا الجديد يعني بالله عليكم انصحوني في المساله دي وبالنسبه للتيل والكليبرات هل الموديل 2006 لونج بيحتاج تغيير الكليبرات كمان علشان التيل ولا لأ ولا كفايا ادور على التيل بس خاصة اني لقيت ان التيل اللي كان راكب فيها يشبه تماما اللي الاستاذ احمد شحاته مصوره في موضوع ياسم بشري لاصحاب الشيري a11 تعديل الفرامل الاماميه...وجزاكم الله خيرا..

وعليكم السلام ورحمة الله وبركاته.
ازيك يا استاذ سيد.
بالنسبه للمساعدين والبطاحات ركبتهم جولف فعلا وزى الفل والحمدلله ... الاسطوانه والديسك والبلية جبتهم من التوكيل بـ 850 جنيه+ 10% ضريبة مبيعات وما ركبتهمش لسه.
الفرامل الامامية اذا كان التيل اللى عندك زى اللى ف الصورة المرفقة يركب عليها الفولكس الجولف2و3 والسيات انكا واذا كانت غير ذلك يبقى حضرتك ح تركب كليبرات استعمال فى حدود 100 الى 120 جنيه الجوز جولف3 وبدون اى تعديل نهائى هما مسمارين مخ 17 وعليها نفس التيل بس جديد من عند بتوع الالمانى وتنساه.

المشاركة الأصلية كتبت بواسطة arwah

استاذنا الفاضل وحبيبنا احمد شحاته ..والله بحبك في الله وبانبسط جدا لما بلاقيك رادد علي وبلاقي اسمك موجود ومنور..معلش انت عارف ان انا على قدي شويتين .....بالنسبه للدبرياج فهمت من كلامك ان ما فيش بد من انهم يكونوا بتوعها صيني برده....مش مهم ياخدوا وقتهم لكن ليه جبتهم من التوكيل بضعف الثمن وهما هما صيني برده..وبالنسبه للتيل هوه هوه بالضبط اللي خلعه الميكانيكي لاني انا رسمته (حطيت التيل على الورقه ورسمته بدقه) غير ان فيه اختلافين انا معرفش ان كانوا مهمين ولا لا.:الاول الكوفر او الجزء المكتوب عليه topran انا مشفتهوش لما خلع التيل ....والتاني:رجعت في كلامي فيه لانه لقيته متطابق......بس استفسار صغير جدا بكام التيل الامامي (الاربعه فرد تيل) واجيب استعمال خارج (استيراد) ولا اجيب جديد وبكم برده ولو ملقيتش املى التيل وانه خامه افضل معلش انا تاعبك معايا وربنا يرضى عنك ويصلحلك بالك

ده رابط المشاركة وفيه شكل التيل زى اللى ف الصورة.
http://www.nilemotors.net/Nile/289280-a11.html
والتيل الحقيقة مش فاكر بكام.
بس اللى اعرفه ان علشان تريح دماغك تجيب تيل المانى مش مهم اللى مكتوب على الصورة ده اسم الشركة... اى حاجة تانية المانى من عند بتوع الجولف.
لا الملو ما بحبوش بيكون التيل قديم وناشف و بيبوظ الطنابير زى التيل الاستيراد المستعمل بالظبط.
وموضوع التوكيل انا كنت رايح اشوف السربنتينة بتاع التكييف لقيتها جميلة اشترتها.

المشاركة الأصلية كتبت بواسطة arwah

بالفعل استاذنا الفاضل احمد اليوم اشتريت 4فرد تيل الماني ب200جنيه ومع اني اخدتلهم الصوره والرسم المطابق الا انهم بردوا ادولي بتاع باسات او بتاع اودي 3 واودي 4 هو هو بالضبط مع اختلاف طفيف جدا طبعا انا مش حعرف ارسم الاختلاف والميكانيكي قال لي انه ممكن نبرد الزياده الحقيقه لقيت الصيني بتاعها 120جنيه ال4 فرد وشفت تيل مطابق بكل شيء شكله ممتاز فرنساوي الفرده 150 جنيه طبعا قلتله لسه ما قبضتش وحارجعلك....... بس لسه مركبتهموش علشان اقولكو على المصنعيه لانه باين ان حروح للخراط علشان الدسكات من اثر التيل الملو اللي اتاكل تقريبا عمل ريجه في الديسكات
......

حضرتك ما قلتش انا عايز تيل جولف3 او سيات انكا علشان كده كل واحد افتى بشيئ مختلف وادولك تيل اودى.
تيل السيات انكا ح يركب بدون اى تعديل.
و رأيى الشخصى وليس عليك الاخذ به تغيير الطنابير بالمرة المانى بردو بدل الخرط علشان تنسى الموضوع ده خالص وتشيله من دماغك الجوز بـ 325 جنيه جدييييييييييد.
والله الموفق

المشاركة الأصلية كتبت بواسطة arwah

والله استاذ احمد انا قلتلهم بالضبط جولف 3 او انكا وانا رحت لواحد كاتب على المحل انكا ومع ذلك برده سالني على ماركتها ومنغير ما يفكر جابلي التيل اللي الفرده 150 جنيه وقال لي باللفظ( ما تسألش ) وانا مخدتهوش علشان غالي.. معرفش ليه مش بيحبوا يريحوا الناس مع ان اعتقد انه عندهم اللي انا عاوزه لكن على العموم الفارق بسيط جدا وانا حقيقي نفسي اغير الدسكات بالمره لكن شويه كده الا اذا قالي الميكانييكي انهم محتاجين يتغيروا والخرط مش حينفع معاهم في الحاله دي اكون مضطرا...وبالمناسبه هي ديسكاتها بتوع جولف برده ولا حاجه تانيه

عندنا المصريين ملوك الفهلوه تروح تسأل على اى حاجة يقولك عربية أيه .... قال يعنى عايز يساعدك ويديلك حاجة هو نفسه مش عارف ح تركب ولا لأ وعلشان كدة انا ما بقولش عربية اية علشان ما يفتيش ... أكدب عليه واقوله عربية جولف3 لكل حاجات الكهربة والفرامل وربنا يسامحنى وآخد قطعة الغيار على مسئوليتى انا ... وكذلك فلتر الزيت و سير التقسيمة وأى حاجة ف الماكينة ... فورد أسكورت 99 عادة كربراتير .... الكلام ده من عند فتح الباب بتاع الالمانى وسامى فخرى اكبر واحد ف الفورد والراجل ده وحش جدا لو قلتله صينى ممكن يطردك او يعمل اى حاجه تزعلك.
وبكده ما اديهمش فرص لأى حد يفتى ويزعلنى او يدينى حاجة مش عايزها او محتاجة تعديل زى ما عملوا معاك!!!!!.