استفسار صيانة 60 الف جين 2
السلام عليكم
انا كنت عملت حادثة بالعربية جامدة والحمدالله على كل شىء وخلاص ظبطت كسمكرة والمفروض انى اعملها صيانة 60 الف وعندى كام سؤال لاعضاء نايل موتورز الكرام
1- انا عايز مكان كويس وبيشتغل فى الجين 2 اعمل عنده الصيانة ويفضل يبقى فى مدينة نصر او مصر الجديدة بعيدا عن المراكز المعتمدة لانى خلصت الضمان خلاص وبعد الحادثة مش مستعد ادفع مصنعيات ضخمة لمراكز الخدمة على الفاضى فانا عايز حد شغل نضيف والناس تكون اتعاملت معاه قبل كده بعيدا بقى عن مركز عصام وصفا
2- انا المفروض هغير الاتى فى الصيانة وهجيب الحاجة دى من شارع دمشق من المدينة او مكة
سير كاتينة
بلى كاتينة
سيور مجموعة
فلتر بنزين ( هل فى نوع معين يفضل اجيبه ومنين ؟)
فلتر زيت
فلتر هواء ( هل فى نوع معين يفضل اجيبه ومنين ؟)
بوجيهات ( هل فى نوع معين يفضل اجيبه ومنين ؟)
اللى عايز اعرفه هل الحاجات اللى زى سير الكاتينة وبلى الكاتينة وسيور المجموعة اللى بتتباع فى المدينة ومكة فى شارع دمشق زى الاصلية بالظبط اللى بتتباع فى التوكيل زى مابيقولوا ولا لاء لان ناس كتيرة بتقول دول فى التوكيل افضل بس انا نويت اجيبهم من المدينة او مكة ان شاء الله لان فى التوكيل اغلى على الفاضى وانا تجاربى مع التوكيل مش كويسة قبل كده
3- هل فى حاجة تانى ممكن احتاج اغيرها فى صيانة 60 الف خصوصا لو ضميت معاها صيانة الـ 70 الف بالمرة ؟؟
4- من اثار الحادثة ان الباركينج سينسور باظ هل فى نوع معين الناس تنصحنى بيه اجيبه ؟ وموجود فين وبكام ؟
5- مصنعيات الصيانة ممكن تتكلف فى حدود كام لو برة مراكز الخدمة او عند الناس اللى هتنصحونى بيهم مع العلم انى ان شاء الله انا اللى هجيب كافة قطع الغيار المطلوبة
واسف على الاطالة ومنتظر كرم الاعضاء فى الاستجابة