انا نفسي الاقي حل لاستهلاك البنزين اللي حير الخبراء ده

انا من اول ماجبت العربية وانا عندي مشكلة في استهلاك البنزين لحد دلوقتي مش عارف احلها

العربية بتشرب البنزين شرب بجد يعني الصفيحة جوة الزحمة بتعمل 120 كيلو من غير تكييف ويمكن اكتر شوية

كل ده عادي جداً وانا متعايش معاه

الجديد بقى على الطريق السريع استهلاك غريب بمعنى الكلمة

من يومين طلعت اسكندرية الصبح وانا مفول بنزين من شل الي في دمشق ومنها على كوبري اكتوبر والمحور وبداية الطريق لحد ماوصلت للماكس في اسكندرية يعني حوالي 300 كيلو ومتوسط السرعة من 120-150 كيلو بالتكييف

وانا راجع بقى من نفس الطريق فوولت بنزين تاني بعد مامشيت اكتر من 350 كيلو والمفاجأة ان العربية خدت 17 لتر بس .. يعني 17 لتر في 350 كيلو بالتكييف وعلى سرعات عالية نسبياً

طبعا ده استهلاك مثالي بالنسبة للبروتون وعربيات تانية كتير جداً مبتعملش كدة

اللي مجنني بقى ازاي العربية دي في الزحمة بتبقى حمادة وعلى السريع وسرعات عالية بتبقى حمادة تاني خالص؟

مع العلم كمان اني وانا رايح شديت مع نوبيرا ولانوس وطلعت طبعا منهم لحد ال 180 ونزلت في السرعة تاني للمتوسط .. يعني كنت جايب اخر الدواسة

انا احترت

ممكن يكون نوعيه بنزين وسعات والله اعلم بشك في كنترول العربيه بحس انه بيهيس هههههه الله اعلم برضه

بسيطة
عربيتك مزبوطه وانت بتمشى فى طرق زحمه جدا وجوه البلد اسلوب قيادتك هو الى بيعلى استهلاكك كدا

لا انا سواقتي عادية جداً وخفيفة .. ال rpm مبيزيدش عن 3500

نفس كلامك حصل معايا في الطريق نزل معدل الحرق ل 5.9 مش عارف ازاي مع التكيف وكنت مش مصدق عيني وجوا البلد مغلباني بيوصل ل 9 و 10

اقتباس:

---

المشاركة الأصلية كتبت بواسطة tetomst

نفس كلامك حصل معايا في الطريق نزل معدل الحرق ل 5.9 مش عارف ازاي مع التكيف وكنت مش مصدق عيني وجوا البلد مغلباني بيوصل ل 9 و 10

---

بلاش الاعتماد على قراية الكومبيوتر .. انا اتعلمت مخدش كلام من المؤشر بتاع التانك ولا بتاع الكومبيوتر .. الفيصل في الموضوع هو انك تمشي مسافة معينة وتفول تاني وتعرف العربية خدت قد ايه

حصل معايا حاج غريبة جدا وانا رايح الغردقة فردت عجلة ضربت وغيترتها بالعجلة الصغيرى الكلام ده حصل فى نص طريق القطاامية يعنى حوالى 50كم من القاهرة وفضلم ماشى بالاستبن لحد غارب 300 كم عبى سرعة ماتزدش عن 80 كم والعربية استلكت فى حدود 20-23 لتر فقط فى حين فى السير العادى مع الحرق يعنى 150 على الاقل تستهلك 50-55 لتر

اقتباس:

---

المشاركة الأصلية كتبت بواسطة eng f3lix

لا انا سواقتي عادية جداً وخفيفة .. ال rpm مبيزيدش عن 3500

---

خد بالك إن 3500 كدة معدل عالي مش بسيط ... أو نقدر نقول عليه وسط .. لو عايز معدل هادئ يفرق معاك في الاستهلاك ماتزودش الآر بي إم عن 2500 ... ويكون آخرك 3000 ... طبعا في المعتاد

مع العلم إن العربية معايا في المعتاد بتعمل تقريبا 200 - 220 كيلومتر / الصفيحة مزيج بين الدائري ووسط البلد

لكن لما مشيت على طريق الكريمات أسيوط سرعة 120 ثابتة عملت معايا 320 كيلومتر / الصفيحة تقريبا مش فاكر قوي

وطبعا ده كدة استهلاك رائع ومذهل كمان لأن الألتو بتاعتي أساسا بتعمل 320 - 350 / الصفيحة وهي 800 سي سي بس جوة البلد ... لو ماشي بالألتو على طريق سريع اللاستهلاك بيزيد بطريقة بشعة لغاية 230 - 250 / الصفيحة مع السرعات العالية يعني الآية بتتعكس بالضبط

نقطة كمان جرب تصفر عداد الكمبيوتر بتاع استهلاك الوقود بإنك تجيب الشاشة بتاعته وتدوس دوسة طويلة على الزرار التاني اللى على الشمال

ممكن تعمل كدة كل 5000 كيلومتر

ده بيفرق جامد في استهلاك الوقود لأنه بيرجع يحسب معدلات الاستهلاك من الأول .. هو فعلا فرق معايا جدا في تجربة تفصيلية حكيتها هنا قبل كدة