| تسجيل عضوية جديدة | استرجاع كلمة المرور ؟
Follow us on Twitter Follow us on Facebook Watch us on YouTube
صفحة 1 من 12 1 2 3 4 5 6 11 ... الأخيرةالأخيرة
النتائج 1 إلى 10 من 118

  1. #1

    الصورة الرمزية مصطفى-حسن

    رقم العضوية : 4352

    تاريخ التسجيل : 17Jan2008

    المشاركات : 2,603

    النوع : ذكر

    الاقامة : العاشر من رمضان

    السيارة: حاليا لانوس 2002

    السيارة[2]: كانت فيات 132

    دراجة بخارية: لا يوجد

    الحالة : مصطفى-حسن غير متواجد حالياً

    افتراضي - Facebook Twitter whatsapp انشر الموضوع فى :

    hasad">




    الصيف دخل
    وبدأ كل واحد مننا يفكر هيصيف فين السنة دى
    وفى ناس كتير ظروفها او ظروف عملها مبتسمحش لها انها تاخد اسبوع كامل او اكتر مصيف
    كتير مننا البحر بالنسبة لة هو مصيف اليوم الواحد
    وبما انى دايس فى البحر الى حد ما
    قررت اعمل الموضوع دة للمنتدى والاعضاء
    (((((تقرير كامل عن العين السخنة))))


    وعشان مينفعش اروح البحر لوحدى
    كلمت اتنين من اصدقائى واتنين من زملاء العمل
    وقولت لهم ان انا منظم لهم رحلة سنوركل وغطس حر بتصوير تحت الماء (مجانا عشان خاطر الصداقة والزمالة طبعا)
    وفى نفس الوقت اشوف المية بقت دافية ولا لسة وبالمرة اعمل التقرير
    وطلعنا يوم 5/5/2013 (شم النسيم) الساعة 5 فجرا


    فى البداية معلومات عامة عن العين السخنة.....
    مدينة ساحلية تقع على خليج السويس بالقرب من مدينة السويس وهى مدينة صناعية سياحية

    اقرب المدن ليها هى السويس لانها تابعة لمحافظة السويس
    بس هيا مش مدينة بالمعنى المتعارف علية
    بشكل ابسط لو افترضنا انك هتروح تصيف فى مرسى مطروح كام يوم فانت بعد ما تخلص البحر اخر النهار ممكن تخرج فى المدينة لانها فيها حياة (اسواق - ملاهى - سينما - سيرك ...الخ الخ الخ)

    لكن العين السخنة مفيهاش الكلام وخصوصا المنطقة اللى فيها القرى السياحية عشان كدة هى مصيف لليوم الواحد

    كيفية الوصول ليها :

    لو انت من بورسعيد او اسماعيلية او السويس هتاخد طريق السويس الغردقة وهتلاقيها بعد 70كيلو تقريبا

    لكن لو انت من سكان القاهرة والاقاليم المحيطة بها فطريق الوصول ليها عن طريق - القطامية العين السخنة - ودة اولة من على الدائرى الشرقى بعد كارفور المعادى ب 2 كيلو وانت رايح على القاهرة الجديدة

    لكن لو انت جاى من الناحية التانية من الدائرى الغربى (اسكندرية زراعى - الخصوص - السلام - اسماعيلة زراعى ..الخ الخ الخ) فبعد ما تعدى من تحت نفق السلام بحوالى 25 كيلو تقريبا هتلاقى اليفط الارشادية اللى على الطريق بتدلك على مكان النزلة يمين وتاخد الصينية وتخش من تحت الدائرى

    وانا حطيت صورة من الجوجل لتسهيل الموضوع





    المسافة 120 كيلو والطريق باشا والسرعة القصوى علية 120 ك/س
    فى بنزينتين على الطريق رايح وزيهم جاى وفى كافتيرا فى نص الطريق رايح وزيها جاى
    دى الخدمات الموجودة على الطريق

    بعد ما تخلص الطريق وتعدى الكارتة هتلاقى الطريق واخد يمين اجبارى (اتجاة الغردقة) ولو عايز تروح الناحية التانية هتاخد اليوترن وترجع طريق السويس

    هنا بقة هقف وهصفر العداد بتاع العربية وهسمى النقطة دى نقطة الصفر


    وخلى بالك من كلمة نقطة الصفر عشان هستخدمها كتير
    يعنى مثلا هتلاقينى بوصف لك شاطى واقولك على بعد كذا كيلو من نقطة الصفر باتجاة الغردقة فتبقى فاهم قصدى

    قبل ما اقولك الشواطى ووصفها واسعارها لازم اقولك ان كل الشواطى اللى انا بنزل فيها لازم تكون شواطى صخرية بالاساس عشان الشعب المرجانية والسنوركل والغطس الحر والتصوير تحت الماء

    بمعنى ابسط انا شخصيا صنفت شواطى العين السخنة من عند نقطة الصفر

    يمين كانك رايح الغردقة شواطى ذات الطبيعة الصخرية بالاساس بعضها يصلح للمصيف العادى (بحر وعوم ولعب وكورة ركت ..الخ الخ) وبعضها لا يصلح الا ببعض الحذر

    ومن عند نقطة الصفر تاخد اليوترن وترجع اتجاة السويس كلها شواطى رملية ناعمة تصلح لل (بحر وعوم ولعب وكورة ركت ..الخ الخ) وفيها قرى سياحية مستويات مختلفة


    من عند نقطة الصفر هتاخد يمين كانك رايح الغردقة
    خلى بالك الطريق دة متعرج جدا والحكومة حطالك يفط بتقولك دة طريق حوادث

    الكلام دة من عند نقطة الصفر لحد ما توصل الزعفرانة ... يعنى متحاولش تجرى او تعدى حد او تاخد غرز عشان الطريق رايح جاى..... يمينك الجبل وشمالك البحر

    نبتدى :


    شاطى جنكو على بعد 11 كيلو من نقطة الصفر باتجاة الغردقة ودى صورتة



    الشاطى دة تابع لكافتريا امامة على الطريق العربيات بتعمل عندها رست فهتلاقى المنطقة حيوية شوية وبتوع كاوتش وبنزينة وكدة

    رسم الدخول 25ج للفرد واحيانا فى بعض الايام زى الجمعة والاحد بيزودوها 5 او 10ج عن السعر العادى

    رسم الدخول للكراسى والشمسية فقط ........والاكل انت وراحتك

    فى بعض الايام لو الشاطى ازدحم قليلا خد الشمسية والكراسى بتاعتك واهرب فى اليمين (لو بصيت للصورة هتفهم) لان عرض الشاطى الرسمى حوالى 50 متر فقط وكدة كدة شغالين بمبدا (الشاطى كومبليت ياباشا) لما الشاطى بياخد عدد المصيفين كامل

    الحمامات متواضعة او بسيطة

    الشاطى دة شاطى صخرى بالاساس يعنى عشان تعوم وتلعب وكدة لازم تكون لابس حاجة فى رجليك
    خصوصا ان انت بنتعدى على شريط من الزلط الصغير قبل ما توصل المية (لاحظ الصورة) لان المساحة الفاضية بين الشاطى وبداية الشعاب المرجانية فى قاع البحرعبارة عن حزام عرضة 15 متر تقريبا وبطول الشاطى كلة ودى المساحة اللى انت ممكن تلعب وتعوم فيها بأمان

    وبعد كدة بتبدأ الشعاب المرجانية من بعد ال15 متر دول وباتجاة البحر (وديان وممرات)

    وهو شاطى انا نزلت فية اكتر من مرة وصورت تحت المية صور رائعة ويعتبر ثانى شاطى مفضل بالنسبة لى من حيث جمال الشعب تحت المية

    وفية ميزة تانية بالنسبة لى : ان فية سرب دلافين بيعدى من امام الشاطى على بعد 200 متر تقريبا ما بين الساعة 3 الى 4.5 عصرا فلو الظروف ساعدت بدخل العب معاه
    ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــ
    فندق موفنبيك على بعد 12 كيلو من نقطة الصفر باتجاة الغردقة
    الفرد ب 230ج بدون وجبة ..... وبالوجبة 350ج للفرد
    وطبعا مش هيحتاج صور ولا شرح عشان دة موفنبيك

    ________________________________
    واحة مينا على بعد 13 كيلو من نقطة الصفر باتجاة الغردقة
    صورة الشاطى



    الفرد ب 105ج شامل وجبة غدا والكراسى والشمسية
    وفى ايام الجمعة والاحد الفرد ب 121 ج شامل وجبة غدا والكراسى والشمسية
    من باب الاحتياط متنزلش المية حافى لان انت بردة بتعدى على حزام من الزلط الصغير قبل ما تنزل المية (بص على الصورة)

    الحمامات والخدمة اكيد حاجة كويسة

    بس انا عمرى ما دخلتة عشان مفيهوش شعب مرجانية فيبقى مينفعنيش

    ـــــــــــــــــــــــــ ـــــــــــــــــــــــــ ــــــــــــــــــــ
    واحة الحجاز على بعد 15 كيلو من نقطة الصفر باتجاة الغردقة



    ودى بقة مش بالفرد
    دى الشالية ب 350ج فى اليوم حد اقصى 5 او 6 افراد فى الشالية وملهموش دعوة بالاكل والشرب
    والشالية زى ما هو واضح فى الصورة منة للبحر علطول
    وبردو لازم تكون لابس حاجة فى رجليك


    ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــ

    شاطى سفارى ايجبت على بعد 20 كيلو من نقطة الصفر باتجاة الغردقة






    سعر الفرد 15 ج وفى بعض الايام 20 او 25 ج

    شاطى بسيط كدة والحمامات متواضعة او بسيطة وفى رأيى الشخصى هو يبنفع للصيد بالسنارة 10/10

    لكن لو قررت تنزل فية عوم ولعب فاعمل حسابك انك هتعدى على حزام من الزلط الكبير عرضة 3 متر وبعدها توصل للمية ومفيهوش شعب مرجانية
    يعنى بعد ما تعدى حزام الزلط البحر من تحت رملة ناعمة

    وبردو لازم تكون لابس حاجة فى رجليك


    ـــــــــــــــــــــــــ ـــــــــــــــــــــــــ ـــــــــــــ
    بورتو السخنة على بعد 28 كيلو من نقطة الصفر باتجاة الغردقة
    هو طبعا غنى عن التعريف ومش محتاج صور ولا حاجة
    وممكن تدخل على النت وتعرف كل حاجة من المصدر نفسة

    ـــــــــــــــــــــــــ ـــــــــــــــــــــــــ ــــــــــــــــ
    شاطى جراند هايتس على بعد 33 كيلو من نقطة الصفر باتجاة الغردقة



    ودة شاطى بتاع قرية تحت الانشاء لسة
    ودة اللى انا بنزل فية غالبا
    واللى بقيت الصور فى الموضوع (تحت المياة) متاخدة فية
    وهو ظروفة صعبة شوية هههههههههههههه
    يعنى الغفير اللى بيحرس الموقع اول ما تروحلة يقولك الشاطى مقفول
    وبعد ما تلح علية يقولك مفيش مية حلوة (للاستحمام اخر اليوم) ومفيش كراسى لكن الحمام شغال (نظام تطفيش)

    لو صممت على الدخول بيوافق على مضض باعتبارك كائن حى جة عشان يقومة من قدام كوباية الشاى وحجر المعسل اللى بيشربة فلو فضل يجادلك حجر الشيشة هيخلص وكوباية الشاى هتبرد ...!!!!!!

    بيفتح لك حمام شالية من الشاليهات اللى لسة متسلمتش لاصحابها

    وعلى الرغم ان ممكن ناس تستغرب انى انزل فى شاطى (بيطفشوا الزباين)
    الا ان الشاطى دة لية كذا ميزة من وجهة نظرى
    اولا الشاطى غير قابل للازدحام يعنى لو بصيت على الصورة هتلاقى بين كل شمسية حديد والتانية حوالى 10 متر فدة معناة انك هيبقى ليك خصوصية

    دة غير ان الغفير لما العدد بيكمل (على الرغم من سياسة التطفيش ) مبيرضاش يدخل حد تانى ويقولة الشاطى كومبليت يعنى مفيش حد هيزاحمك ولو معاك اسرتك ممكن تنام تحت الشمسية قرير العين وانت مطمن عليهم ان محدش هيضايقهم

    اجمل ما فى الموضوع واللى بيخلينى استحمل سادية وحب انتقام الغفير من الكائنات الحية (المصيفين) ان المية بتاعة الشاطى بتخفى تحت منها واحدة من اجمل الحيود المرجانية الرائعة المليئة بالممرات والوديان والكهوف الصغيرة فى القاع وعلى اعماق بسيطة ودة اللى هتشوفوة لما تكملوا التقرير للاخر

    تالت حاجة انك بتدخل بعربيتك لحد جنب الشمسية يعنى بتركن عربيتك جنب الشمسية
    ودى صورتين لية عشان تفهم انا قصدى اية







    الحمام بتستخدمة عادى طول اليوم لكن اخر اليوم لما تيجى تستحمى من المية المالحة احيانا الغفير بيرضى يخليك تستحمى واحيانا بيقفش عليك ويقولك وهو عامل حواجبة 88 (انا قولتك مفيش مية)

    احيانا بحس ان الغفير دة عندة ميول سادية ويهوى التلذذ بتعذيب الاخرين ههههههههههههه

    وطبعا عشان الشاطى بتاع قرية تحت الانشاء فطبيعى انك تلاقى حاجات غريبة على الشاطى (اخشاب تستخدم فى البناء - مسامير خشابى - احبال - زجاجات فارغة....الخ)

    انا عارف ان فية واحد ممكن يقولى واية اللى غاصبك على كل دة ؟؟؟؟؟؟؟
    هقولة تابع الموضوع للاخر وانت تعرف



    وصلنا الشاطى الساعة 8 صباحا وكنا 5 افراد
    وعلى الرغم انى قولت لهم انى عازمهم على رحلة سنوركل وغطس حر وتصوير تحت الماء
    الا انهم مكانش عندهم تصور كامل هيقضوا اليوم ازاى

    وعشان تبقى متابع باقى الموضوع والصور وفاهم اية اللى بيحصل ومين دول اسمح لى اعرفك على مجموعتنا الصغيرة وظروف كل فرد بالنسبة للسباحة

    العبد لله صاحب الموضوع(مصطفى حسن) لابس اسود فى اسود
    عبود صديقى: لابس تى شرت اصفر وبيعرف يعوم كويس
    عماد صديقى : فى بعض الصور لابس تى شرت اسود وفى البعض الاخر عارى الصدر وبيعوم كويس
    كمال : زميل عمل لابس بدلة غطس صيفى وبيعوم نص نص وقالى ان مشكلتة انة مبيعرفش يقف فى المية
    كريم : زميل عمل لابس تى شرت احمر ومبيعرفش يعوم خالص

    فى البداية بعد ما ركنا العربية جنب الشمسية وفطرنا وشربنا الشاى وكلة تمام
    طلعت العدة بتاعتى وفردتها قدامهم وبدأ كل واحد يختار الزعانف والنظارة والقصبة المناسبة لة







    ولان المجموعة اللى معايا شباب كلها فانا مطلعتش العدة الخاصة بالنساء والاطفال ولا التجهيزة بتاعة كبار السن

    وبدأت الاول اشرح لهم يعنى اية سنوركل ويعنى اية غطس حر وازاى يتعامل مع النظارة والتشبير والضغط وطريقة طرد قطرات الماء المالح اللى بيتكثف فى القصبة والطريقة الصحيحة للتعامل مع الزعانف واى انواع الشعب المرجانية الى هتقابلة يقدر يتعامل معاها (الامساك باليد والوقوف عليها ) واى الانواع لا يمكن التعامل معها .....الخ الخ الخ الخ

    وفى الغالب موضوع تعليم المجموعة اللى معايا بياخد حوالى ساعة او ساعة ونصف














    وبالنسبة لما يكون حد فى المجموعة مبيعرفش يعوم او بيعوم على قدة
    لازم البسة لايف جاكت حفاظا على سلامتة
    وعشان يقضى يوم جميل بدون اى خوف
    لان اللايف جاكت بيرفعة فوق المية طول اليوم بدون اى مجهود
    وفى نفس الوقت لا بيتخرم ولا بيفسى زى اطارات السيارات الداخلية اللى بعض الناس على الشواطى بيستخدموها رغم انها خطر جدا على حياتهم

    لكن اللى بيعرف يعوم طبعا ما بيلبسش لايف جاكت

    وهنا انا بتأكد من كفاءة الايف جاكت واحكام قفلة










    يتبــــــــــــــــــــــ ــــــــــع




    ثم جولة صغيرة فى الماء لاختبار كفاءة كل حاجة





    وبعدين تعليم السنوركل لعماد وعبود اللى بيعرفوا يعوموا كويس مخدش وقت
    ومن ثم توجهنا جميعا الى الداخل



    دى صورة كريم اللى مبيعرفش يعوم خالص واحنا على بعد 200 متر من الشاطى
    والايف جاكت رافعة بمنتهى السهولة والحياة جميلة معاة
    رافع ايدية من المية وبيظبط النضارة








    بعد الفترة التدريبية الصغيرة لكمال اللى بيعوم على قدة
    وبعد ما تفاجأ بفاعلية وقوة الزعانف بعد ما علمتة ازاى يتعامل معاها
    قالى انة هيقلع الايف جاكت وهيكمل بدونة
    وقفت معاة لحد ما اتاكدت انة بقى تمام فى موضوع الوقوف فى المية
    وبعدين كملنا
    ودى صورتة وهو بيلف حولين وادى فى قاع البحر عشان يشوف اقصر حتة يعدى منها للناحية التانية







    لحظات استعداد لكمال
    قبل ان يقرر عبود الوادى الى الجهة الاخرى







    وكنت فى انتظارة على الجهة الاخرى من الوادى
    فوق الشعب المرجانية











    كمال على حافة الحاجز المرجانى ونظرة الى البحر المفتوح




    كمال وعبود قادمون من البحر المفتوح باتجاة الشعب المرجانية



    نيجى بقة لكريم اللى مبيعرفش يعوم خالص
    طبعا هو كمل معانا بالايف جاكت عادى جدا بدون مشاكل
    ودى بعض الصور لية على اعماق مختلفة
    وهو مبسوط جدا من الايف جاكت









    صورة لكريم وكمال وعبود من قاع البحر




    كريم وعبود فوق احد الصخور المرجانية الضخمة





    يتبــــــــــــــــــــــ ـــع




    نيجى بقة لعبود وعماد اصدقائى اللى بيعرفوا يعوموا كويس

    الاول سبت كريم وكمال فوق الشعاب المرجانية يستمتعوا بجمال ورعة الشعب المرجانية وهما بيعملوا سنوركل وبيتفرجوا على اسماك البحر الاحمر الملونة الجميلة جدا لدرجة انهم نسيوا نفسهم وقضوا ساعتين على وش المية فى المشاهدة والتمتع بعظيم خلق الله فى الحياة البحرية


    ورحت انا وعماد وعبود على وادى مرجانى صغير
    وبدأت اعلمهم الغطس الحر
    الاول عملت تجربة قدامهم لطريقة النزول الصحيحة
    والانزلاق بهدوء تحت الماء وقطع مسافات









    ثم بدأ كل واحد منهم يحاول الغطس الحر
    وانا متابعهم واعرفهم الاخطاء الى عملوها
    وبعدين يرجعوا يغطسوا تانى
    واتابع معاهم الاخطاء والسلبيات

    وبعد ساعة كاملة من المحاولات كانوا تقريبا عرفوا الاساسيات كلها
    فقلت لهم انا هستناكم فى القاع

    ولما تنزلو ليا تحت امشوا فى اتجاة اشارة ايدى
    ودة عشان اضمن انهم بينزلوا بهدوء ويقظة وبيوجهوا نفسهم ببساطة داخل الماء عشان اضمن انهم مش بيغطسوا عميانى وخلاص
    وكانت البداية مع عبود

    بداية الغطسة وانا مستنية فى القاع





    بحفزة على النزول لعمق اكتر



    وعلى الرغم من اشارتى لية بالاستمرار فى الغطسة الا ان الباشا طلع جرى لفوق ....سجاير ودخان بقة ههههههههههههههههه




    وبعدين بدأت مع عماد نفس الحركة
    بس كنت عارف ان اداءة هيبقى اعلى
    لانة غير مدخن ورياضى
    فكان اسرع فى الاستجابة لأشارات ايدى وتوجية جسمة







    طبعا عماد استجابتة واداءة اعلى عشان رياضى
    مش معنى كدة ان الشخص المدخن مش هيعرف يغطس ويقطع مسافات

    الاتنين بيغطسوا حر ويقطعوا مسافات فى قاع البحر بس المدخن بيبقى ابطأ قليلا فى التعلم فقط

    والمدخن فى سرعة تعلم الغطس الحر زية زى المرأة
    استجابة ابطأ لكن اداء ثابت

    الشريحة الوحيدة اللى بيبقى ادائها فى الاعماق غير عادى هى المرأة الغير متزوجة اللى بتعرف تعوم كويس.... لما بتتعلم الغطس الحر بتبقى ماشاء الله (طوربيد بشرى فى الماء)
    وقدرتهم على كتم النفس لفترات طويلة بتبقى عجيبة
    والفتيان الغير مدخنين فى سن المراهقة ادائهم عالى برضو

    يعنى بعد حوالى 45 دقيقة من المحاولات لعبود (المدخن) مش بس كان بيغطس كويس
    دا كمان كان بيرقص تحت المية فى القاع


    ودى مجموعة من اللقطات التذكارية لعبود










    استراحة قصيرة على الشعاب المرجانية اثناء مرور سرب اسماك




    ثم التوجة مرة اخرى الى الوديان فى القاع للغطس الحر











    يتبـــــــــــــــــــــع



    وفى النهاية بدأ عبود فى تطبيق تقنية الغطس الزاحف

    يمسك الشعب المرجانية بالجوانتى اللى فى ايدة ويتقدم الى القاع بدون اى مجهود يذكر

    وهيا طريقة خطر عشان الشعب المرجانية ممكن تعورة يعنى عايزة تركيز جامد وبيئة بحرية مناسبة واحساس عالى بمكان اطرافك (الساقين والوسط)
    لكن ميزتها انة ممكن يوصل للعمق اللى عايزة بدون اى مجهود على الاطلاق

    وممكن يستنانى تحت فى القاع يشرب كوباية شاى على اما انزل لة هههههههههههههههه





    بعض الصور التذكارية لعماد














    امام مدخل احد الكهوف




    وفى النهاية ارجوا ان اكون قدمت تقرير متواضع يفيد الناس اللى عايز تصيف يوم واحد فى العين السخنة

    بس فية تنبية هام جدا:
    لو حضرتك قررت تروح العين السخنة والشاطى دة تحديدا او الشواطى اللى بيكون فيها صخور وشعب مرجانية
    مش هتلاقى غير البحر والشماسى والكراسى والرمل والناس هما اللى قدامك. وبس خلاص........!!!!!!!!!!!!!!

    عشان تشوف كل الدنيا الجميلة دى
    لازم تكون معاك عدة ومتدرب ومتعلم او فى وسط جروب مع واحد فاهم كويس هو بيعمل اية

    طيب انا بقول الكلام دة لية :
    عشان فية فى ناس ممكن الموضوع يعجبها جدا وتلاقية راح يدور على اماكن بيع الزعانف والنظارة والقصبة والايف جاكت وجوانتى اعمال بحرية وهما متوفرين طبعا وخد اسرتة معاة او اصحابة وطيران على العين السخنة والشعب المرجانية والبحر المفتوح

    وهنا المشكلة........!!!!!!!!!!!

    اذا مكنتش متدرب ومتعلم ومتجهز وعلى دراية كاملة بالبيئة البحرية تحت سطح الماء والطرق الصحيحة للتعامل مع العدة اللى انت لابسها كل اللى هتعملة انك هتأذى نفسك واللى معاك اكبر اذى ممكن تتخيلة

    وعشان المعلومة توصل انا هدى مثال بسيط جدا جدا وتافة لحاجة عبيطة وهيا ازاى تقف فى المية على الصخور او الشعب المرجانية وانت لابس الزعنفة.......!!!!

    ممكن واحد يتخيها بسيطة بس للاسف لو انت حبيت تقف وانت مش متدرب هتلاقى نفسك اتقلبت على وشك وكرد فعل غريزى لاى واحد بيقع على وشة بيمد ايدية قدامة عشان يسند فى الحالة دى يا معلم انت سلمت ايديك وجسمك تسليم اهالى (زى ما بنقول فى المثل الشعبى) للشعب المرجانية والصخور وانت وحظك بقة

    دة مثال لحاجة تافهة مش عايز اقولك بقة عن التشبير ومعادلة الضغط وطريقة حبس النفس والمحافظة على الطفوية للغطاس الحر وطرد المية المالحة من الشيك بلف بتاع القصبة وازاى تتنفس من فمك طول النهار بدون ضيق فى الصدر لان الانف بيكون مكتوم فى النضارة ومين الناس اللى مينفعش تطلع رحلة زى كدا....الخ الخ الخ الخ الخ الخ


    الموضوع يا جماعة عامل زى سواقة العربية
    بالنسبة لك سهلة جدا وعادية عشان بتعرف تسوق .... لكن لو فى واحد راح اشترى عربية وهو عمرة فى حياتة ما ساق عربية ولا قعد ورا دركسيون بس السواقة والعربية عجبتة جدا
    وسمع كام معلومة من هنا على كام معلومة من النت وهوب قعد فى العربية ودورها وانطلق
    يا ترى اية اللى هيحصل ؟؟؟؟؟؟؟؟؟
    طبعا كلكم عارفين اية اللى هيحصل.....
    ولو رجع بيتة سليم يبقى ستر من ربنا
    .


    مش معنى كدة انى بهبط الناس ولا بعقدهم ولا بعمل لنفسى دعاية
    ابدا والله

    انا الحمد لله شغال بقالى 3 سنين ودى السنة الرابعة فى تنظيم رحلات السنوركل والغطس الحر والتصوير تحت الماء مع اسر وعائلات ودة بيقول لدة... ودة بيجيب دة ... وهكذا دعاية عائلية شجرية زى ما بيقولو بتوع التسويق

    واول ما الامتحانات بتخلص مبلاحقش شغل الحمد لله

    بس انا بنبة التنبية دة عشان محدش يروح يدبس نفسة فى شراء حاجات هتكون مصدر اذى جامد لية لانة رايح يتعامل مع بيئة بحرية نشطة وبحر مفتوح

    (((والبحر مبيجاملش حد)))

    وبكدة يبقى انا كملت معلومات الموضوع
    عشان تبقى المعلومة كاملة لوجة الله.

    وفى النهاية كل واحد حر ومسؤل عن قرارة

    ــــــــــ ــــــــــــــ ـــــــــــــــــــ

    نيجى بقة للاعضاء اللى بتسأل عن التكلفة والرحلة وكدة

    فى البداية معلومات عامة وسريعة عن رحلات السنوركل والغطس الحر والتصوير تحت المية الى انا بنظمها :

    - رحلات السنوركل والغطس الحر هى للجنسين (رجال ونساء)

    - تعليم السنوركل والغطس الحر لمن يجيد السباحة من الجنسين (رجال ونساء) يبدا من سن المراهقة وحتى اربعينيات العمر

    - تعليم السنوركل فقط لمن لا يجيد السباحة من الجنسين (رجال ونساء) تبدأ من سن العاشرة وحتى خمسينيات العمر

    - هذة الرحلات لا تصلح لمرضى الجهاز التنفسى ومرضى القلب والمرأة الحامل

    - تكلفة الرحلة (تعليم سنوركل وغطس حر وتصوير تحت الماء) للفرد الواحد 150جنية وتشمل الاتى فقط:
    ـــــــــــــــــــــــــ ـــــــــــــــــــــــــ
    1- ايجار واستهلاك عدة
    2- تعليم سنوركل وغطس حر لمن يجيد السباحة
    3- تعليم سنوركل فقط لمن لا يجيد السباحة
    4- المتابعة طوال اليوم فى الماء
    5- تصوير كل المجموعة تحت الماء من 100 الى 150 صورة
    ـــــــــــــــــــــــــ ـــــــــــــــــــــــــ ــــــ
    - الاكل والشرب ووسيلة المواصلات ورسم دخول الشاطى خارج التكلفة
    - حد ادنى للرحلة الواحدة 4 افراد او 550جنية سعر ثابت لو العدد اقل من 4 افراد
    - حد اقصى لعدد الافراد فى الرحلة الواحدة 10 افراد (من اجل حسن الاهتمام والمتابعة الجيدة فى الماء باعضاء المجموعة) ولا اقبل او اتعامل مع الاعداد الضخمة
    - لا يوجد يوم محدد للرحلة (الرحلات فى كل ايام الاسبوع)

    طريقة التعاقد :
    حضرتك بتشرفنى فى المحل بتاعى فى اى وقت طوال ايام الاسبوع من 11صباحا الى 10 مساء عدا الجمعة بتدفع ثلث المبلغ جدية حجز والباقى فى يوم الرحلة

    اوبتنسيق كل شيى برقم التليفون لاصحاب المحافظات البعيدة

    عنوان المحل :
    على بعد 25 دقيقة من الحرفيين
    مدينة العاشر من رمضان / مركز الحى الاول / سوق المدينة / بجوار بنك الاسكان والتعمير وخلف مول صيدناوى وامام المخبز الالى / محل العالمية سنتر لخدمات المحمول والهدايا (مصطفى حسن)
    رقم التليفون 01208782007
    ملحوظة بالنسبة لرقم التليفون ... لو حضرتك اتصلت عليا قبل الساعة 6 المغرب وانا مرديتش فدة معناة انى فى البحر والتليفون بعيد عنى .. لكن من بعد الساعة 6 مساء وحتى 12 ليلا طول ايام الاسبوع بستقبل كل المكالمات عادى جدا

    وبالتوفيق للجميع

    (هذا الموضوع تم تعديلة
    للفائدة العامة)

    zarif سابقا
    [rmade]http://i1342.photobucket.com/albums/o774/sasamh_1976/%202%20Copy_zpswwu0sio0.jpg~original[/rmade]


    zarif سابقا


  2. #2

    الصورة الرمزية Dr_Mido

    رقم العضوية : 4503

    تاريخ التسجيل : 19Jan2008

    المشاركات : 2,257

    النوع : ذكر

    الاقامة : Cairo

    السيارة: N/A

    السيارة[2]: N/A

    دراجة بخارية: No

    الحالة : Dr_Mido غير متواجد حالياً

    افتراضي -

    تقرير مميز جدا فتحت نفسي علي السفر والله

    مصر دلوقتى بقيت عاملة زى واحد أخرس بيقول لواحد أطرش إن فى واحد أعمى شاف واحد مشلول بيجري ورا واحد أقرع بيشد فى شعره


  3. #3

    الصورة الرمزية mohamed_selim

    رقم العضوية : 57630

    تاريخ التسجيل : 01Jan2010

    المشاركات : 4,129

    النوع : ذكر

    الاقامة : Cairo / Port Said

    السيارة: Kia Carens 1.6 2010

    السيارة[2]: Nissan Sunny 2014

    دراجة بخارية: -

    الحالة : mohamed_selim غير متواجد حالياً

    افتراضي -

    جميل جدا
    عندى اضافتين
    ١- العين السخنه (العين نفسها مش المكان) موجوده على بعد ٥٠٠ متر من نقطة الصفر داخل سور على الشمال بعد ما تعدى الكمين ب ٢٠٠ متر تقريبا و الارض دى كان فيها فندق العين السخنه بتاع وزارة السياحه و اتهد و دلوقتى ارض فضاء المفروض يتعمل فيها مكان سياحى

    ٢- بلاش مسك الشعب او الوقوف عليها عشان محدش يتعور او تخش اشواك فى ايده او يمسك شعبه و تطلع stone fish و يتبهدل و ممكن لا قدر الله يموت .... و السبب التانى الاهم ان الشعب نفسها بتموت و دى بتاخد سنين عشان تكبر و تدى الاشكال الجميله و الالوان اللى بنشوفها ... طول مانتا تحت الميه خليك ضيف خفيف لا تمسك ولا تلمس اى حاجه و متسيبش وراك اى حاجه .... ده اللى بنعلمه للناس فى كورسات الغطس

    تقرير جميل و صور ممتازه ... شكرا للمجهود

    [justify]الشيخ الشعراوى رحمه الله : حينما ترى المجرم يُحاَكم لا تنظر إليه وتشفق عليه، بل انظر الى جريمته[/justify]


  4. #4

    الصورة الرمزية drmsadek1979

    رقم العضوية : 18752

    تاريخ التسجيل : 12Sep2008

    المشاركات : 792

    النوع : ذكر

    الاقامة : ksa&& mansoura

    السيارة: elantra 2009

    السيارة[2]: lancer 2008

    دراجة بخارية: لا

    الحالة : drmsadek1979 غير متواجد حالياً

    افتراضي -

    تقرير ممتاز


  5. #5

    الصورة الرمزية EL Tanna

    رقم العضوية : 73282

    تاريخ التسجيل : 18Jun2010

    المشاركات : 259

    النوع : ذكر

    الاقامة : cairo

    السيارة: .........

    السيارة[2]: daweoo-lanos 2

    دراجة بخارية: لا يوووجد

    الحالة : EL Tanna غير متواجد حالياً

    افتراضي -

    والله الواحد بعد ما شاف الصور بقى عايز يسافر :d
    طيب نجيب العده منين لو حد عايز يسافر ؟؟

    blackfox14 سابقا


  6. #6

    SGH

    الصورة الرمزية SGH

    رقم العضوية : 59825

    تاريخ التسجيل : 23Jan2010

    المشاركات : 193

    النوع : ذكر

    الاقامة : cairo

    السيارة: -----------------

    السيارة[2]: corolla 2013

    دراجة بخارية: --------------

    الحالة : SGH غير متواجد حالياً

    افتراضي -

    موضوع جميل ما شاء الله


  7. #7

    الصورة الرمزية hugan

    رقم العضوية : 25254

    تاريخ التسجيل : 15Nov2008

    المشاركات : 11,512

    النوع : ذكر

    الاقامة : القا هره

    السيارة: شاهين 1400 /97

    السيارة[2]: 516.2008 تيجو2013

    دراجة بخارية: دايون 150

    الحالة : hugan غير متواجد حالياً

    افتراضي -

    ممتاز ممتاز
    تقرير رائع ومفيد
    كنت عايز اعرف ماكن اشتري منه
    الزعانف
    والنظارات
    والجاكت لايف
    والاسعار
    ولك جزيل الشكر

    ياتقول كلام في محله يا تقول حلو ياحلو
    http:///photos/a.879931698703941.107...370587/?type=1


  8. #8

    الصورة الرمزية abou-yahia

    رقم العضوية : 13633

    تاريخ التسجيل : 26Jun2008

    المشاركات : 5,636

    النوع : ذكر

    الاقامة : Cairo

    السيارة: Optra 2007 AT

    السيارة[2]: Pegeout 406 2004

    دراجة بخارية: لا يوجد

    الحالة : abou-yahia غير متواجد حالياً

    افتراضي -

    ممتع جدا



    afrtow سابقاً
    [B]
    [gdwl] الإمام الشافعي
    إني رأيت وقوف الماء يفسده * * * إن ساح طاب وإن لم يجرِ لم يطبِ
    والأُسد لولا فراق الأرض ما افترست * * *والسهم لولا فراق القوس لم يصبِ
    والشمس لو وقفت في الفلك دائمة * * * لملّها الناس من عربٍ ومن عجمِ[[/gdwl]/B]


  9. #9

    الصورة الرمزية sting_2010

    رقم العضوية : 114159

    تاريخ التسجيل : 26Sep2011

    المشاركات : 100

    النوع : ذكر

    الاقامة : Mansoura

    السيارة: no

    السيارة[2]: no

    دراجة بخارية: لا يوجد

    الحالة : sting_2010 غير متواجد حالياً

    افتراضي -

    بجد بجد بجد ..تسلم الايادى ..موضوع رائع وصور اكثر من رائعة .!


  10. #10

    الصورة الرمزية WalidAdel

    رقم العضوية : 3848

    تاريخ التسجيل : 25Dec2007

    المشاركات : 3,011

    النوع : ذكر

    الاقامة : Heliopolis

    السيارة: ربنا يبارك في الاولي

    السيارة[2]: Mazda 3 - 2008

    دراجة بخارية: لا امتلك

    الحالة : WalidAdel غير متواجد حالياً

    افتراضي -

    hasad">

    موضوع رائع ماشاء الله ... فتحت نفسي علي الموضوع ده و انا اصلا بفكر ابتدي اتدرب و شويه شويه اسافر رحلات غطس و كده لاني بقالي فتره ممتنع
    بس عايز اسأل حضرتك سؤال .. منين اجيب shorty wet suit لو تقدر تفيدني



 
صفحة 1 من 12 1 2 3 4 5 6 11 ... الأخيرةالأخيرة

المواضيع المتشابهه

  1. طريقة فك قطمة الدركسيون بالكامل بالتفاصيل والصور
    بواسطة مصطفى-حسن في المنتدى دايــو+شيفرولية لانوس
    مشاركات: 62
    آخر مشاركة: 15-11-2017, 03:24 PM
  2. العين السخنة
    بواسطة moaaazmh في المنتدى المنتــــــدى الاجتمــاعى
    مشاركات: 53
    آخر مشاركة: 27-09-2017, 10:56 AM
  3. العين السخنة
    بواسطة ezzatfox في المنتدى دليل الطرق الداخلية وطرق السفر
    مشاركات: 2
    آخر مشاركة: 27-09-2017, 10:52 AM
  4. طريقة فك تابلوة لانوس بالكامل ... بالتفاصيل والصور
    بواسطة مصطفى-حسن في المنتدى دايــو+شيفرولية لانوس
    مشاركات: 47
    آخر مشاركة: 11-03-2014, 09:30 PM

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

Content Relevant URLs by vBSEO 3.6.0 PL2