الموضوع: نظفت سربنتينة التكيف (ثلاجة) بنفسي .. الف شكر يا رجالة + الصور

السلام عليكم
لولا الموضوع دا
http://www.nilemotors.net/Nile/208971-a.html
ودا
http://www.nilemotors.net/Nile/244213-a.html
انا مكنتش فكرت انضف تلاجة التكيف من غير فك التابلوه .. انا باقيلي فتره كبيره عايز انضفها بس امبارح شوفت المواضيع وقريت كويس وانهاردا طبقت :D والحمد لله اتوفقك بس فضلت وقت كتير حوالي 4 ساعات ونص
ساعة فك .. وساعة ونص تنضيف وتجفيف .. وساعتين تركيب :D (بس بمزاج .. كنت شغال براحتي خالص)
الفك حماده .. والتكريب حماده تاني خالص

وانا مكنتش متخيل اني هقدر افكها .. فمجبتش اي منظفات .. نضفت بفيري متخفف بماء .. ببخاخة المكوه :D
وبابا اداني البتاعة اللي بيرش بيها الجنينة من الامراض .. ودي بصراحة اللي انجزتني


الصور
اول حاجة بعد فك التبلوه والفبر اللي في الجنب فكيت المروحه دي (البلور) ودي مربوطة ب3 مسامير


وبعد كدا فكيت المسامير الـ13 مسمار تقريبا .. منهم حواي 5 مسامير تعبت فيهم وخدو وقت جامد

وجت اللحظة .. بعد فك المسامير بالكامل .. وبدأت الطلع الفبره بشويش عشان مكسرش حاجة


وفعلاً نزلت الفبره ( لقيت فيها مجاري ههههههههه)


ودي صور السربنتينة قبل التنظيف (الناحية دي هي اللي كانت مش نظيفة بس الناحية التانية نضيفة)



السربنتينة بجد كانت وسخة جدا .. والميا دي من الميا اللي وقعت من السربنتينة بس بعد التظيف ..



ودي صوره بعد تنظيف الفبره والبلور


ودي صوره السربنتينة بعد التنظيف ..



التنظيف دا لو كنت عملتو بمنظف التكيفات اللي الاعضاء اشتغلو بية اعتفد ان السربنتينة كانت نضفت عن كدا كتيير
بس طبعاً حاليا احسن الف مره من زمان

ومشكلة المسامير المزنوقة بقيت اصورها واعرف مكانها فين بالظبط .. وهل الفبره بايتة صح على مسار المسمار انه يدخل مستقيم .. زي كدا


حقيقي انا تعبت قوي في القصة دي بس بصراحة مجهود يستحق

بعد ما قفلت وظبطت كل حاجة .. دخلت اخدت دش ونزلت كورس على بعد حوالي 30 كيلو من بيتي .. فكانت فرصة اني اجرب التكيف
_ اهم حاجة الريحة الوحشة راحت
- التكيف بقى افضل من الاول من حيث تدفق الهوا بقى افضل كتير والتسقيع بردو .. بقيت مشغلة على 2 وسقعان ... قبل كدا كان لازم 4 وبعد شوية كنت بنزلة على 3

بس نصيحة لازم تكون بارد بارد بارد وانت بتعمل الشغلانة دي عشان بجد متعبة وعايزه صبر ..

الف شكر للرجالة اللي ساعدونا بموضاعتهم المميزه :D
والسلام عليكم ورحمه الله وبركاتة :)