عرض للطباعة
السلام عليكم
ازيكم ؟؟؟
الحقيقة انا كنت عاوز اخد رايكم فى حاجة واتمنى ماتخذلونيش
انا لسة مش بعرف اسوق طبعا وجديد خالص فى عالم السيارات
انا مشوار شغلى بعيد خالص من قبل المعصرة مثلا لحد المهندسين
بركب مواصلات بس تعباااان موووت
بفكر اجيب عربية صغيرة كدا يعنى فى حدود 38 او 40 الف
بس فى ناس بتقول ان المشوار هايبقى تقيل على اى عربية وكدا وهاتتبهدل
السؤال بقى
ياترى تنصحونى اشترى عربية ولا لا ؟؟؟
ولو تنصحونى اشترى تقترحوا عليا عربية ايه فى الرينج دا ؟؟؟
منتظر ردكم عليا وشكرا مقدما
السلام عليكم
انصحك بشراء سزوكي ماروتي عربيه صغيره 800 سي سي موفره جدا للبنزين يباني سهله الركن والمنوره في شوارع القاهره
القديم يغلبك في الصيانه والاعطال وانت لسه مافيش خبره يبقي الزيرو هيريحك علي الاقل الخمس سنين وبعدين يباني مش صيني وده رئيي بالامانه وعواتي لك بالتوفيق
اشكرك يا باشا والله ربنا يكرمك على ردك الجميل دا
بس انا فعلا كنت ناوى عالماروتى وبعدين سمعت انها بقت تقفيل صينى وبتتقفل فى مصر وماعادتش يابانى زى الاول
ياريت تقولى رايك انت وبقية الاخوة
الماروتي تقفيل هندي مش ياباني ولا صيني
أشكرك يا انونيموس وفى انتظار باقى الردووووووود
هو حضرتك لازم حتواجه صعوبات
لو مش من العربيه يبقي من الطريق لان حضرتك لسه مبتدئ مش حضحك عليك
بالنسبه للماروتي فهي سياره ممتازه و تستحمل
تقفيل هندي علي فكره مش ياباني
ياجماعة المشكلة ان المسافة كبيرة اوى ولو مشيت بعربية كل المسافة ديه مهما كان استحمالها حاسس انها مش هاتعمر معايا
ولا انتوا ايه رايكم؟؟؟؟
السلام عليكم
اهلا بيك في منتدي نايل موتورز
و باحييك علي اختيارك منتدي سوزوكي علشان تطرح فيه اتفسارك
انا يمكن استاذ حازم طبعا سبق و قالك علي المفيد
بس انا عايز ازيدك من الشعر بيت
انا ساكن في حلوان وشغلي في جامعة القاهرة
وكنت بافكر في الماروتي في الاول برضو
و سألت كتيييير.. والناس كانت بتشكر جدا في تحملها .. بس انا كنت قلقان
لحد ما في مرة مسافرين وواقفين في الرست واحد صاحب اخويا مسافر بيها الساحل الشمالي او مطروح وقف وسلم علينا .. ولما باسأله علي العربية قال انها اكتر من ممتازة وبتستحمل جدا كمان
انا يمكن بس اللي خلاني انقل "للألتو" هو حجم الماروتي الصغير .. وكمان ان الالتو فيها تكييف
بس هو ان شاء الله ماروتي او ألتو اختيار موفق
ممكن حضرتك تدور في المنتدي ده عن معلومات عن الاتنين و أي استفار تحت امرك
الماروتى فى وجهة نظرى أحسن بكتير
1-لايوجد فرق فى الحجم الداخلى للعربيتين
2-الماروتى كربرتير و الألتو أنجكشن(ده مش عيب فى الماروتى بل بالعكس ميزه سهلة الصيانه كله فاهم فيها ممكن العمل ببنزين 80 فى ظل ذياده أسعار البنزين و حتشتغل و مش حتقول لا)
3-والله تسارع الماروتى أعلى من الألتو بكثير عن تجربه و الله (الألتو بل العافيه والموت جيبة140 كم/ساعه
الماروتى 145 كم/الساعه أو أكثر بقليل و بتجبهم يسرعة و كنت بمشى بيها السكه كلها (الدولى الساحلى)
5-أيرو دينامكس للألتو سىء(على الرغم الشكل الإنسيابى لها مقارنة بالماروتى) تشعر أنك فى عاصفه الصحراء داخل السياره على السرعات المنخفضة
6-تشعر بالرعب لو راكب الألتو و ماشى 90كم/الساعه كأنك ماشى 180كم/الساعه (الأحساس ده ماحستهوش فى الماروتى
7-قطع غيار الغير أستهلاكيه (فوانيس -أكصدام-.........) غاليه فى الألتو مقارنه بالمارتى(و حضدرتك لسه حتيتعلم و عرضه لا قد الله ليل الحكات و الخبطات كفى الله الشر
8- الماروتى عربيه شباب و طلعت روحها و ما قليتش لأ
يتفق الأثنان فى
1-صوت الماتور عالى نسياً و خشن
2-فكره التكيف فاشله حرام800cc
3-صعوبه فى الغيارات و نقل الحركه
تتفوق الألتو فى
1-جوده التقفيل الداخلى و جمال التابلوه (مقارنه بالماروتى)
2-الشكل الخارجى الأجمل و جمال الدهانات
النصيحه وفر فلوسك و خد الماروتى عربيه كفائه بس حتخصر الشكل
بص أنا ممكن أكون مسقتش الماروتي.. بس أنا ليا واحد صاحبي وزنه حوالي 140 كيلو (أيوا 140)
و العربية ديه معاه من سنة 2000 و عمره ما بيركبها لوحده (بيكون معاه عادة 2-3 غيره)
و مع ذلك العربية معاه زي الفل...
مش هقولك مبيغيرش فيها حاجة .. لأ طبعا بيغير فيها كتير (من الصيانات و العمر الافتراضي و كدا)
بس مش كل يوم عند الميكانيكية يعني
العربية بجد حلوة و أثبتت نفسها.. توكل على الله و مش هتخسر
اشكرك بجد يا باشا وربنا يسهل,,,,,
أنا معايا ماروتى 2007 رااااااااااااااااااائعة وزى ماقالولك الأخوة هى مكوناتها يابانية تقفيل هندى
وكنت نفس ظروفك تقريباً وكنت أبيض فى السواقة وأبيض فى المعلومات عن السيارات
الحمد لله دلوقتى بعمل خمسات وأمريكانى وحركات كده !
أوعى تصدق أنا بضحك معاك بس بجد عربية جميلة جداً فى توفيرها للبنزين
والثبات على الطريق والمناورة بها بين السيارات وسهولة ركنها بالإضافة للتوكيل الجيد
( جيد فقط وليس ممتاز)
ولكن عيبها شكلها الذى قد لايعجب البعض ( بس أنا بموت فيها) والنقل فيها خشن شوية
نصيحة توكل على الله وهات ماروتى ومش هاتندم
ألف الف شكر يا خالد وبجد ونعم النصيحة
إنت أكيد بتهزر
أي عربيه من اللي الشباب قالولك عليها هاتستحمل المشوار ومافيش أي مشكله ولو 28 او 27 هاتستحمل برده لما هي العربية معموله عشان تمشي وبعدين طريق الكورنيش ده طريق سريع والطرق الطوالي بتريح العربيه اكتر
على فكره انا كنت ساكن في التبين بعد حلوان ب 12 كيلو وشغلي فى مساكن الظباط الرمايه وكنت بروح كل يوم وارجع 100 كيلو والعربية كانت معايا 27 وزي الفل
ربنا يوفقك في الإختيار
ياباشا والله مش بهزر ولا حاجة بس اصل فى ناس عمالين يملوا دماغى بكلام من دا
وانا محتاجها فعلا لانى متبهدل
عموما يا ريسنا الف شكر وربنا مايحرمناش من ارائكم الجامدة جدا ديه
افيدونى عايز عربيه عاليه عن الارض وسعرها من 100 الى 130 الف ج مصرى يا تر ى اشترى ايه
اقتباس:
المشاركة الأصلية كتبت بواسطة mohammedboker
es2al 3ala elterios :)
nice car for this price
اشكرك طبعا انك نورت صفحتى ... لكن اسمحلى اعتذرلك لان الصفحة ديه خاصة باستفسار انا بعمله ممكن تستفسر فى موضوع منفصل او حاجة تكون مرتبطة بالموضوع دا.اقتباس:
المشاركة الأصلية كتبت بواسطة mohammedboker
ياريت زملائنا الاعضاء ياخدوا بالهم من النقطة ديه لانه ضرورى اختيار المكان اللى يضعوا فيه مشاركاتهم واستفساراتهم .
بشكرك مرة تانية انك نورتنى