اسف .. اخوكم مش فاهم اى حاجة فى السيارات و محتاج مساعدتكم

**abd924** · 08-05-2013 02:30 AM

انا مبعرفش اسوق حتى
ولا بفهم اى حاجة فى السيارات
لكن ظروف العمل فرضت عليا انى اشترى سيارة
زميل لى فى العمل عنده سيارة فيرنا 2010 مانيوال ماشية 90000 ك تقريباً معظمهم سفر للمنيا
وكانت واخدة خبطة قوية فى الامام و غير لها الكبوت لأنه بعد الخبطة مبقاش يقفل كويس
العربية كاملة مانيوال
السعر العادل لها كام بما يرضى الله
انا مش عايز ابخسه حقه عشان حرام
وفى نفس الوقت عايز ادفع سعرها الحق
يا ريت لو حد يفيدنى
وهل الافضل اشتريها اصلاً ولا اشترى عربية رخيصة شوية اتعلم عليها ؟
شكراً مقدماً لمن يستطيع مساعدتى بالرأى و المشورة

**reda elgohary** · 08-05-2013 02:42 AM

بص يا فندم أنا مثلك نفس الظروف تقريبا ،،لو عاوز نصيحتى اشتري عربية ب 14 الف جنيه أقصى حاجة تتعلم عليها وتعرف الطرق ومشاكل القيادة والعربية هتتخبط منك كتير لا تقلق إما بسببك أو بسبب أخطاء الآخرين ،،لذا نصيحتى لك لا تشتري عربية غالية اطلاقا طالما جديد ف السواقة ،،وربنا يوفقك لكل خير .

**monamize4** · 08-05-2013 02:48 AM

فى ناس كتير ابتدت تتعلم سواقة ع عربيات جديدة عادى جدا لكن رأى الشخصى انك تبدأ بعربية من القديم عشان لو لاقدر الله اتخبطت او حصل لها حاجة متكلفكش كتير

لو اصريت ع عربية من الحديث يبقى بلاش عربية صاحبك لانها اخدت خبطة جامدة ف الكبوت و الله اعلم ايه المشاكل اللى نتجت عن الخبطة دى حتى لو العربية اتسمكرت تمام و بقى شكلها من برة كويس دا غير انها كدة تعتبر راشة دواخل و دا شئ يعيب العربية لو حبيت تبيعها بعد كدة

**abd924** · 08-05-2013 03:14 AM

المشاركة الأصلية كتبت بواسطة monamize4

فى ناس كتير ابتدت تتعلم سواقة ع عربيات جديدة عادى جدا لكن رأى الشخصى انك تبدأ بعربية من القديم عشان لو لاقدر الله اتخبطت او حصل لها حاجة متكلفكش كتير

لو اصريت ع عربية من الحديث يبقى بلاش عربية صاحبك لانها اخدت خبطة جامدة ف الكبوت و الله اعلم ايه المشاكل اللى نتجت عن الخبطة دى حتى لو العربية اتسمكرت تمام و بقى شكلها من برة كويس دا غير انها كدة تعتبر راشة دواخل و دا شئ يعيب العربية لو حبيت تبيعها بعد كدة

اشكر اهتمام حضرتك و الرد
موضوع سعر اعادة البيع ده فعلاً نقطة مهمة
وشكراً لحضرتك مرة تانية

**youssef_u** · 08-05-2013 04:12 AM

بص نصيحتي لحضرتك هات حاجة اوتوماتيك سعرها رخيص لان حضرتك جديد عالسواقة و الفتيس الاوتو سهل جدا

**د.محمدعبدالعال** · 08-05-2013 04:39 AM

والله فيه ناس كتير اتعلمت على عربيات جديدة مفيهاش مشاكل .. ممكن تشتري عربية في حدود ال 35 ألف زي لانوس القديمة أو حاجة زي الاكسيل تتعلم عليها وفي نفس الوقت تبقى ضامن انها متقفش منك وبعد كده يبقى تتكل على الله وتشتري زيرو .. بلاش عربية صاحبك لأنها مش مضمون ايه اللي حصل في موتورها بعد الخبطة ولا ريداتيرها اتأثر واتعمل كويس ولا لأ .. واتعلم على المانيوال احسن طبعا وبعدين لما تشتري زيرو ابقى هات اوتوماتيك .. وبالتوفيق ان شاء الله

**ابو لؤى** · 08-05-2013 02:10 PM

باشا نصيحتى اتعلم على عربيه فيرنا او اى عربيه سيبك من انك تجيب عربيه رخيصه وكلام من ده لانها اولا سواقتها اصعب من الجديد ثانيا هتقرفك من العربيات وتزهقك واعطالها هتكرهك فى الميكانيكه اركب فيرنا عادى واتعلم فيها وهو بالمره تبقى عربيه معمره مش فتره وتبيعها وبالتوفيق

**micho129** · 09-05-2013 12:10 AM

المشاركة الأصلية كتبت بواسطة ahmed air

باشا نصيحتى اتعلم على عربيه فيرنا او اى عربيه سيبك من انك تجيب عربيه رخيصه وكلام من ده لانها اولا سواقتها اصعب من الجديد ثانيا هتقرفك من العربيات وتزهقك واعطالها هتكرهك فى الميكانيكه اركب فيرنا عادى واتعلم فيها وهو بالمره تبقى عربيه معمره مش فتره وتبيعها وبالتوفيق

++++++++++++++++++++++++++1

**احمد نظمي** · 09-05-2013 12:23 AM

نصيحتي ليك متاخدش عربية صاحبك دي خالص وهات عربية حديثة عشان هتسهل عليك السواقة وانت لسه جديد وهتقعد معاك فترة عقبال مالاقدر الله يحصل فيها حاجة لانك هتكره نفسك من العربيات القديمة في التصليح والكلام دا
بالتوفيق